Oi Hesiku Lasi
1 Lagani 1991 Yearbook dekenai idia torea sivaraidia ese idia hahedinaraia tanobada ibounai dekenai gaukara ia bada ia lao, bona unai be moale gauna momokani. Tano idauidau momo dekenai pablisa taudia edia namba ia bada ia lao.
2 To oiemu teritori be edena bamona? Oi haroro neganai taunimanima idia ura lasi idia kamonai, a? Basileia ena sivarai idia laloa bada lasi, a? Taunimanima momo be edia ruma dekenai oi davaridia lasi, a? Kamonai taudia momo oi davaridia lasi, a? Bema unai bamona, reana Paulo ena sisiba Galatia 6:9 dekenai ese oi do ia hagoadaia, ia gwau: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.” Unai kara namona ta be ruma ta ruma ta dekenai Basileia ena sivarai namona ita harorolaia. Gau badana be mai iseda goada ibounai ida unai haroro gaukara ita karaia noho ela bona Iehova ia gwau gaukara ia ore vadaeni. (Isa. 6:8) Ena be iseda teritori dekenai reana taunimanima momo idia ura lasi kamonai, to mamoe bamona taudia tamona tamona ita do davaria noho.
3 Dahaka ita karaia diba gaukara do ita hesikulaia lasi totona? Taunimanima ita hereva henidia hamatamaia neganai dahaka ita gwau? Idia ita hedavari heheni neganai iseda moale toana amo ita hahedinaraia ita lalo-namo henidia, a? Idia hereva neganai oi kamonai namonamo bona emu hereva oi haidaua idia danu umui kiki hebou totona, a? Henanadai henia karana amo idia oi hagoadaia edia lalohadai do idia gwauraia hedinarai totona, a?
4 Hamatamaia hereva idauidau ita gaukaralaia diba, a? Hegeregere, inai ta oi gaukaralaia vadaeni, eiava? “Iseda dekena taudia dekenai gavamani namona ena sivarai ai kikilaia. Kahirakahira taunimanima iboudiai be gavamani namona idia ura henia, idia ura gavamani ese dala ia kehoa taunimanima ibounai be moni gaukara bona ruma namona idia abia totona. Oi laloa edena gavamani ese unai bamona kara ia havaraia diba?”—Mat. 6:10; Isa. 65:21-23. Hamatamaia hereva ma ta be inai: “Kahirakahira taunimanima iboudiai idia ura tanobada ibounai dekenai maino do ia vara. Tanobada ena gavamani idia biagua taudia momo idia gwau maino idia ura henia. Vadaeni, dahaka dainai maino idia do abia lasi?—Apok. 12:7-12; Mat. 6:10.
5 Bema pura iboudiai Basileia ena haroro gaukara ita karaia, unai ese ita ta ta ibounai do ia hamoalea bona ita ia hagoadaia. Danu, lauma dalanai do ita goada noho dalana be inai: Dirava ena Hereva ita stadilaia hanaihanai; nega ibounai kongregesen heboudia dekenai ita lao bona hebou ena gaukara ita karaia.—Heb. 10:23-25.
MA HAIDA HAGOADAIA IDIA GOADA NOHO TOTONA
6 Bema haroro gaukara dekenai ma haida oi bamodia, unai ese oi ia durua bona oi bamodia taudia ia hagoadaia. (Gal. 6:10) Namona be pioneer taudia bona elda taudia oi noidia idia danu umui gaukara hebou totona, ani? Danu, hua iboudiai idia haroro lasi taudia eiava haroro idia rakatania taudia reana do idia moale bema oi durudia lauma dalanai idia goada totona.
7 Inai hekwakwanai momo negana lalonai, ita ibounai be Iehova ena hesiai gaukara mai haheauka danu ita karaia noho bona ita hesikulaia lasi be gau badana. Bema unai gaukara do ita haheaukalaia noho, ena be hekwakwanai do idia vara eiava taunimanima ese ita gwauraia sivaraina idia laloa bada lasi, to iseda Keristen gaukara do ita goadalaia diba. (Heb. 10:36-39) Iehova oi guriguri henia goada oi abia totona. (Isa. 40:29-31) Oi noia oi ia durua oi haheauka totona, bona oi laloa goada noho. Laloaboio lasi, ita be Iehova ena gaukara ita karaia. Iena hesiai gaukara ita karaia neganai ita ia itaia, bona iseda gaukara do ia laloaboio lasi. (Heb. 6:10) Unai dainai haroro gaukara do ita hesikulaia lasi! To, “nega ibounai Lohiabada ena gaukara do [ita] karaia goadagoada”, bona Iehova ena heduru ita tahua iena ‘gaukara namona’ do ita goadalaia totona.—1 Kor. 15:58; Gal. 6:9.