Iehova be Emu “Amen” Ia Laloa Bada

“HEBOU TAUDIA IBOUNAI ESE ‘AMEN’ IDIA GWAURAIA”

English gado ai inai hereva “amen,” ena anina be “ia vara be namo” o “momokani.” Unai hereva be Heberu herevana ta amo ia mai, ena anina be “gwauhamata do oi badinaia” bona “gwauhamata oi hamomokania.” Nega haida unai hereva be kota dekenai idia gaukaralaia. Bema ta be gwauhamata ta ia karaia, do ia gwau “amen,” unai ese ia hahedinaraia ia herevalaia gaudia be momokani bona bema ia herevalaia gaudia ia badinaia lasi, panisi do ia abia. (Num. 5:22) Bema taunimanima vairanai “amen” ia gwauraia, anina be ia gwauhamatalaia gauna do ia karaia.​—Neh. 5:13.

Deuteronomi karoa 27 ai, inai hereva “amen” idia gaukaralaia. Israela taudia be Gwauhamata Tanona ai idia vareai murinai, Taravatu idia kamonai totona Ebala Ororo bona Gerisima Ororo huanai idia haboua. Unuseniai do idia lao bona Taravatu do idia kamonai sibona lasi, to namona be idia hamomokania unai Taravatu idia abia dae. Unai taravatu utua karadia amo do idia vara gaudia ena dika idia kamonai neganai, idia gwau “Amen!” (Deu. 27:15-26) Tatau, hahine bona natudia tausen momo idia haere badabada ena regena mani oi laloa! (Ios. 8:30-35) Unai dina ai idia gwauraia gwauhamata idia laloaboio lasi. Bona unai negai idia noho Israela taudia be edia hereva idia hamomokania. Baibel ia gwau: “Iosua ena mauri dinadia ibounai lalonai Israela taudia ese Lohiabada ena hesiai gaukara idia karaia. Bona Iosua ia mase murinai danu idia ese Lohiabada idia badinaia noho. Oibe, Israela taudia ese Lohiabada idia badinaia noho, ela bona edia gunalaia taudia, tau badadia, idia mase ore. Taudia unai, Iosua danu Lohiabada ese Israela ia durua karadia ibounai edia matana dekenai idia itaia.”​—Ios. 24:31.

Danu Iesu ese “amen” ia gaukaralaia, ia gwauraia herevana ia hamomokania totona. Idia gwauraia herevana ta o torea herevana ta ia haerelaia lasi, to hereva momokani ia hahedinaraia totona “amen” (English ai idia hahanaia “momokani”) ia gaukaralaia. Nega haida inai hereva ia gwauraia loulou, do ia gwau, “momokani.” (Mat. 5:18; Ioa. 1:51) Iena hereva idia kamonai taudia dekenai ia ura hahedinaraia ia gwauraia gaudia ibounai be hereva momokani. Iesu be ia hegeregere unai bamona ia hereva badina Dirava ese ia abia hidi iena gwauhamata ibounai ia hamomokania totona.​—2 Kor. 1:20; Apok. 3:14.

“TAUNIMANIMA IBOUNAI IDIA GWAU, ‘AMEN,’ BONA, ‘LOHIABADA IDIA HANAMOA!’”

Danu Israela taudia be Iehova idia hanamoa bona idia guriguri neganai inai hereva “amen” idia gaukaralaia. (Neh. 8:6; Sal. 41:13) Bona idia ta be ia guriguri murinai bona guriguri idia kamonai taudia be “amen” idia gwauraia neganai, unai ese ia hahedinaraia unai guriguri dekenai idia lalotamona. Unai guriguri lalonai idia noho taudia ibounai be unai dala amo mai moale ida Iehova idia tomadiho henia. King Davida ese Ierusalema dekenai Iehova ena taravatu Maua ia abia lao neganai Israela taudia be Dirava idia tomadiho henia. Unai nega ai, Davida be Dirava dekenai mai kudouna ibounai ida ia guriguri. Bona 1 Sivarai 16:8-36 ai unai guriguri be ane bamona ia torea. Unai negai idia noho taudia be iena hereva ese idia ia hagoadaia dainai idia “ibounai idia gwau, ‘Amen,’ bona, [Iehova] idia hanamoa!” Oibe, mai moale ida Iehova idia tomadiho henia hebou.

Danu Keristani taudia ginigunadia ese Iehova idia hanamoa neganai inai hereva “amen” idia gaukaralaia. Baibel idia torea taudia be edia revareva lalonai unai hereva idia gaukaralaia danu. (Roma 1:25; 16:27; 1 Pet. 4:11) Apokalupo bukana ese ia hahedinaraia, guba ai aneru be Iehova idia hanamoa noho bona idia gwau: “Amen! Iah umui hanamoa!” (Apok. 19:1, 4) Keristani taudia ginigunadia be nega momo edia hebou ai idia gwauraia guriguri dokodia ai idia gwau, “amen.” (1 Kor. 14:16) To, unai hereva be idia gwauraia kava herevana lasi.

DAHAKA DAINAI EMU “AMEN” BE MAI ANINA BADA?

Iehova ena hesiai taudia ese unai hereva idia gaukaralaia negana bona dalana ita dibaia neganai, hari ita laloparara guriguri ena dokonai inai hereva “amen” ita gaukaralaia be mai anina bada. Ita sibona eda guriguri dokona ai “amen” ita gwauraia neganai ita hahedinaraia ita herevalaia gauna ita laloa bada. Bona ta ena guriguri dokona ai “amen” be sibona iseda lalona ai eiava taunimanima vairanai ita gwauraia neganai, ita hahedinaraia ia gwauraia herevana dekenai ita lalotamona. Do ita itaia edena dala haida ai “amen” gwauraia karana be mai anina bada.

Ta ia guriguri neganai ita kamonai namonamo. Iseda guriguri dekenai ita gwauraia herevadia sibona lasi, to iseda kara amo ita hahedinaraia Iehova ita tomadiho henia. Mai lalona ibounai ida “amen” ita gwauraia karana ese ita do ia durua lalohadai maorona ita abia bona ta ese ia gwauraia gurigurina do ita kamonai henia namonamo.

Dirava idia tomadiho henia taudia ia hatamonaia. Kongrigeisen ai ta ia guriguri neganai, ibounai ese iena guriguri idia kamonai namonamo. (Kara 1:14; 12:5) Bema unai bamona ita karaia, unai ese ia hahedinaraia ita ibounai be mai lalotamona ida “amen” do ita gwauraia. Herevana ita gwauraia hedinarai o lalona ai sibona “amen” ita gwauraia, to Iehova be iseda noinoi ia haerelaia diba.

Iehova ita hanamoa. Iehova be iseda tomadiho lalonai ita karaia gaudia ibounai ia laloa bada. (Luka 21:2, 3) Dirava be ia ita tomadiho henia ena badina bona iseda kudouna ai idia noho gaudia ia diba. Herevana ta be telefon amo kongrigeisen hebou ia kamonai, namona be ia abia dae momokani mai manau ida ia gwauraia “amen” be Iehova ese ia laloa bada. Unai be hegeregere unai tauna be Kingdom Hall lalonai tadikaka taihu ida Dirava idia hanamoa hebou.

Nega haida ita laloa inai hereva “amen” be gau badana lasi, to Dirava dekenai unai be mai anina bada. Baibel encyclopedia ta ia gwau: “Dirava ena hesiai taudia be unai hereva tamona idia gaukaralaia karana amo edia abidadama goadana bona edia helaro idia hahedinaraia.” Ita gwauraia “amen” ibounai ese Iehova ia hanamoa be namo.​—Sal. 19:14.