Hebou be Nega Korikori Ai Idia Kehoa bona Koua
1 Kongregesen ena hebou iboudiai, haroro totona idia hebou danu, be nega korikori dekenai idia kehoa bona idia koua be namo. Dahaka dainai? Unai be heiriheiri lasi karana, bona hebou dekenai idia mai taudia matauraia karana. (Koh. 3:17b; 1 Kor. 14:33) Henunai ai torea hereva umui badinaia neganai umui ia durua hebou be nega korikori dekenai umui kehoa bona umui koua totona.
2 Namona be hebou dekenai ita ginidae haraga, badina unai neganai tadikaka bona taihu danu ita herevahereva diba, iseda maduna hebou dekenai ita karaia diba, bona hebou idia kehoa neganai ane ita abia bona guriguri ita kamonai henia diba. Ane bona guriguri karaia totona miniti 5 idia gwauraia. Namona be kongregesen hebou kehoa bona koua totona idia guriguri taudia be edia guriguri lalonai hebou ena hereva idia gwauraia. Unai guriguri be idia lata momokani lasi be namo.
3 PABLIK TOK: Pablik tok ena lata be miniti 45 sibona. Unai nega ia hanaia neganai, murinai idia karaia Gima Kohorona stadi ena nega do ia ania. Unai hebou rua mai edia ane bona guriguri danu be hora rua lalonai do idia haorea. Namona be pablik tok idia henia taudia be Society idia torea negana hegeregerena do idia haorea, bona idia torea lasi hereva haida, hegeregere hanamoa herevadia do idia gwauraia lasi. Bema pablik tok ia henia tauna be do ia lao henia Kingdom Hall ia diba lasi, namona be unai kongregesen gunalaia tauna do ia nanadaia dala ia gwauraia bona do ia heau lao negana ena lata do ia nanadaia danu.
4 GIMA KOHORONA STADI: Gima Kohorona stadi ena lata be hora tamona, paragraf iboudiai idia duahidia bona stadi dokonai riviu ena henanadai idia gwauraia. Stadi naria tauna ena hamatamaia herevana ese helai taudia edia lalona ia veria stadi herevana idia laloa totona. Stadi lalonai naria tauna do ia hereva momo lasi. Naria tauna ese nega ia haria namonamo paragraf iboudiai edia nega ia hegeregere totona, namo lasi nega bada stadi ena paragraf ginigunadia dekenai ia haorea bona paragraf ginigabedia dekenai nega be ia hegeregere lasi.
5 HARORO SCHOOL: Unai hebou ena lata be miniti 45. “Hereva Namba 1” bona “Bible ena Karoa Edia Hereva Badadia” idia henia taudia edia hereva idia utua lasi bema nega idia hanaia, to namona be edia nega idia hanaia lasi. Bema edia nega idia hanaia, hunia dalana amo sisiba do idia henia. Danu, school naria tauna ese sisiba bona hanamoa herevadia ia henia neganai, nega do ia hanaia lasi. Bema hereva do idia henia taudia be platfom kahirakahira dekenai idia helai hegaegae neganai, bona nega korikori dekenai edia hereva idia hadokoa, nega do ia ore kava lasi.—Haroro School Ena Buka itaia.
6 HESIAI HEBOU: Unai hebou ena lata be miniti 45 danu. Hesiai Hebou bona Haroro School mai edia ane bona guriguri danu, ena lata be hora tamona bona miniti 45. Hesiai Hebou dekenai hereva idia henia taudia be edia nega idia hanaia lasi be namo. Bema hereva ta be henanadai bona haere do idia karaia, hamatamaia hereva kwadogina sibona karaia. Haheitalai do idia hegaegaelaidia namonamo, bona karaia taudia be idia gini hegaegae neganai nega do idia haorea kava lasi.
7 KONGREGESEN BUKA STADI: Unai hebou ena lata be hora tamona, kehoa bona koua gurigurina be unai hora tamona lalonai. Paragraf iboudiai do idia duahidia. Nega korikori dekenai hebou do idia hadokoa totona, stadi naria tauna ese paragraf iboudiai edia nega do ia haria namonamo, namo lasi nega ia haorea dainai paragraf ginigabedia ia karaia haraga eiava stadi ia ore haraga. Stadi naria tauna be ia hegaegae paragraf iboudiai idia kikilaia namonamo totona. Hereva badadia idia hedinarai goevagoeva be namo. Stadi naria tauna ese idia ia hadibaia namonamo neganai, unai do ia karaia diba.—Tito 1:9.
8 HARORO TOTONA IDIA HEBOU: Unai hebou edia nega ena lata be miniti 10 eiava 15 sibona. Edena bamona haroro idia karaia dalana idia gwauraia bona idia ta ia guriguri unai nega lalonai danu. Idia haroro gwauraia taudia idia ura edia haroro gaukara idia hamatamaia haraga. Unai hebou ia naria tauna be nega korikori dekenai hebou do ia kehoa, ia naria lasi ela bona taunimanima ma haida idia mai. Edeseniai do idia haroro idia diba bona ta ia guriguri murinai, grup taudia be kara haraga teritori dekenai idia lao diba. Unai be gau badana bema pioneer taudia idia noho.
9 Hebou be nega korikori dekenai idia kehoa bona idia koua be gau namona ita ibounai dekenai. Haida edia adavana be Witness lasi taudia bona idia ura edia adavana be nega korikori dekenai ruma dekenai idia ginidae. Ruma bese lalonai tomadiho be rua neganai, Witness taudia be ruma idia rakatania bona hebou amo idia giroa mai ena nega idia gwauraia, bona namona be nega idia atoa hebou vairanai bona murinai tadikaka bona taihu idia bamoa sisina totona, bona buka bona magasin idia abia totona. Momokani, hebou be nega korikori dekenai idia kehoa bona idia koua be gau badana, badina unai neganai “gaukara ibounai [ita] karaia namonamo, mai dala maorona.”—1 Kor. 14:40.
[Questions]
1. (a) Hebou be nega korikori dekenai ita kehoa bona ita koua totona, Kohelete 3:17b; bona 1 Korinto 14:33 ena sisiba be dahaka? (b) Nega korikori dekenai hebou idia kehoa bona idia koua ena badina namodia haida be dahaka?
2. (a) Dahaka dainai hebou dekenai ita ginidae haraga be ia namo? (b) Hebou kehoa bona koua guriguri idia karaia tadikaka ese dahaka idia laloatao be namo?
3. Pablik Tok bona Gima Kohorona stadi edia lata be hida? Dahaka dainai Pablik Tok ena lata be miniti 45 sibona?
4. Gima Kohorona stadi ena nega be hora tamona. Unai hora tamona lalonai dahaka idia karaia?
5, 6. Haroro School bona Hesiai Hebou be nega korikori dekenai do idia haoredia totona, hereva idia henia taudia be dahaka idia laloatao be namo?
7. Stadi naria tauna be dahaka do ia karaia Buka Stadi be ia kwadogi lasi bona nega ia hanaia lasi—to nega korikori dekenai ia haorea totona?
8. (a) Haroro totona idia hebou neganai unai nega ena lata be edena bamona? (b) Dahaka dainai unai nega hegeregerena do idia karaia be namo?
9. (a) Bema hebou dekenai idia lao tadikaka eiava taihu edia ruma bese lalonai tomadiho be rua, idia dekenai dahaka sisiba be namo? (b) Dahaka ese ita ia durua “gaukara ibounai [ita] karaia namonamo, mai dala maorona” totona?