Henanadai Mauana

◼ Edena negai ta be ia sibona totona Hesiai Gaukara Karaia Totona Ita Hegaegae bukana ta do ia abia diba, bona edena dala ai bona edena negai elda taudia do idia hegaegae bapatiso idia ura abia taudia ida henanadai do idia riviulaia totona?

Inai hereva be Hesiai Gaukara bukana rau 173-5 ai, sinado “Kongregesen Edia Elda Taudia ese Inai Idia Laloa be Namo” henunai herevana hegeregerena. Unuseniai ia hahedinaraia tau ta ese ena mauri ia haidaua bona Iehova ena taravatu maorodia ia badinaia, bona kongregesen heboudia dekenai ia lao hanaihanai, bona bapatiso lasi pablisa bamona haroro gaukara ia karaia neganai, bapatiso ia ura abia be elda taudia dekenai ia hamaoroa diba bona unai nega ai ia sibona totona Hesiai Gaukara Karaia Totona Ita Hegaegae bukana ia abia diba.​—“Pablisa Matamatadia” totona hereva be rau 97-100 ai itaia danu.

Buka ia abia murinai, namona be bapatiso lasi pablisa ese bapatiso idia ura abia taudia edia henanadai rau 175 amo ia riviulaia matamaia. Namona be ia ese idia torea siridia bona idia torea hanai lasi siridia ia duahia. Unai henanadai ia riviulaia murinai, elda taudia haida ese ia ida unai henanadai bona haere do idia kikilaia. Gunalaia tauna ese unai do ia hegaegaelaia.

Namona be bapatiso totona idia hegaegaelaia karana be idia karaia haragaharaga lasi. Unai dainai, ta ia ura bapatiso ia abia negana be elda taudia dekenai do ia hadibaia haraga, nega bada ia do noho neganai. Elda taudia idia naria bona bapatiso idia ura abia taudia ida henanadai do idia riviulaia lasi ela bona hebouhebou hadibaia herevana idia abia murinai, be mai badina lasi. Namona be stadi idia karaia taudia ese edia stadi taudia edia lauma dalana idia diba, gwauhamata idia karaia gwauraia negana idia diba, bona bapatiso totona hegaegae dalana idia hadibadia.

Ia ura bapatiso ia abia tauna ida henanadai do idia riviulaia elda taudia be reana idia laloa unai tauna ese inai kara badana ia do karaia lasi neganai, lauma dalanai do ia goada ia do lao be namo. Reana ia namo bema diba ma haida do ia abia eiava ena abidadama be ma haida dekenai ia gwauraia dalana ia do hanamoa. (1 Pet. 3:15) Reana nega do ia abia haroro gaukara dekenai do ia manada totona. Eiava do idia itaia bapatiso abia totona ia do hegeregere momokani lasi. (Kara 8:36 itaia.) To, unai nega ta ta ai, elda taudia ese do idia hanamoa gaudia idia hahedinaraia be namo bona, bema hegeregere, dala do idia karaia idia durua noho totona, gabeai do ia hegeregere ia bapatiso totona.