Inai Oi Diba, A?

Ierusalema ena dubu helaga ai animal idia hoihoilaia taudia idia gwauraia “henaohenao taudia” be maoro, a?

MATAIO ENA EVANELIA bukana ese ia sivarailaia hegeregerena, “Iesu be dubu helaga lalonai ia vareai bona hoihoi taudia ibounai ia lulua, bona moni idia senisia taudia edia pata bona pune manu idia hoihoilaia taudia edia helai gaudia ia hagirodia. Bona idia dekenai ia gwau: ‘Toretore Helagadia ia gwau: “Lauegu ruma do idia gwauraia guriguri ruma,” to umui ese henaohenao taudia edia kohua ai umui halaoa.’”​—Mat. 21:12, 13.

Iuda tomadihona idia herevalaia bukadia ese idia hahedinaraia, dubu helaga ai idia hoihoi taudia ese taunimanima idia koia bona idia hoihoilaia gaudia edia davana idia habadaia. Hegeregere, Mishnah bukana (Keritot 1:7) ese lagani 50 C.E. bamona ai ia vara gauna ia herevalaia, unai nega ai boubou totona idia gaukaralaia pune manu rua edia davana ia daekau golo denario ta. Unai be reana hesiai tauna ta ese dina 25 lalonai ia karaia gaukarana ena davana hegeregerena. Ogogami taudia ese pune eiava kerea manu idia bouboulaia diba; to unai manu edia davana be bada herea dainai, idia hoia diba lasi. (Lev. 1:14; 5:7; 12:6-8) Rabi tauna Simeon ben Gamaliel be unai kara dainai ia badu dikadika, unai dainai Iuda taudia ese idia henia boubou gaudia edia namba ia hadihoa. Bona hari pune manu rua be denario 100 amo idia hoia diba.

Unai ese ia hahedinaraia, dubu helaga ai idia hoihoi taudia be idia mataganigani bona edia kastoma idia koia. Unai dainai Iesu ese idia ia gwauraia “henaohenao taudia” be maoro.