Sivarai Namona Harorolaia—mai Guriguri Karana Danu
1 Paulo be Filipi taudia ia tore henia hagoadaia herevana be inai: “Keriso ese lau ia hasiahua, vadaeni gau ibounai lau goadalaia diba.” (Fil. 4:13) Gari lasi dekenai sivarai namona ita harorolaia totona, gau badana be Iehova dekenai ita tabekau goada ita abia totona. Edena bamona unai ita karaia diba?
2 Iesu ia gwau gau badana be “nega ibounai do [ita] guriguri.” (Luka 18:1) Paulo ia gwau, “Nega ibounai do umui guriguri.” (1 Tes. 5:17) Oibe, guriguri dekena amo goada ita abia diba. Namona be mai guriguri karana danu sivarai namona do ita harorolaia. Ita guriguri diba dala ia kehoa ma haida do ita haroro henidia totona, ruma ta ruma ta gaukara dekenai aonega bona lalo-parara ita abia totona, bona ita gwauraia sivarai namona be iseda Bible stadi taudia edia kudouna dekenai do ia diho totona. Dokona negana ia do ginidae lasi neganai, gau badana be Basileia ena sivarai namona ita harorolaia, unai dainai namona be ita guriguri tanobada ibounai dekenai Basileia ena gaukara do ia bada ia lao totona. (Mat. 24:14) Namona be guriguri karana dekenai ‘ita gima’ noho, badina unai neganai lauma dalanai do ita hesiku lasi, bona ma haida dekenai Dirava ena ura do ita harorolaia gaukarana do ita laloa bada.—Kol. 4:2.
BIBLE STADI KARAIA NEGANAI
3 Dahaka dainai guriguri be gau badana Bible stadi ita karaia neganai? Bible stadi be guriguri amo ita hamatamaia neganai, iseda lalona ia hegaegaelaia hereva ita laloa namonamo totona, bona unai amo stadi tauna ia diba stadi ena hereva be mai anina bada. Do ia diba Iehova dekenai ia guriguri be gau badana hakaua herevana ia tahua totona. Danu iseda guriguri karana amo stadi tauna be guriguri dalana do ia diba.—Luka 11:1.
4 Bible stadi dekenai ita guriguri neganai, dahaka gaudia totona do ita guriguri diba? Iesu ena guriguri bona Paulo be Filipi taudia totona ena guriguri be haheitalai namodia. (Mat. 6:9-13; Fil. 1:9-11) Iseda guriguri do idia lata lasi, to namona be ita dekenai idia vara gaudia ita herevalaia. Iehova ena gaukara namodia dainai hanamoa herevadia ita gwauraia be gau badana. Iena siahu bada, iena hairai, bona iena kara goevagoeva karadia dainai ita hanamoa. (Sal. 145:3-5) Guriguri neganai, namona be Bible stadi tauna ena ladana bona reana iena noho be edena bamona do ita gwauraia, bona ita noinoi lauma dalanai do ia goada ia lao totona. Stadi tauna ia goada ia lao neganai, hebou dekenai ia mai bona hereva momokani be taunimanima haida dekenai ia gwauraia neganai, guriguri amo Iehova ita noia stadi tauna ia hanamoa iena hekwarahi dainai. Danu, namona be Iehova ita noia tanobada ibounai dekenai haroro gaukara ia hanamoa ia bada ia lao noho totona.
ISEDA TADIKAKA BONA TAIHU TOTONA
5 Iehova ena taunimanima iboudiai be gaukara hebou taudia. (1 Kor. 3:9) Unai dainai, tanobada biagudia ese sivarai namona harorolaia gaukarana idia koua toho neganai, ita guriguri diba “king taudia bona lohia taudia ibounai totona.” Dahaka dainai? “Unai dekena amo, Dirava ita badinaia bona matauraia dainai, mai maino danu do ita noho namonamo” totona. (1 Tim. 2:1, 2) Unai bamona guriguri be iseda tadikaka tanobada ibounai dekenai ia durudia diba. Guriguri dekenai ita noinoi tanobada lohia taudia be iseda gaukara do idia lalo-namo henia totona.
6 Bema iseda tadikaka haida idia dagedage henidia idia haroro neganai, eiava haida be lauma dalanai idia gorere, ita be guriguri dekena amo Dirava ita noia diba idia ia hagoadaia totona bona edia haroro gaukara idia habadaia totona. (2 Tes. 3:1, 2) Danu, namona be kongregesen elda taudia, loaloa naria taudia, bona Hakaua Oreana taudia totona do ita guriguri, badina idia iboudiai be ita “idia hadibaia noho taudia.”—1 Tes. 5:12.
7 Nega ibounai iseda lalo-hekwarahi be Iehova dekenai ita gwauraia be namo. (Sal. 55:22; 1 Pet. 5:7) Ita ia hadibaia bema gau ta be iena ura hegeregerena ita noia neganai, ia ese ita dekenai do ia kamonai. (1 Ioane 5:14) Unai dainai, iseda haroro gaukara ita karaia namonamo totona guriguri dekena amo Iehova ena heduru ita tahua neganai, ita diba iseda guriguri do ia kamonai henia bona ia ese dala do ia kehoa iseda gaukara do ita hagugurua totona.—2 Tim. 4:5.
[Questions]
1, 2. (a) Kolose 4:2 oi duahia. Dahaka dainai guriguri karana dekenai ‘ita gima’ noho be gau badana? (b) Guriguri ena namo be dahaka? (c) Edena negai ita guriguri be namo?
3, 4. (a) Luka 11:1 oi duahia. Bible stadi idia karaia taudia be dahaka idia laloa be gau badana? (b) Bible stadi dekenai iseda guriguri karana amo, stadi tauna be edena bamona do ita hagoadaia diba bona edena bamona do ita gwauraia be namo?
5, 6. (a) Timoteo Ginigunana 2:1, 2 oi duahia. Edena negai bona dahaka dainai do ita guriguri “king taudia bona lohia taudia ibounai totona”? (b) Edena bamona do ita guriguri diba iseda tadikaka durudia totona Bougainville dekenai? Brooklyn dekenai? Kongregesen dekenai?
7. Inai Bible siri: Salamo 55:22, 1 Petero 5:7, bona 1 Ioane 5:14 dekena amo dahaka ita diba?