April be Hua Namona Heduru Pioneer Karaia Totona!
1 April ena hua be nega namona heduru pioneer gaukara do ita karaia totona, ena badina namodia haida be inai: April ena pura vairanai Memorial hebouna do ita hahelagaia Saturday, March 30, 1991 dekenai. Danu pablik tok badana be Sunday, April 7, 1991 dekenai do idia henia. Ena hereva kwarana be: “Mesia ena Noho bona ena Lohia Dalana.”
2 Reana, tanobada ibounai dekenai, kamonai matamata taudia momo be nega ginigunana Memorial hebouna bona pablik tok badana dekenai do idia mai. Idia momo be heduru idia ura abia! Bema unai hua dekenai oi ese heduru pioneer gaukara oi karaia, oi be mai emu nega taunimanima oi durudia bada totona.
3 Hesiai Gaukara Karaia Totona Ita Hegaegae bukana ena rau 113 dekenai, ia gwau: “Herevana edena bamona oi noho, to [1] bema oi bapatiso vadaeni, [2] kara mirodia oi karaia lasi, [3] oi be mai emu dala hua tamona lalonai hora 60 haroro gaukara oi karaia, bema oi laloa heduru pioneer gaukara hua tamona eiava hua haida lalodiai oi karaia diba, vadaeni kongregesen ena elda taudia ese oiemu aplikesen pepana, unai hesiai gaukara namona karaia totona, do idia laloa namonamo mai edia moale danu.” Oi be mai emu dala unai gaukara namona do oi karaia totona, a?
4 Oi gwau lasi pioneer gaukara oi karaia diba lasi. Buruka bona matamata taudia—haida edia tauanina idia goada bona ma haida idia gorere, to mai moale danu idia iboudiai be heduru pioneer gaukara idia karaia vadaeni. Ena be unai gaukara idia karaia totona idia ese kara haida idia reaia bona do idia gaukara bada, to unai gaukara idia moalelaia bada badina hahenamo momo idia davaria dainai.—Luka 13:24; 1 Kor. 9:16.
5 Emu gaukara ibounai karaia totona, bona dina ta ta iboudiai dekenai haroro gaukara lalonai hora rua do oi gaukara totona, namona be sediual oi torea. Laloaboio lasi, Iehova dekenai oi guriguri emu gaukara ia heau namo totona. Danu taunimanima ma haida oi hagoadaia oi danu do idia gaukara totona. Bema unai bamona oi hegaegae namonamo, haroro horadia 60 do oi davaria diba.
NAMO BADA OI DAVARIA DIBA
6 Nega ginigunana heduru pioneer gaukara idia karaia taudia kahirakahira iboudiai be, mai moale danu idia gwau edia haroro gaukara idia habadaia neganai, namo bada idia davaria. Haida idia gwau Iehova kahirakahira dekenai ia veridia, edia moale haroro gaukara dekenai ia habadaia, heduru ia henia gari lasi dekenai idia haroro totona, bona idia goada ekspiriens namodia idia abia dainai. Idia gwau bema heduru pioneer gaukara idia karaia lasi reana unai namo bada do idia davaria lasi.
7 Taihu ta ena natudia be 5, bona ia ese moni gaukara ia karaia, ena be ena adavana be bapatiso ia do abia lasi, to ia ese heduru pioneer gaukara ia karaia. Dahaka hahenamo ia abia? Ena tau ese ia durua, bona taihu ena haheitalai namona dainai, murina hua lalonai ena tau ese goada ia abia haroro gaukara ia hamatamaia totona.
8 Ma taihu ta ese heduru pioneer gaukara ia ura karaia totona ena gaukara biaguna ia noia nega ia henia totona, ia gwau oibe dainai ia ese pioneer aplikesen pepana ia sainia, to murinai ena gaukara biaguna ia gwau nega do ia henia lasi. Iena biaguna ia hamaoroa unai nega ia abia diba bema ia gwau ia gorere, haida idia karaia bamona, to unai bamona ia ura lasi karaia badina unai be koikoi karana. Biaguna ese ena hereva ia kamonai neganai, nega ia henia. Pioneer gaukara ia hamatamaia ena dina haida murinai unai ese ia durua ena abidadama karana Iehova dekenai ia habadaia totona. Ia gwau: “Hari, lau be moni lau laloa bada lasi, guna lau laloa bamona. Iehova ese lau ia hadibaia ia dekenai lau abidadama totona.”
9 Inai oi laloa namonamo: ‘Tadikaka bona taihu tausen momo hegeregeredia, April lalonai heduru pioneer gaukara do lau karaia, a?’ Hari be nega namona heduru pioneer gaukara ena aplikesen pepana oi abia totona. Elda taudia be mai moale danu oiemu aplikesen pepana do idia laloa namonamo.
This article is unique to PNG.