“Umui Naria Namonamo, Dika Tau Ta ese . . . Umui Ia Tarapua”!

1. Kolose 2:4, 8 ena hereva bamona, edena dala ai Satani ese iseda lalohadai ia biagua?

SATANI ia ura lasi Iehova ita lalokau henia. Ena ura ia hagugurua totona, iseda lalohadai ia biagua bona iena ura sibona ita karaia. Ia ura ita ia koia unai amo ita ura henia gaudia eiava iseda lalona idia veria gaudia sibona do ita tahua.​—Kolose 2:4, 8 duahia.

2-3. (a) Dahaka dainai Kolose 2:8 ai ia noho sisiba herevana ita laloa bada be namo? (b) Inai stadi atikol ai dahaka do ita herevalaia?

² Oi laloa Satani ese ita ia hakaua kerere diba, a? Oibe. Namona be ita laloatao, Paulo ena sisiba herevana Kolose 2:8 ai be Dirava idia diba lasi taudia totona ia torea lasi. To, unai hereva be lauma helaga ese ia horoa Keristani taudia totona ia torea. (Kol. 1:2, 5) Unai negai idia noho horoa Keristani taudia idia naria namonamo badina idia diba Satani ese idia ia biagua diba, bona ita danu hari inai negai ita naria namonamo be gau badana. (1 Kor. 10:12) Dahaka dainai? Badina Satani be tanobada dekenai idia negea diho, ia ura Dirava idia badinaia taudia ia hakaua kerere. (Apok. 12:9, 12, 17) Bona hari ita noholaia negai kara dika taudia bona koikoi taudia be edia kara dika do idia “habadaia momokani.”​—⁠2 Tim. 3:1, 13.

³ Inai stadi atikol ai do ita itaia edena dala ai Satani ese “anina lasi hereva koikoidia” ia gaukaralaia taunimanima ia koia totona. Hari ita ese Satani ena “koikoi karadia” toi do ita herevalaia. (Efe. 6:11) Bena stadi atikol 24 ai, do ita itaia edena dala ai Satani ena koikoi karadia dainai reana guna ita abia lalohadai ita dadaraia totona. Israela taudia be Gwauhamata Tanona dekenai idia vareai murinai, Satani ese idia ia hakaua kerere. Unai ia karaia dalana mani ita herevalaia.

ISRAELA TAUDIA BE KAIVAKUKU IDIA TOMADIHO HENIA

4-6. Deuteronomi 11:10-15 ena hereva bamona, Gwauhamata Tanona ai Israela taudia be edena bamona uma karaia dala matamatadia idia dibaia?

⁴ Satani be mai koikoi ida Israela taudia ia hakaua kerere kaivakuku idia tomadiho henia totona. Edena dala ai? Satani ia diba Israela taudia be aniani idia ura, unai dainai unai dala ia gaukaralaia idia ia hakaua kerere totona. Israela taudia be Gwauhamata Tanona dekenai idia vareai neganai, aniani hadoa dala matamatadia idia dibaia. To, Aigupito dekenai idia noho neganai, Israela taudia be Naila Sinavai amo ranu idia abia edia uma aniani dekenai ranu idia henia totona. Bona Gwauhamata Tanona ai idia noho neganai sinavai badadia amo ranu idia abia lasi, to idia be medu amo ranu idia abia bona idia gaukaralaia. Danu daba ena paripari ese tano eiava tubutubu gaudia ia haparia. (Deuteronomi 11:10-15 duahia; Isa. 18:4, 5) Unai dainai, Israela taudia ese uma karaia dala matamatadia idia dibaia be namo. Unai idia karaia totona be mai ena hekwarahi badina uma karaia dalana idia diba namonamo taudia be tano gagaena ai idia mase.

⁵ Iehova be ena taunimanima ia hadibaia edia noho dalana be ia idau guna bamona lasi. Bena idia dekenai sisiba herevana ta ia henia, reana idia laloa inai sisiba herevana be uma karaia dalana ia herevalaia lasi. Iehova ia gwau: “To do umui naria namonamo, haida ese umui do idia hakaua kerere, idau dirava dekenai do umui tomadiho henia garina, bona idau dirava edia hesiai gaukara do umui karaia garina.” (Deu. 11:16, 17) Dahaka dainai Iehova be uma karaia dalana ia herevalaia neganai, dirava koikoi tomadiho henia karana dekenai sisiba ia henia?

⁶ Iehova ia diba Israela taudia be uma karaia dalana idia dibaia totona, kaivakuku idia tomadiho henia taudia dekenai idia lao diba. Momokani, idia badinai idia noho besedia be uma karaia daladia idia diba namonamo, bona Dirava ena taunimanima be idia ese idia hakaua kerere diba. Kanana ai uma karaia taudia be Bala idia tomadiho henia taudia. Idia abia dae Bala be guba ena biaguna bona medu ia henia diravana. Iehova ia ura lasi iena taunimanima be unai koikoi herevadia idia abia dae. To, Israela taudia be nega momo idia naria namonamo lasi dainai Bala idia tomadiho henia. (Num. 25:3, 5; Gun. 2:13; 1 Kin. 18:18) Unai ese ia hahedinaraia Satani ese Israela taudia ia tarapua.

SATANI ESE DALA TOI AMO ISRAELA TAUDIA IA HAKAUA KERERE

7. Israela taudia be Gwauhamata Tanona dekenai idia vareai neganai, edia abidadama ia tohoa gauna ginigunana be dahaka?

⁷ Satani ese ia gaukaralaia dala ginigunana be, edia ura gaudia. Unai ia gaukaralaia idia ia koia totona, badina Israela taudia idia ura medu ranu ese edia tano do ia hapariparia. To ia auka badina lagani ta ta ai April ena hua dokona ia lao September lalonai Gwauhamata Tanona ai medu sisina sibona ia diho. Israela taudia idia mauri bona uma aniani momo idia abia totona, October ena hua lalonai ia diho medu idia naria. Satani ese Israela taudia ia koia, unai amo do idia abia dae edia uma aniani idia tubu namonamo totona dirava koikoi idia tomadiho henia taudia edia kara idia tohotohoa. To, Iehova idia abidadama henia lasi taudia idia ura medu ia diho unai dainai kaivakuku diravana Bala idia tomadiho henia.

8. Satani ese ia gaukaralaia dala iharuana be dahaka? Gwauraia hedinarai.

⁸ Satani ese Israela taudia dekenai ia gaukaralaia dala iharuana be, tauanina ena ura dikadia. Kaivakuku idia tomadiho henia besedia be edia tomadiho karadia lalonai matabodaga karadia idia karaia. Hegeregere, tatau bona hahine be dubu lalonai matabodaga karadia idia karaia. Tatau be tatau ida bona hahine be hahine ida idia mahuta hebou, bona unai bamona kara ma haida be edia mauri ena kahana ai idia halaoa! (Deu. 23:17, 18; 1 Kin. 14:24) Tomadiho koikoi karadia idia karaia taudia idia abia dae unai bamona kara dainai edia dirava ese tano do ia hanamoa bona aniani momo do idia abia. Israela taudia momo be matabodaga tomadiho karadia ese edia lalona ia veria dainai, dirava koikoidia idia tomadiho henia. Unai be hegeregere Satani ese idia ia tarapu bamona.

9. Hosea 2:16, 17 ena hereva bamona, Satani be edena dala ai Israela taudia edia lalona ia hadiburaia?

⁹ Satani ese ia gaukaralaia dala ihatoina be, Israela taudia edia lalona ia hadiburaia dainai Iehova idia laloa lasi. Peroveta tauna Ieremia ena negai, Iehova ia gwau peroveta koikoi taudia be ena taunimanima do idia koia unai amo Iena ladana do idia laloaboio badina “Bala dekenai idia giroa lao.” (Ier. 23:27) Reana Dirava ena taunimanima be Iehova ena ladana idia gaukaralaia lasi bona ena ladana gabunai Bala idia gwauraia, ena anina be Biaguna. Unai kara dainai, ia auka Israela taudia ese Iehova bona Bala dirava koikoina edia idau idia lalopararalaia totona. Bona unai dainai Israela taudia ese Bala tomadiho henia karadia bona Iehova tomadiho henia karana idia karaia hebou.​—Hosea 2:16, 17 duahia.

HARI SATANI ESE TAUNIMANIMA IA KOIA DALADIA

10. Edena dala ai Satani ese hari iseda negai taunimanima ia koia?

¹⁰ Danu, hari iseda negai Satani ese unai dala toi ia gaukaralaia. Ia ese taunimanima ia koia dainai edia ura gaudia bona matabodaga karadia idia karaia, danu edia lalona ia hadiburaia dainai Iehova idia laloa lasi. Mani dala ihatoina ita herevalaia guna.

11. Edena dala ai Satani ese taunimanima edia lalona ia hadiburaia dainai Iehova idia laloa lasi?

¹¹ Satani be taunimanima edia lalona ia hadiburaia dainai Iehova idia laloa lasi. Iesu ena aposetolo taudia idia mase murinai, sibona idia gwauraia Keristani taudia haida be hahediba hereva koikoidia idia hadibaia matamaia. (Kara 20:29, 30; 2 Tes. 2:3) Edia hahediba hereva koikoidia amo taunimanima edia lalona idia hadiburaia, unai dainai Dirava momokanina idia laloa lasi. Hegeregere, edia Baibel ai Dirava ena ladana idia gaukaralaia lasi to “Lohiabada” eiava dagi ladadia ma haida idia gaukaralaia. Dirava ena ladana idia kokia bona “Lohiabada” idia atoa dainai, ia auka Baibel ia duahia tauna ese Iehova bona “lohia” ma haida edia idau ia lalopararalaia namonamo totona. (1 Kor. 8:5) Idia ese Iehova bona Iesu edia ladana gabuna ai inai dagi ladana, “Lohiabada” idia gaukaralaia, unai dainai taunimanima idia daradara bona idia laloa Iehova bona iena Natuna edia dagi be hegeregere. (Ioa. 17:3) Unai ese daradara ia havaraia dainai taunimanima be Toi Tamona lalohadaina idia abia dae​—⁠bona unai be Baibel lalonai ia noho lasi. Unai lalohadai koikoina dainai taunimanima momo idia laloa Dirava dibaia totona be ia auka!​—⁠Kara 17:27.

12. Roma 1:28-30 ena hereva bamona, tomadiho koikoi ese edena bamona kara idia abia dae, bona unai dainai dahaka ia vara?

¹² Satani ese taunimanima ia koia dainai matabodaga karadia idia karaia. Israela taudia edia negai, Satani ese tomadiho koikoi ia gaukaralaia taunimanima ia koia matabodaga karadia idia karaia totona. Hari danu unai dala tamona ia gaukaralaia. Tomadiho koikoi lalonai matabodaga karadia idia karaia bona idia laloa unai be kerere lasi. Unai dainai, sibona idia gwauraia Keristani taudia momo be Dirava ena kara maoromaoro taravatudia idia badinaia lasi. Aposetolo Paulo be Roma taudia dekenai ia siaia revareva lalonai tomadiho koikoi dekenai idia vara dika idauidau ia gwauraia hedinarai. (Roma 1:28-31 duahia.) Unai “kara mirodia” lalonai idia vara kara haida be, matabodaga karadia bona tatau be tatau ida bona hahine be hahine ida idia mahuta hebou. (Roma 1:24-27, 32; Apok. 2:20) Unai dainai, Baibel ena hahediba hereva maorodia ita badinaia be mai anina bada!

13. Satani be edena dala ma ta ia gaukaralaia taunimanima ia koia totona?

¹³ Satani ese taunimanima ia koia dainai sibodia edia ura gaudia idia karaia. Iseda ruma bese ita naria totona gaukara ta ita karaia be namo. (1 Tim. 5:8) Bona unai gaukara dibaia namonamo totona sikuli ta dekenai ita lao bona diba ita abia. To, ita naria namonamo be gau badana. Tano momo ai, stiuden taudia be sikuli gabuna dekenai gaukara ta karaia namonamo dalana idia dibaia sibona lasi, to inai tanobada ena hahediba hereva koikoidia idia dibaia danu. Hegeregere, sikuli haida ese stiuden taudia dekenai Dirava ia noho lasi lalohadaina idia hadibaia bona Baibel idia matauraia lasi. Danu stiuden taudia idia hadibaia mauri be evolution amo ia matamaia. (Roma 1:21-23) Unai bamona hahediba herevadia be “Dirava ena aonega” lasi.​—1 Kor. 1:19-21; 3:18-20.

14. Tanobada ena aonega be taunimanima dekenai dahaka ia hadibaia?

¹⁴ Tanobada ena aonega be Iehova ena kara maoromaoro taravatudia ida ia hegeregere lasi. Bona Dirava ena lauma helaga ena huahua ia hahedinaraia lasi, to “tauanina ena kara dikadia” ia hahedinaraia. (Gal. 5:19-23) Unai dainai taunimanima be idia hekokoroku bona idia ‘sibodia idia laloa bada.’ (2 Tim. 3:2-4) To, Dirava ena taunimanima be unai bamona kara idia hahedinaraia lasi, badina Baibel amo manau karana hahedinaraia dalana idia dibaia. (2 Sam. 22:28) Keristani taudia haida be iunivesiti dekenai idia lao bona inai tanobada ena lalohadai idia abia dae, to Dirava ena lalohadai idia dadaraia. Bema ita naria namonamo lasi, dahaka do ia vara? Mani ekspiriens ta ita herevalaia.

15-16. Taihu ta ena ekspiriens amo dahaka oi dibaia?

¹⁵ Lagani 15 lalonai ful-taim hesiai gaukara ia karaia taihu ta ia gwau: “Lau be bapatiso Witnes taihu ta dainai matamanai iunivesiti ai diba abia karana ena dika idauidau be iseda pablikeisen amo lau duahia bona haida amo lau kamonai, to unai sisiba herevadia lau laloa bada lasi. Lau laloa unai sisiba be anina lasi lau badinaia totona.” To dahaka hekwakwanai ia davaria? Ia gwau: “Sikuli gaudia totona lau bisi bada dainai nega be lasi Iehova lau guriguri henia totona. Lau hesiku bada dainai lau hegeregere lasi ma haida ida Baibel lau herevalaia bona hebou totona lau hegaegae. Iunivesiti ai lau sikuli neganai lau mamia unai ese egu hetura karana Iehova ida ia hadikaia, bona lau diba kara ta lau karaia be namo.”

¹⁶ Iunivesiti ai diba bada abia karana ese edena dala unai taihu ena laloa dalana ia hadikaia? Ia gwau: “Lau diba iunivesiti ai lau abia aonegana ese egu laloa dalana ia hadikaia. Hegeregere, egu tadikaka taihu edia kerere lau tahua, idia lau doria idia karaia diba lasi gaudia idia karaia totona, bona lau ura lasi idia lau bamoa. Lagani momo murinai unai bamona kara bona lalohadai lau dadaraia. Unai amo gau ta lau dibaia, bema iseda guba Tamana bona iena orea amo idia mai sisiba herevadia ita badinaia, hekwakwanai do ita davaria lasi. Iehova sibona be egu kara ia diba namonamo. Unai dainai bema idaunegai unai sisiba herevadia lau badinaia, hekwakwanai do lau davaria lasi!”

17. (a) Namona be iseda lalona ita hadaia dahaka ita karaia totona? (b) Stadi atikol 24 ai dahaka do ita herevalaia?

¹⁷ Namona be emu lalona oi hadaia Satani ena tanobada ena “aonega bona anina lasi hereva koikoidia” ese oi ia biagua lasi. Danu hanaihanai Satani ena tarapu idauidau dekenai ita naria namonamo be namo. (1 Kor. 3:18; 2 Kor. 2:11) Namo lasi tanobada ena aonega ese emu lalona ia hadiburaia bena Iehova oi rakatania. Iehova ena kara maoromaoro taravatudia oi badinaia be namo. Namo lasi Satani ese oi ia koia bona Iehova ena sisiba oi dadaraia. To, bema oi mamia inai tanobada ena lalohadai ese emu laloa dalana ia biagua, dahaka do oi karaia? Stadi atikol 24 ese do ia hahedinaraia Dirava ena Hereva ese ita do ia durua unai amo lalohadai dikadia bona kara dikadia do ita dadaraia.​—2 Kor. 10:4, 5.