July! Gabu Daudau Teritori—Hegaegae Namonamo
1 Gabu daudau ena teritori dekenai ita haroro namonamo totona, gau badana be ita hegaegae namonamo guna. Elda taudia, pablisa taudia bona mai edia motuka taudia idia hegaegae be gau badana. Hegeregere, iboudiai idia ura diba edeseniai do idia haroro. Nega haida blakbod dekenai mapu idia torea be heduru namona. Bema dala idauidau haida dekenai do idia gaukara, namona be idia diba unai dala dekenai ruma hida idia noho. Idia naria ela bona idia ginidae be namo lasi. Bema pablisa bona gaukara gunalaia taudia idia hegaegae namonamo neganai, gabu daudau ena teritori dekenai nega idia haorea kava lasi, to haroro gaukara idia karaia namonamo diba.
2 Ita haida be gabu daudau ai ita haroro totona, aena dekenai ita raka o ororo dekenai ita daekau, o sinavai ita rakaia hanai, bena taunimanima edia ruma dekenai ita ginidae neganai ruma tauna be lasi eiava ia ura lasi ia kamonai. Bema iseda teritori be unai bamona, namona be ita boga-auka bona lalokau korikorina ita hahedinaraia, badina unai gabu dekenai idia noho taudia edia mauri ita laloa bada dainai. Momokani, Iehova ese iseda hekwarahi dainai hahenamo do ia henia ita dekenai.—1 Kor. 15:58.
3 Ita haida be motuka amo gabu daudau ena teritori dekenai do ita lao. Motuka biaguna ese ena motuka ia sekea vadaeni, ia heau namonamo, a? Motuka ena uili, bateri bona bereiki idia namo, a? Namona be ita lao gwauraia ena dina vairanai unai gaudia ibounai ita sekedia namonamo, bena dina korikori dekenai ita heau diba. Motuka taria taudia e, namona be umui laloaboio lasi, Iehova dekenai tadikaka bona taihu edia mauri be gau badana, unai dainai emui motuka umui sekea namonamo bona umui taria namonamo.
PABLISA IDIA HEGAEGAE
4 Pablisa iboudiai be idia hegaegae guna be namo. Emui buka bona magasin idia hegeregere, a? Pepapepa idauidau umui abia hegaegae taunimanima lasi rumadia dekenai umui rakatanidia totona, a? Dala dekenai taunimanima idia raka lao neganai, mai hemataurai danu oi hereva henidia, a? Nega momo dala dekenai idia raka taudia be edia ruma dekenai ita davaridia lasi taudia. Bema tadikaka ta ena motuka dekenai do oi gui, oi hegaegae moni sisina do oi henia bensini do ia hoia totona, a? Unai bamona do ita karaia be namo. To bema oi hegeregere lasi momokani moni do oi henia, mani oi hamaoroa, bena reana oi do ia bogaia hisi.
5 Gabu daudau ena teritori gaukaralaia namonamo be mai ena hekwarahi, to reana namona be iseda ura haida ita dadaraia ita karaia totona. To, iseda hekwarahi dainai hahenamo momo do ita davaria. Ai ura Iehova ese emui hekwarahi do ia hanamoa noho, gabu daudau dekenai ‘Dirava ena Basileia do umui harorolaia’ neganai.—Luka 9:60.
[Questions]
1. Dahaka dainai hegaegae guna be gau badana? Hegaegae totona namona be dahaka gaudia ita laloa guna be namo?
2. Dahaka ese ita ia durua gabu daudau ena teritori dekenai iseda hekwarahi ita haheaukalaia totona?
3. Motuka taria taudia iboudiai be dahaka idia karaia be gau badana?
4. Pablisa ta ta iboudiai be dahaka do idia karaia idia hegaegae totona? Unai be nega namona pablisa lasi tauna ita hakaua lao gabu ia raraia kava totona, a?
This article is unique to PNG.