Ane amo Iehova Hanamoa
1 Namona be emui ane bukana umui kehoa ena rau dokonai. Dahaka umui itaia? Iehova ena dubu dekenai Levi taudia ese ane idia abia, edia ududia idia kehoa, bona mai goada danu ane idia abia. Iehova ena dubu badana dekenai ane abia karana be tomadiho korikori ena kahana badana ta. Pavapava David ena nega lalonai, dubu badana dekenai hesiai gaukara idia karaia taudia 100 100 amo 10 10 bona ma haida edia gaukara maduna be mai miusik danu Iehova idia hanamoa. Bona unai taudia amo 288 idia hadibaia ane abia dala idia diba totona, idia iboudiai “idia diba momo.” Edia ane abia gaukarana idia laloa bada.—1 Sis. 23:3, 5; 25:7.
2 Keristen taudia ginigunadia edia nega lalonai, ita diba Iesu bona ena aposetolo taudia be Lohiabada ena Adorahi Anianina ena hebou hadokoa totona, ane idia abia. (Mar. 14:26) Bona nega momo aposetolo Paulo ese ita ia hamaoroa iseda Dirava dekenai ane ita abia ia ita hanamoa totona. Kolose 3:16 dekenai, ia gwau: “Keriso ena hereva umui emui lalona dekenai ia noho momokani be namo. Inai hereva dekena amo umui ese ekalesia varavara ibounai do umui hadibaia, bona iena aonega dekena amo edia laloa do umui hamaoromaoroa. Salamo bona guriguri ane, bona lauma anedia do umui abia, Dirava do umui hanamoa totona.”—Efeso 5:19, 20 itaia danu.
3 Basileia ena ane ita anelaidia be dala namona ta Iehova ita hanamoa totona. Unai dainai, namona be iseda kudouna ibounai ida ane ita abia, ani? Unai bamona ita karaia neganai Iehova ita hanamoa. Ia dekenai ane ita anelaia neganai, ita ia kamonai henia, iseda guriguri ia kamonai henia hegeregerena. Ane ita abia badabada neganai, unai ese ma taunimanima haida ia hamoalea bona ita danu ia hamoalea.
4 Namona be ane ena hereva namodia ita lalodia. Unai hereva ese ita idia durua “ekalesia varavara ibounai do [ita] hadibaia, bona iena aonega dekena amo edia laloa do [ita] hamaoromaoroa” totona. Iseda ane dekenai sisiba namodia idia noho! Unai sisiba herevana ita laloa bada neganai, unai ese ita ia durua lauma ena huahua ita habadaia totona, bena unai neganai idia momo ita hahedinaraia diba bona tauanina ena ura bona tanobada ena siahu ita dadaraidia diba. ‘Iseda kudouna amo ane ita abia’ neganai, ita ia hagoadaia gari lasi dekenai bona mai moale danu Iehova ena hesiai gaukara ita karaia totona.
5 Hebou dekenai ane idia goadalaia totona, namona be seamani ese ane ena namba sibona do ia gwauraia lasi, to ena hereva badana eiava hereva kwarana do ia gwauraia danu. Nega ta ta ai, ane be edena Bible siri amo bona ena anina be dahaka hebou ena hereva dekenai do ia kikilaia sisina danu.
6 Kingdom Melodies kaset bona piano miusik kaset dekenai idia noho anedia be heduru namodia iseda ruma bese taudia be ane do idia diba namonamo totona. Unai kaset ita gadaralaidia neganai, ita idia hamoalea bona iseda ane ibounai do ita diba namonamo.
7 Hanaihanai Bible ese ita ia hamaoroa iseda maduna be iseda lalokau guba Tamana be ane amo ita hanamoa. Namona be mai iseda kudouna ibounai danu unai bamona do ita karaia. Unai be haheitalai namona matamata tauna be ita huanai ia vareai neganai. Oibe, namona be Iehova dekenai ane mai miusik danu ita abia, idau negai tauna David ia karaia bamona.—Sal. 108:1-3.