Lau Ura Lasi Lau Mase!

EGU MAURI GUNANA

Lau be England ena siti ladana Paddington dekenai lau vara. Bona egu sinana bona taihuna ida lau noho. Egu tamana be inuinu kekero tauna dainai ai danu ia noho diba lasi.

Lau maragi neganai, egu sinana ese hanuaboi ibounai guriguri dalana be lau dekenai ia hadibaia. Danu egu Baibel maragina lalonai Salamo bukana sibona ia noho, bona miusiki ena tiuni lau karaia unai amo lau ane diba. Buka ta lau duahia bona inai hereva lau laloatao, ia gwau; “Dina ta kerukeru do ia mai lasi”. Unai hereva dainai lau mahuta namonamo lasi bona vaira nega sibona lau laloa. Lau laloa ‘reana ita be do ita mauri hanaihanai lasi.’ ‘Dahaka dainai lau vara?’ Lau ura lasi lau mase!

Meamea bona babalau karadia lau lalopararalaia lasi. Lau bona egu sikuli turadia be gara gabudia dekenai ai lao lauma dikadia hereva henia totona bona danu demoni edia muvi ai itaia hebou. Ai laloa unai kara ai karaia be moale gauna to ia be mai garina.

Egu mauri lagani be 10 neganai mauri dikana lau manadalaia. Kuku ania karana lau manadalaia matamaia. Bena gabeai mariuana lau ania. Bona egu mauri lagani be 11 neganai, kekero muramura lau inua. Kekero muramura ena mamina lau ura henia lasi to lau inua badina lau ura lau kekero. Danu miusiki bona mavaru lau ura henia. Pati gabudia bona klab dekenai lau lao. Hanuaboi ibounai ruma amo lau heau boio bona daba momokani ruma dekenai lau giroa mai. Lau hesiku bada dainai sikuli lau lao diba lasi. Sikuli lau lao neganai, klas lalonai kekero muramura lau inua.

Egu sikuli ena lagani ginigabena ai, egu ripoti be ia namo lasi. Egu mauri lalonai lau karaia karadia be dika momokani dainai egu sinana be ia badu dikadika. Ai hepapahuahu dainai ruma lau rakatania. Unai dainai nega sisina lalonai egu turana Tony ida lau noho. Nega momo henaohenao karadia ia karaia, drag ia hoihoilaia bona ia dagedage. Egu mauri be 16 neganai lau rogorogo, bona emai natuna mero lau havaraia.

BAIBEL ESE EGU MAURI IA HAIDAUA

Gavamani oreadia ese lau dekenai headava lasi sina mai edia natudia edia noho rumana ai daiutu ta idia henia. Unuseniai lau noho neganai, Iehova ena Witnes taudia lau hedavari henia. Hanaihanai Witnes hahine rua be unuseniai idia noho sina matamatadia idia vadivadi henia. Nega ta edia stadi lalonai idia ida lau helai. Lau helai badina lau ura Witnes taudia edia hereva lau hakoikoia. To idia ese Baibel amo egu henanadai momo idia haerelaia. Edia kara namodia lau moalelaia bona unai ese egu kudouna ia hamarerea. Unai dainai Baibel stadi lau abia dae.

Baibel amo lau dibaia gaudia ese egu mauri ia haidaua. Lau maragi negana amo mase dainai lau gari. To hari, Iesu ena hereva toreisi lou helarona dekenai lau dibaia! (Ioane 5:28, 29) Danu, lau dibaia gauna ta be Dirava be lau ia laloa bada. (1 Petero 5:7) Ieremia 29:11 ena hereva ese egu kudouna ia hamarerea, ia gwau: “Lau Lohiabada ese egu palani umui totona lau diba. Lau ese umui do lau durua, vadaeni noho namo do umui davaria, dika ta lasi. Bona natuna momo do umui havaraia, emui bese hagoadaia totona.” Unai dainai, hari lau abia dae momokani egu helaro be tanobada paradaiso ai mauri hanaihanai do lau abia.​—Salamo 37:29.

Iehova ena Witnes taudia ese idia hahedinaraia lau idia laloa bada. Nega ginigunana edia kongrigeisen hebouna dekenai lau lao bona unai ese lau ia hagoadaia bada​—idia ibounai edia kiri bona moale toana lau itaia! (Ioane 13:34, 35) Egu dubu gunana ai, unai bamona kara lau itaia lasi. Herevana egu noho dalana be namo lasi, to Witnes taudia ese lau idia abia dae. Idia ese edia nega idia gaukaralaia lau idia naria bona durua totona. Lau mamia lau be lalokau ruma bese badana ta lalonai lau noho.

Egu Baibel stadi amo lau laloparara egu mauri lau haidaua be namo bona Dirava ena kara maoromaoro taravatudia lau badinaia. Kuku ania karana lau rakatania totona be ia auka. Danu namona be mariuana ania lalohadaina idia havaraia miusiki lau kamonai lasi. Lau inuinu lasi totona, pati gabudia bona klab lao henia karana lau dadaraia be namo. Bona turadia matamata lau abia hidi unai amo lau idia durua mauri dalana matamata lau badinaia totona.​—Aonega Herevadia 13:20.

Tony danu be Iehova ena Witnes taudia ida Baibel ia stadilaia. Iehova ena Witnes taudia ese Baibel amo ena henanadai idia haerelaia neganai, unai ese ena lalona ia veria hereva momokani ia abia dae totona. Ena mauri ai gau momo ia haidaua: Ena dagedage turadia ia rakatania, henaohenao karadia ia hadokoa bona mariuana ania karana ia dadaraia. Iehova ai hamoalea totona, emai kara gunadia ai rakatania unai amo emai natuna mero ai naria namonamo diba. Bona lagani 1982 ai, ai headava.

Lau ese Watchtower bona Awakea ai, edia mauri idia haidaua taudia edia ekspiriens lau duahia. Edia haheitalai ese lau ia hagoadaia! Unai ese lau ia durua lau gaukara goada egu mauri lau haidaua totona. Iehova lau noia lau ia rakatania lasi totona. Lagani 1982 July ai, lau bona Tony ai bapatiso bona hari ai be Iehova ena Witnes taudia.

NAMO LAU DAVARIA

Iehova Dirava lau tura henia dainai, ia ese lau ia hamauria. Nega aukadia ai, Iehova ena heduru daladia ai mamia. Ai ese Dirava tabekau henia karana ai dibaia bona ai mamia ia ese emai ruma bese ia durua bona ia naria.​—Salamo 55:22.

Lau ese egu natuna mero bona kekeni lau durua Iehova idia dibaia totona bona unai be moale gauna. Hari danu lau moale badina edia natudia danu idia durua Dirava ena aonega dekenai idia tubu daekau totona.

Hari lau mahuta namonamo bona vaira nega o mase totona lau lalohekwarahi lasi. Lau bona Tony be wiki ta ta ai Iehova ena Witnes taudia edia kongrigeisen idauidau ai vadivadi henia bona hagoadadia. Idia ai bamoa bona ai lao ma haida ai hagoadaia totona. Unai dainai bema taunimanima ibounai be Iesu idia abidadama henia, mauri hanaihanai idia moalelaia diba.