Tama Sina Namodia Ai Ita Lao Dalana
1 Tama sina momo edia natudia idia tubu daekau neganai hekwakwanai haida idia davaria. Ena be hekwakwanai idia vara, to Iehova ena ladana ita dekenai ia noho dainai, ita tama sina dekenai maduna ia noho iseda natudia ita hadibadia namonamo edia abidadama Iehova bona iena ura dekenai idia goada totona. Unai neganai ita be tama bona sina namodia ai ita lao.
TAMA SINA NAMODIA BE DAHAKA DO IDIA KARAIA?
2 Tama sina namodia be edia natudia idia tubu daekau lalonai idia durudia namonamo badina idia ura taunimanima badadia ai idia lao neganai, edia maduna do idia huaia namonamo diba, Dirava idia tomadiho henia noho, bona edia dekena taudia idia lalokau henidia. (Mat. 22:37-39) To madi, natudia momo be idia bada neganai edia maduna idia huaia lasi. Dahaka dainai? Unai be edia tamana bona sinana edia kerere sibona, a?
3 Tama bona sina be edia natudia idia hatubudia, kapenta tauna ese ruma ia haginia hegeregerena. Idia ura edia natudia idia hadibadia kara namo karadia idia karaia totona. Bible ese ita ia hadibaia edena bamona unai do ita karaia totona. Ia gwau namona be “golo o siliva o nadi namo herea” ita gaukaralaidia, unai anina be natudia ita hadibadia abidadama goadana, Dirava ena aonega, lauma dalanai idia goada, Dirava dekenai idia kamonai, bona siahu herea Diravana bona ena taravatu do idia moalelaia totona.—1 Korinto 3:10-13 bona 1 Petero 1:6, 7 oi DUAHIDIA.
4 Natudia idia tubu idia lao neganai, edia maduna idia bada idia lao danu, unai ese ia durudia kara maoromaoro karadia idia manadalaidia totona. Gau badana be Bible, Dirava ena Hereva ia gwauraia dalana idia badinaia edia tamana bona sinana idia hadibadia hegeregerena. Natuna idia tubu bada vadaeni neganai, bema Dirava ena hereva ia kamonai lasi bona ia badinaia lasi, vadaeni, bema dika do ia vara unai be ia sibona ena kerere.—Deut. 32:5.
NATUDIA TA TA ENA KARA ENA KARA BAMONA ITA HADIBADIA
5 Natudia ta ta iboudiai edia kara be idauidau, unai dainai ta ta sibona sibona ena kara hegeregerena ai ita kara henidia be namo. Bible ese unai ia gwauraia. Tama o sina ese edia natuna ta idia laloa bada bona edia natuna ta idia laloa maragi garina, Bible ese inai heduru herevana ia gwauraia, ia gwau: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To iena kara tau ta ena kara danu ia hahegeregerea, unai tau do ia gwauraia kerere totona be namo lasi.”—Gal. 5:26; 6:4.
‘MARAGI NEGANA AMO’ HADIBADIA
6 Namona be tama bona sina ese Eunike ena kara idia tohotohoa. Ia ese ena natuna Timoteo ia hadibaia namonamo dainai, Bible lalonai iena kara ia gwauraia namo. Timoteo ia hadibaia ena “mero maragi neganai.”—2 Tim. 1:5; 3:15.
7 Oibe, tamana bona sinana idia huaia maduna be ia metau, to bema idia huaia namonamo namo do ia vara. Bema tamana bona sinana ese aposetolo Paulo bamona idia hereva diba do idia moale bada, ia gwau: “Bema lau kamonai, lauegu natuna ekalesia taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.”—3 Ioane 4.
[Questions]
1. Keristen tama bona sina edia maduna be dahaka?
2. Tama sina namodia be dahaka idia karaia?
3. Natudia dekenai dahaka kara ita hadibadia be gau badana?
4. Natuna ena maduna be dahaka?
5. Dahaka dainai natudia ta ta iboudiai be sibona sibona edia kara hegeregerena ai ita kara henidia be namo?
6. Natuna ia naria namonamo dainai Bible ese edena hahine ia gwauraia namo?
This article is unique to PNG.