Oi Volantia Neganai, Iehova Ia Moale!

1, 2. (a) Ita karaia hesiai gaukara dainai, Elipasa bona Biledada be dahaka idia gwau? (b) Iehova ese edena dala ai iena hemami ia gwauraia hedinarai?

“Tau ta ese gau ta Dirava dekenai do ia henia diba, a? Aonega tauna ese Dirava ia durua diba, a? Oiemu kara maoromaoro dainai, Siahu Ibounai Dirava ia moale, a? Oiemu kara namodia ese, Dirava idia durua sisina diba, a?” (Iobu 22:1-3) Unai bamona henanadai edia haere be nega ta oi laloa, a? Temana tauna Elipasa ese Iobu dekenai unai henanadai ia gwauraia neganai, Elipasa ia diba haere be lasi. Iena turana, Suhi tauna Biledada, danu ia gwau tau ta be Dirava vairanai kara maoromaoro ia karaia diba lasi.​—Iobu 25:4 duahia.

² Unai koikoi turadia idia gwau, ena be mai abidadama ida Iehova ita hesiai henia, to ia be unai ia laloa lasi, Iehova dekenai ita be kaubebe eiava biluga bamona. (Iobu 4:19; 25:6) Matamanai do ita laloa, Elipasa bona Biledada be manau karana idia hahedinaraia. (Iobu 22:29) Momokani, bema ta be ororo atai amo eiava peleini ena windo amo ia roha diho, toana be taunimanima be maragi herea. To, Iehova be guba amo ita karaia Basileia durua gaukara ia itaia neganai, unai bamona ia laloa, a? Elipasa, Biledada bona Sopara be koikoi herevadia idia gwauraia dainai, Iehova ese idia dekenai hahemaoro sisibana ia henia neganai, ia ese ena hemami ia gwauraia hedinarai, to Iobu dekenai ia moale bona ia gwauraia, “lauegu hesiai tauna.” (Iobu 42:7, 8) Oibe, “tau ta ese gau ta Dirava dekenai do ia henia diba.”

“IA DEKENAI DAHAKA DO OI HENIA?”

3. Iehova hesiai henia karana dekenai Elihu be dahaka ia gwau, bona ena hereva ena anina be dahaka?

³ Iehova ese Elihu ia hamaoromaoroa lasi, inai henanadai ia henia neganai, ia gwau: “Bema kara maoromaoro oi karaia, ia [Dirava] dekenai dahaka do oi henia? Eiava emu imana amo dahaka do ia abia?” (Iobu 35:7, BHḡ) Elihu ena hereva ena anina be iseda hekwarahi Dirava ena hesiai gaukarana lalonai be anina lasi, a? Lasi. Iena hereva amo ia ura hahedinaraia, ena be Iehova ita tomadiho henia eiava lasi, ia be unai ia laloa lasi, badina gau ibounai dekenai ia be hegeregere. Ita ese ia be taga tauna eiava goada tauna ta ai ita halaoa diba lasi. Danu, ita hahedinaraia kara namodia, iseda diba, o goada be Dirava amo, bona unai ita gaukaralaia dalana ia laloa bada.

4. Ma haida dekenai hebogahisi ita hahedinaraia karana be Iehova ese dahaka ida ia hahegeregerea?

⁴ Bema Iehova ena hesiai taudia dekenai noho hanaihanai lalokauna ita hahedinaraia, unai be hegeregere Iehova dekenai ita hahedinaraia. Aonega Herevadia 19:17 ia gwau: “Ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” Unai siri ena anina be ogogami taudia dekenai ita hahedinaraia hebogahisina be Iehova ese ia laloa, a? Bema ma haida dekenai hebogahisi ita hahedinaraia, ita gwau diba ita be guba bona tanobada ia Havaraia Tauna dekenai ita henitorehai, bona ia ese harihari gaudia namodia amo davana do ia karaia, a? Oibe, Dirava ena Natuna korikorina ese unai ia hahedinaraia.​—Luka 14:13, 14 duahia.

5. Edena henanadai do ita haerelaidia?

⁵ Iehova ese peroveta tauna Isaia ia boiria ena hereva ia gwauraia totona, bona do ia hahedinaraia Ia be ia moale, badina iena abidadama hesiai taudia be Iena ura idia hagugurua. (Isa. 6:8-10) Isaia be mai moale ida unai boiria herevana ia abia dae, ia gwau: “Lau be inai, do lau lao! Lau do oi siaia!” Hari momo be Isaia hegeregere mai moale ida Iehova ena hesiai gaukara idauidau idia karaia. To, reana ta do ia henanadai: ‘Lau moale badina Iehova ena hesiai gaukara idauidau dekenai lau volantia diba, to ia ese lau karaia gaukarana ia laloa bada, a? Ena be iena hesiai gaukara lau karaia eiava lasi, to Iehova ese dala do ia karaia iena gaukara ia guguru totona, a?’ Baraki bona Debora edia negai ia vara gauna ese unai henanadai do ia haerelaidia.

LAU GARI, TO DIRAVA ESE LAU IA HAGOADAIA

6. Israela taudia bona Iabina ena tuari taudia edia idau be dahaka?

⁶ Lagani 20 lalonai, Kanana taudia edia king, Iabina, ese “mai dagedage” ida Israela taudia ia hahisia bada. Unai dainai Israela taudia idia gari dainai idia loaloa lasi. Tuari taudia edia lalohadai dekenai, Israela taudia be idia hegaegae lasi, badina idia be tuari kohudia lasi, to edia inai taudia edia tuari kariota ibounai be 900.​—Gun. 4:1-3, 13; 5:6-8.a

7, 8. (a) Baraki be Iehova amo dahaka oda ia abia? (b) Israela taudia ese edena dala ai Iabini ena tuari taudia idia halusia?

⁷ To, Iehova ese peroveta hahine Debora amo Baraki ia oda henia, ia gwau: “Tuari taudia ibounai 10,000 Napatali iduhu bona Sebuluno iduhu dekena amo do oi haboua, bona Taboro Ororo dekenai do oi hakaudia. Vadaeni lau ese Sisera, Iabina ena tuari taudia edia biaguna do lau koia, do lau hakaudia Kisona Sinavai dekenai. Ia be mai ena kariota bona tuari taudia momo, to lau ese umui dekenai kwalimu do lau henia.”​—Gun. 4:4-7.

⁸ Taunimanima ibounai be unai hereva idia kamonai. Idia volantia taudia be Taboro Ororo dekenai idia haboua. Baraki be maoromaoro Iehova ena oda herevana ia badinaia. (Gunalaia Taudia 4:14-16 duahia.) Tanaka ai idia tuari lalonai, medu bada herea ia diho bona tano ia kopukopu bada. Baraki ese Sisera ena tuari taudia ia lulua ela bona Haroseta Hagoimi dekenai, unai be kilomita 24 bamona. Sisera ese iena tuari kariota goadana ia rakatania bona aena amo Sananima dekenai ia heau lao. Bona Kene tauna Hebere ena adavana, Iaele, ena palai ruma lalonai ia komu. Ia hesiku bada dainai ia mahuta. Bena Iaele be mai gari lasi ida Sisera ia hamasea. (Gun. 4:17-21) Oibe, Israela taudia edia inai tauna ia halusia!

VOLANTIA GAUKARANA IDIA LALOA DALANA

9. Gunalaia Taudia 5:20, 21 ai, dahaka sivarai ia noho?

⁹ Gunalaia Taudia bukana ena karoa 4 bona 5 ita stadilaia hebou be namo, badina unai buka rua amo gau momo do ita dibaia. Hegeregere, Gunalaia Taudia 5:20, 21 ia gwau: “Hisiu be guba amo idia tuari, Oibe, guba amo Sisera idia tuari henia. Kisona sinavaina ese emui inai taudia ia huria oho.” Unai siri ena anina be aneru ese Israela taudia ia durua eiava guba amo nadi idia moru, a? Baibel be unai ia gwauraia lasi. To ita diba momokani Dirava ese ena taunimanima ia durua. Oibe, idia tuari gabuna ai bona negana ai, ia ese medu bada ia siaia, unai dainai unai tuari kariota 900 be idia heau diba lasi. Gunalaia Taudia 4:14, 15 ai, nega toi hanamoa be Iehova dekenai idia henia. Idia volantia Israela taudia 10,000 amo ta ia gwau lasi idia be sibona edia goada amo idia kwalimu.

10, 11. Dahaka dainai Iehova ese Meroso hanuana ia gwauraia dika?

¹⁰ Hoa gauna ma ta ia vara. Israela taudia idia kwalimu murinai, Debora bona Baraki be Iehova hanamoa anena idia abia, idia gwau: “Lohiabada ena aneru be ia gwau, ‘Meroso hanua do oi hadikaia, Meroso taudia do oi hadikaia bada, badina be Lohiabada durua totona idia mai lasi. Tuari totona idia mai lasi, Lohiabada durua gwauraia.’”​—Gun. 5:23.

¹¹ Meroso idia hadikaia ore momokani dainai, ta be ia diba lasi ia be edeseni ia noho. Reana badina unai hanua taudia be Baraki durua totona idia volantia lasi. Kanana taudia tuari henia totona taunimanima 10,000 idia volantia dainai, Meroso taudia be unai boiboi herevana idia kamonai. Eiava Sisera be Baraki amo ia heau neganai, reana ia be unai hanua huana amo ia lao. Reana unai be nega namona Meroso taudia ese Sisera idia dogoatao totona, to unai idia karaia lasi. Iehova be volantia taudia ia tahudia neganai, dahaka dainai idia kamonai lasi? Israela taudia 10,000 be inai tuari badana lalonai idia vareai. Mani oi laloa, unai tuari tauna goadana be edia hanua huanai ia heau neganai, idia itaia. Unai nega ai gau ta idia karaia diba Iehova ena ura idia hagugurua totona. Bema unai idia karaia ia ese idia ia hanamoa diba. To, dala ia kehoa neganai, idia be gau ta idia karaia lasi. Toana be Meroso taudia be Iaele bamona lasi, ia be mai gari lasi ida ia kara.​—Gun. 5:24-27.

12. Gunalaia Taudia 5:9, 10 ese taunimanima edia kara be edena bamona ia herevalaia, bona hari be edena bamona?

¹² Gunalaia Taudia 5:9, 10 ese ia hahedinaraia, Baraki ida idia lao taudia bona ia idia bamoa lasi taudia edia kara be idau. Debora bona Baraki ese “Israela ena tuari biagudia . . . bona idia edia murinai, mai edia moale bona goada, tuari totona idia lao taudia” idia hanamoa. Edia kara be “doniki kurokuro dekenai [idia] guia taudia” bamona lasi, unai taudia be idia hekokoroku dainai tuari totona idia lao lasi, bona “bilankesi gedana” dekenai idia helai taudia, mauri namona idia noholaia taudia bamona lasi! Idia be “dala dekenai [idia] raka noho taudia” bamona lasi, Baraki ida tuari totona idia lao taudia be mai ura bada ida idia lao, idia be Taboro ena ororo gabudiai bona Kisona ena koura gabudiai idia tuari! Mauri namona idia ura moalelaia taudia be unai idia laloa. Oibe, namona be idia ese ia vara gauna idia laloa dobu, badina idia be Iehova ena gaukara idia durua lasi. Hari danu, Dirava idia hesiai henia lasi taudia be edia kara idia lalohadailaia be namo.

13. Dahaka dainai Rubena, Dano, bona Asere iduhuna edia kara be Sebuluno bona Napatali iduhuna amo ia idau?

¹³ Idia volantia taudia be Iehova ese ena lohia siahuna ia abia isi dalana idia itaia. Bona ma haida dekenai “Lohiabada ena kwalimu mai siahu bada karadia idia herevalaia” diba. (Gun. 5:11) To Gunalaia Taudia 5:15-17 ese ia hahedinaraia, Rubena, Dano, bona Asere iduhuna be edia taga sibona idia laloa, hegeregere edia mamoe, sisima, bona sisima kamokau gabudia, to Iehova ena gaukara idia laloa lasi. To Sebuluno bona Napatali iduhuna be Debora bona Baraki durua totona, idia be “edia mauri negea totona idia gari lasi.” (Gun. 5:18) Edia sivarai amo mai anina bada gauna ita dibaia.

“LOHIABADA UMUI HANAMOA!”

14. Hari edena dala ai Iehova ena lohia siahuna ita abia isi diba?

¹⁴ Hari ita idia boiria lasi tuari korikori lalonai ita vareai totona, to haroro gaukara lalonai lalogoada karana ita hahedinaraia diba. Iehova ena orea lalonai volantia taudia momo idia tahua noho. Tadikaka, taihu, bona matamata taudia milioni momo be mai ura bada ida ful-taim hesiai gaukara idauidau idia karaia, hegeregere haida be idia painia, Betele ai idia gaukara, Kingdom Hall konstraksen gaukara idia durua, bona hebouhebou maragidia bona badadia idia durua. Elda taudia mani ita laloa, idia danu be maduna badadia idia huaia, hegeregere Hospital Liesen Komiti bona hebouhebou badadia idia hegaegaelaia. Laloatao, mai ura bada ida oi karaia gaukarana be Iehova ese ia laloa bada, bona do ia laloaboio diba lasi.​—Heb. 6:10.

15. Edena dala ai ita diba ita be Iehova ena hesiai gaukara dekenai ita manoka?

¹⁵ Namona be sibona dekenai inai henanadai ita henia: ‘Lau ura ma haida ese gaukara ibounai idia karaia, a? Lau ura kohu momo lau tahua, to Iehova hesiai henia karana lau laloa bada lasi, a? Baraki, Debora, Iaele, bona idia volantia taudia 10,000 bamona, mai abidadama bona lalogoada ida Iehova ese ia henia haheganina lau badinaia, a? Bema moni gaukara namona abia totona lau ura siti eiava hanua ma ta dekenai lau lao, unai ese egu famili bona kongrigeisen do ia durua, a?’b

16. Iehova dekenai dahaka do ita henia?

¹⁶ Iehova ese maoro ia henia iena lohia siahuna ita durua totona, unai amo ia hahedinaraia ia be ita ia matauraia. Matamanai Diabolo ese taunimanima ia koia iena lohia dalana idia durua totona, to bema Iehova ena lohia dalana ita durua, ita hahedinaraia ita be iena kahanai ita gini. Ita be Iehova ita abidadama henia bona ia ita badinaia dainai, iena hesiai gaukara idauidau karaia totona ita volantia neganai, Iehova ia moale. (Aon. 23:15, 16) Unai dala amo ia be Satani ena hereva ia hakoikoia diba. (Aon. 27:11) Oibe, Iehova oi badinaia neganai, ia be unai ia laloa bada bona unai ese iena kudouna ia hamoalea.

17. Gunalaia Taudia 5:31 ese vaira nega be edena bamona ia herevalaia?

¹⁷ Kahirakahira inai tanobada be Iehova ena lohia siahuna idia abia dae taudia amo do ia honu. Ita ibounai be unai nega ita naria noho! Debora bona Baraki ida do ita ane, ita gwau: “Lohiabada e, . . . oi dekenai idia ura henia taudia be namo, dina tubua hegeregerena do idia diaridiari noho.” (Gun. 5:31) Iehova ese Satani ena tanobada dikana ia hadikaia ore neganai, unai do ia vara! Aramagedono ena tuari ia matamaia neganai, Dirava ese ena inai tauna hadikaia ore totona, volantia taudia do ia tahua lasi. Unai nega ai ita be ‘iseda gabu dekenai do ita gini, bona naria noho sibona, vadaeni Lohiabada ena kwalimu ita dainai do ita itaia.’ (2 Siv. 20:17) To hari nega ia noho mai lalogoada bona ura bada ida Iehova ena lohia siahuna ita durua totona.

18. Ita volantia neganai, ma haida be dahaka idia karaia diba?

¹⁸ “Lohiabada umui hanamoa! Israela tuari taudia ese . . . edia gunalaia taudia edia murinai idia raka, mai moale bona ura kwalimu danu.” Debora bona Baraki ese edia kwalimu anena idia abia neganai, idia ese taunimanima idia hanamoa lasi, to Ataiai Momokani Diravana idia hanamoa. (Gun. 5:1, 2) Unai hegeregerena, Iehova ena hesiai gaukara idauidau dekenai ita volantia neganai, ma haida ita hagoadaia diba Iehova idia hanamoa totona!