Apendiks

Hereva ta Keristani Tama sina Dekenai:

Tama sina, emui ura badana be emui natudia oi duruadia Iehova idia lalokau henia bona edia mauri idia gwauhamatalaia ia dekenai. Dahaka do oi karaia emu natudia do oi hegaegaelaia idia bapatiso totona? Edena nega ai do idia hegeregere idia bapatiso totona?

Iesu ena murina idia raka taudia ia oda heniadia: “Bese ibounai taudia be hahediba taudia ai umui halaoa, idia do umui bapatisoa.” (Mat. 28:19) Unai dainai bapatiso ena anina badana be hahediba tuadia haloua​—ta be Keriso ena hadibaia herevadia ia abidadama henia sibona lasi to ia badinaia namonamo. Inai be ia auka lasi maragidia idia karaia totona.

Haheitalai namona emu natudia dekenai umui hahedinaraia, bona Iehova ena hereva umui hadibaia idia dekenai. (De. 6:6-9) Bona inai buka rua Mauri Moalelaia Hanaihanai! (1 Pet. 3:15) Umui gaukaralaia Baibel ena hereva momokani idia dibaia totona bona umui hadibaia edena dala ai Baibel ena hakaua herevadia do idia gwauraia hedinara bona badinaia diba. Diba bona hagodaia herevadia idia abia oi dekenai bona edia pesonol stadi, ruma bese tomadiho, kongrigeisen heboudia, bona hebamo namodia amo ese do idia durudia idia goada bapatiso idia abia totona bona nega vairana ai do idia gini goada bida. Idia oi durua edia hetura karana Iehova ida idia hagoadaia bona ia kahirakahira idia lao diba.

Aonega Herevadia 20:11 ia gwau: “Natuna ena kara ese ia hahedinaraia, bema iena kara be goeva bona maoro.” Dahaka kara ma haida ese ia hahedinarai inai mero eiava kekeni be ia hegeregere Iesu Keriso ena hahediba tauna ta ai ia lao bona bapatiso ia abia totona?

Natu ta ia gaukara goada noho bapatiso ia abia totona, namona be ena tama sina ia kamonai henia. (Kara 5:29; Kol. 3:20) Iesu ena mauri lagani be 12 neganai, Baibel ia gwau: “[Ena tama sina] ia kamonai henia noho.” (Luka 2:51) Momokani, emui natuna be goevadae lasi. To bema ta ia ura bapatiso ia abia do ia gaukara goada Iesu ena haheitalai ia totohoa, bona do ia hahedinaraia ena tama sina ia kamonai henidia.

Danu do ia hahedinaraia ia ura dikadika Baibel amo hereva momokani ia dibaia totona. (Luka 2:46) Emui natuna ia ura bada heboudia dekenai ia lau bona haere ia henia danu, a? (Sal. 122:1) Ia ura dikadika nega ibounai Baibel ia duahia bona pesenol stadi ia karaia diba, a?​—Mat. 4:4.

Natu ta be bapatiso ia ura abia do ia gaukara goada Dirava ena Basileia ia atoa guna. (Mat. 6:33) Ia diba ena abidadama ia gwauraia hedinarai haida dekenai be iena maduna. Ia be dala idauidau ai haroro gaukara ia karaia bona ia hemarai lasi ena tisa bona ena sikuli turadia dekenai ia hahedinarai ia be Iehova ena Witnes tauna ta. Haroro bona Mauri Dalana hebouna dekenai iena asainmen ia laloa bada.

Danu do ia gaukara goada kara goevana ai ia noho bona unai ia karaia totona hebamo dikadia ia dadaraia be namo. (Aon. 13:20; 1 Kor. 15:33) Unai do ia hahedinaraia ena lalohadai miusiki, muvi, TV program, vidio gadara bona intanet gaukaralaia dalana dekenai.

Tama sina edia hekwarahi dainai natu momo be hereva momokani idia abia dae bona idia matamata neganai idia bapatiso. Iehova ese umui do ia hanamoa badina edia hetura karana Iehova ida lalonai, umui durudia noho unai mai anina bada tahua gauna idia hagugurua totona.

Hereva ta Bapatiso Lasi Pablisa Dekenai:

Kongrigeisen lalonai bapatiso lasi pablisa ta ai oi lao be hahenamo ta. Emu hesiai oi habadaia dainai oi ai hanamoa. Dirava ena Hereva stadilaia karana amo ia oi dibaia namonamo, bona iena gwauhamata oi abidadama henia.​—Ioa. 17:3; Heb. 11:6.

Iehova ena Witnes taudia ida Baibel oi do stadilaia lasi neganai, reana tomadiho orea idauna ta oi badinaia, eiava tomadiho orea ta oi bamoa lasi. Reana Baibel ena hakaua herevadia idia utua karadia ma haida oi karaia danu. To, hari emu abidadama oi hahedinaraia bona oi helalo-kerehai, anina be guna oi karaia kara dikadia dainai oi lalohisihisi, bona emu kara oi haidaua, anina be guna oi badinaia dala kererena oi rakatania bona emu lalona oi hadaia Dirava ena matanai kara maoromaoro do oi karaia.​—Kara 3:19.

To, reana Timoteo bamona, “oi beibi negana amo” toretore helagadia oi diba. Bona unai ese oi ia gimaia keristani lasi karadia bona kara dika badadia oi karaia lasi totona. (2 Tim. 3:15) Emu turadia edia laloani karadia bona Iehova vairanai kara dikadia ma haida oi dadaraia dibaia. Mai abidadama ida tomadiho momokani totona oi gini goada bona ma haida dekenai emu abidadama oi gwauraia hedinarai noho. Keristani haroro gaukara dekenai treinini oi abia. Hari abia hidi io karaia bapatiso lasi pablisa ai oi lao, bona Iehova oi hesiai heni totona.

Herevana, oi maragi negana amo Iehova oi diba eiava oi bada negana ai iena dala oi dibaia to reana hari lauma dalanai oi goada oi lao neganai inai dala rua oi lalohadailaia​—gwauhamata bona bapatiso. Guriguri amo Iehova oi gwauhamata henia bona oi hamaoroa oi ura ia sibona do oi tomadiho henia ela bona hanaihanai. (Mat. 16:24) Unai gwauhamata hamomokania totona, ranu lalonai bapatiso oi abia. (Mat. 28:19, 20) Gwauhamata bona bapatiso amo, oi hahedinaraia oi be Iehova Dirava ena hesiai tauna ta ai oi lao. Unai be hahenamo namona ta!

Emu Baibel stadi ese ia hahedinaraia, unai dala oi badinaia dainai metau idauidau do oi davaria. Laloatao, Iesu ia bapatiso bena daudau lasi murinai, “Taunimanima momo lasi gabuna ai Dirava ena lauma helaga ese Iesu ia hakaua, bona unuseniai Diabolo ese ia dibagania.” (Mat. 4:1) Oi be Keriso ena hahediba tauna ta dainai bapatiso oi abia murinai, hahetoho ma haida do oi davaria. (Ioa. 15:20) Idia be dala idauidau ai do idia mai. Reana emu ruma bese ese oi do idia dagedage henia. (Mat. 10:36) Eiava emu sikuli turadia, gaukara turadia bona tura gunadia ese oi do idia kirikirilaia. Nega ibounai Iesu ena hereva Mareko 10:29, 30 dekenai oi laloatao: “Umui lau hamaoroa momokani, egu ladana bona sivarai namona dainai edia ruma, tadikaka, taihu, sinana, tamana, natudia, bona tano idia rakatania taudia be hari inai negai unai gaudia be nega 100 amo do idia abia, ruma, tadikaka, taihu, sinana, natudia bona tano. Bona dagedage danu do idia davaria. Bona do ia mai nega oromana ai mauri hanaihanai do idia abia.” Unai dainai, namona be oi gaukara goada Iehova kahirakahira oi noho bona iena kara maoromaoro taravatudia oi badinaia noho totona.

Oi ura bapatiso oi abia totona, namona be elda oreana ena kodineita oi hadibaia. Inai hereva henunai idia noho henanadai be elda taudia ese oi ida do idia herevalaia, unai amo do idia diba bema oi hegeregere oi bapatiso eiava lasi. Emu pesenol stadi oi karaia neganai, oi sibona ese unai henanadai oi riviu matamaia be namo.

Unai riviu totona oi hegaegae neganai, namona be nega oi atoa idia torea hanai siridia oi duahia bona laloa dobu be namo. Bema oi ura inai buka eiava pepa ma ta dekenai emu nouti ma haida oi torea. Elda taudia ida oi herevahereva neganai, inai buka oi kehoa bona oi torea nouti oi gaukaralaia diba. Bema henanadai ma haida oi lalopararalaia lasi, namona be oi ia stadi henia tauna eiava elda taudia edia heduru oi noia.

Elda taudia ida oi riviu neganai, namona lasi henanadai edia haere be lata eiava haere aukadia oi henia diba. Namona be sibona emu herevahereva dalanai, haere kwadogina oi henia be diba. Idia noho henanadai momo oi haerelaia totona, namona be Baibel ena siri ta eiava rua oi gwauraia, unai amo do oi hamomokania emu haere be Baibel amo oi abia.

Bema Baibel ena hahediba hereva badadia oi lalopararalaia namonamo lasi, elda taudia ese dala do idia karaia heduru oi abia totona, unai amo sibona emu herevahereva dalanai Baibel siridia edia anina maorodia oi gwauraia hedinarai diba bona gabeai do oi hegeregere bapatiso oi abia totona.

[Hereva ta kongrigeisen ena elda taudia dekenai: Bapatiso idia abia gwauraia taudia ida umui herevahereva totona, hadibaia herevadia be rau 208-212 dekenai idia noho.]