Iesu ese Dubu Helaga Ia Hagoevaia

Lagani 30 C.E., April hua bamona ai, Iesu be Ierusalema dekenai ia lao. Taunimanima momo be Pasova aria totona idia mai. Dubu helaga ai animal do idia bouboulaia danu. Unai dainai haida be edia animal idia mailaia, bona ma haida be Ierusalema ai animal idia hoia.

Iesu be dubu helaga dekenai ia lao neganai, ia itaia taunimanima be animal idia hoihoilaia. Iehova ena tomadiho ruma ai, sibodia totona moni idia karaia noho! Iesu be dahaka ia karaia? Iesu ese varo amo kwadia gauna ta ia karaia bena mamoe bona boromakau be dubu helaga amo ia luludia. Moni senisia taudia edia koini ia bubua bona edia teibolo ia hagirodia. Pune manu idia hoihoilaia taudia ia hamaoroa: ‘Inai gaudia be iniseni amo umui abia siri! Namo lasi egu Tamana ena ruma be bisinesi gabuna ai umui halaoa!’

Dubu helaga ai idia noho taudia be Iesu ena kara dekenai idia hoa. To Iesu ena hahediba taudia be Mesia totona idia gwauraia peroveta hereva idia laloatao: ‘Lau be Iehova ena ruma lau ura henia bada.’

Gabeai, lagani 33 C.E. ai, Iesu ese dubu helaga ma ia hagoevaia lou. Ia ura taunimanima ese iena Tamana ena ruma idia matauraia.