September Ena Hesiai Hebou

September 2 ai Ia Matamaia Purana

Ane 115 (117)

(10 min) Kongregesen ena hadibaia herevadia.

(20 min) “Hadohado bona Dairia Gaukarana—Hahediba Taudia Karaia Dalana.” (Kahana 1) Hebou vairanai, ia duahiduahi diba namonamo tauna oi abia hidi paragraf ta ta ia duahia totona, bena ia duahia murinai helai taudia dekenai henanadai oi gwauraia.

(15 min) Daika ese Lau Ia Durua Diba? Lau Buruka, Lau Duahiduahi Sisina, bona Lau Ura Dirava Ena Sivarai Lau Diba! Elda ta ese inai haheitalai do ia hegaegaelaia. Hegaegae namonamo totona namona be nega momo idia hegaegaelaia.

HAHEITALAI: Tadikaka Tom ese tau buruka Tim ia lou henia, unai tau buruka ia ura sivarai ma haida ia kamonai Dirava ena sivarai ia diba totona.

Tim: Tom, lau mero maragi neganai lau sikuli lasi. Lau be gunika dekenai lau noho. Bona hari lau duahiduahi namonamo lasi bona egu matana idia dika sisina danu.

Tom: Tim, lau moale badina emu diba Dirava dekenai bona Bible dekenai oi ura habadaia dainai! To, lau laloa gau ta do oi karaia diba!

Tim: Tom, unai be dahaka?

Tom: Laulau oi itaia diba!

Tim: Oibe! Lau ura laulau lau itaia!

Tom: Vadaeni, inai laulau oi itaia. (Tom ese Mauri Hanaihanai buklet ena kopina dekenai ia noho laulauna ia hahedinaraia Tim ia itaia totona. Tom ese Tim do ia hamaoroa unai laulau do ia itaia namonamo, bena inai henanadai do ia henia: Badu taudia hida oi itaia? Gorere taudia hida oi itaia? Buruka taudia be hida?) Tim, inai laulau oi itaia neganai dahaka dainai oi moalelaia? (Tim ese laulau ia itaia namonamo.)

Tom: Tim, inai buklet kopina ena rau ataiai hereva haida idia torea. Namona be oi duahia toho. (Tim ia durua ia duahia totona.)

Tom: Tim, oi ese laulau oi itaia vadaeni bona unai hereva oi duahia namo herea. Namona be buklet ita kehoa laulau namba 1 dekenai. Laulau oi itaia bona ena hereva oi duahia. (Tim be unai bamona ia karaia totona Tom ia durua sisina.)

Tom: Tim, daika ese inai laulau dekenai idia noho gaudia iboudiai ia karaia?

Tim: Iehova Dirava ese ia karaia.

Tom: Unai sivarai Bible dekena amo ita duahia. Namona be Genese 1:1 ita itaia. (Tom ese Tim ia durua unai siri ia duahia totona.)

Tom: Unai siri oi duahia dalana be namo. Lau laloa hari iseda hereva ita hadokoa be namo.

Tim: Tanikiu bada lau oi durua dainai. Lau ura pura vairanai do oi giroa mai. Lau ura hereva ma haida Iehova dekenai do lau diba bona lau ura Bible ena hereva lau duahia.

Elda Tauna: (Inai haheitalai ia naria tauna) Ita itaia Tom ese hadohado gaukara ia karaia vadaeni bona ia hegaegae ‘dairia’ gaukarana do ia karaia totona. Ia be mai ena abidadama danu Iehova ida idia gaukara hebou bamona. Unai bamona stadi oi karaia be ia auka sisina. To, bema Tom bona Tim do idia stadi hebou noho, ita diba Iehova ese do ia ‘hatubua,’ bena gabeai Tim be Iehova ena witness tauna goadana ai do ia lao diba.

Ane 181 (37) bona guriguri.

September 9 ai Ia Matamaia Purana

Ane 86 (45)

(10 min) Kongregesen ena hadibaia herevadia.

(20 min) “Memero bona Kekeni Neganai Iehova Ena Lalokau Abia Dae Karana.” Hebou vairanai idia duahiduahi namonamo diba taudia oi abidia hidi paragraf ta ta idia duahia totona, bena idia duahia murinai helai taudia dekenai henanadai oi gwauraia.

(15 min) “Taunimanima be Iseda Ruma Ai Ita Abia Dae.” Inai hereva amo hebou taudia oi hagoadaia. Tadikaka bona taihu edia heabidae karadia dainai oi hanamodia, bona oi sisiba henidia danu. Tadikaka haida oi boiridia, idia ese ma haida edia heabidae karadia amo heduru idia abia daladia do idia kikilaia totona.

Ane 35 (15) bona guriguri.

September 16 ai Ia Matamaia Purana

Ane 55 (18)

(10 min) Kongregesen ena hadibaia herevadia. Akaun ripotina oi gwauraia

(20 min) “Hadohado bona Dairia Gaukarana—Hahediba Taudia Karaia Dalana.” (Kahana 2) Hebou vairanai idia duahiduahi namonamo taudia oi abidia hidi paragraf ta ta idia duahia totona, bena idia duahia murinai helai taudia dekenai henanadai oi gwauraia.

(15 min) Diabolo Oi Koua ‘Hereva Momokani be Edia Kudouna amo Ia Kokia’ Garina. Inai haheitalai maragina ese ita ibounai do ia durua bena ita diba idia ura kamonai taudia ita lou henidia haraga be gau badana. Namona be iseda hereva ita hamomokania bona idia dekenai ita giroa lao ‘dairia’ gaukarana ita karaia totona.

Pablisa rua, Taihu Bela bona Ruta be ruma ta ruma ta gaukara do idia karaia totona idia hegaegae. Kiki Herevana idia henia totona idia hegaegae.

Bela: Oibe, Kiki Herevana matamatana ia gwau namona be Luka 21:​10, 11 ita gaukaralaia. Namona be ita duahia. (Unai siri ia kehoa neganai ruma ta ruma ta rekod pepana ta ia davaria ena Bible lalonai.) Inai pepa lauegu Bible dekenai be dahaka? (Ia duahia) “Mrs Kido ia ura ma hereva haida ia kamonai ‘dina dokodia’ edia anina hahedinaraia totona.” Ita gwau murina pura dekenai ita giroa lao, to hua ta ia hanaia inai!

Ruta: Namona be hari ita lao ia dekenai! Ena ruma be ia kahirakahira. (Mrs Kido ena ruma dekenai idia raka lao bona iduara dekenai idia pidipidi, Mrs Kido ia raka lasi.)

Bela: Namo, Mrs Kido! Ai oi laloatao, a? Lau be Bela bona inai be Ruta. Ai gwau do ai giroa mai oiemu henanadai ‘dina dokodia’ dekenai ita kikilaia totona.

Mrs Kido: Namo, to hari lau ura lasi. Pura gunanai egu pris tauna ia mai. Gima Kohorona ia itaia neganai ia abia bona ia laohaia. Ia gwau umui lau kamonai henia be namo lasi bona ia gwau umui be peroveta koikoi taudia. Unai dainai, lau ura lasi unai hereva ita kikilaia hebou. (Iduara ia koua)

Bela: (Iduara amo idia siri neganai) Bema ita giroa lao haraga, ita hereva hegeregerena, reana ita do ia dadaraia lasi.

Ruta: Hari, lau diba vadaeni, kamonai tauna ta ita davaria neganai namona be kara haraga ita giroa lao, bema unai bamona ita karaia lasi, dala ita kehoa Diabolo ese hereva momokani edia kudouna dekena amo ia kokia totona!

Bela: Pura gunanai Mrs Korema ese ita dekena amo buklet ta ia abia, namona be hari ia dekenai ita giroa lao, namo lasi Diabolo be ia dekenai ia lao bona ena lalona do ia hadikaia dainai hereva momokani do ia dadaraia.

Inai hereva bona haheitalai ia naria tauna ena hereva dokona lalonai sisiba namona do ia gwauraia helai taudia durudia totona.

Ane 34 (8) bona guriguri.

September 23 ai Ia Matamaia Purana

Ane 162 (89)

(10 min) Kongregesen ena hadibaia herevadia. Henuna hereva gwauraia danu:

Laloaboio lasi, September ena hua dokona be ia kahirakahira dainai ripoti do umui atoa.

(18 min) “Hadohado bona Dairia Gaukarana—Hahediba Taudia Karaia Dalana.” (Kahana 3) Hebou vairanai idia duahiduahi namonamo diba taudia oi abidia hidi paragraf ta ta do idia duahia totona, bena idia duahia murinai helai taudia dekenai henanadai oi gwauraia.

(17 min) Bible Stadi Ta Lau Hamatamaia Totona, Pepapepa ese Lau Ia Durua Diba, A? Elda ta ese inai hereva do ia naria.

Pablisa haida dekenai Bible stadi ta hamatamaia be ia auka.

Pablisa haida be Bible stadi idia hamatamaia, to daudau lasi idia doko. Pepapepa be edena bamona ita gaukaralaia diba Bible stadi ta ita hamatamaia totona? Bema Bible stadi ta ita hamatamaia bona nega haida ita karaia, to murinai daudau lasi stadi ia doko, unai be daika ena kerere? Ruma tauna eiava pablisa? Reana ita gwauraia nega hegeregerena ita lao Bible stadi karaia totona, to nega haida ruma taudia idia noho lasi, unai dainai stadi idia reaia. To bema ita gwau idia ura kamonai lasi, bona ita giroa lou lasi, unai be namo lasi.

Elda Tauna: Pablisa (taihu eiava tadikaka) ta be Bible stadi ta ia do abia lasi. Sibona ena lalohadai ia gwauraia hedinarai neganai, elda ese dahaka ia herevalaia ena anina ia gwauraia. Namona be ita kamonai.

Pablisa: Lau be daudau herea hereva momokani lalonai lau noho. To lau ese Bible stadi ta lau do abia lasi. Mataio 28:​19, 20 dekenai Iesu ese ita ia hagania taunimanima be hahediba taudia ai do ita halaodia. Bible stadi ta lau abia totona edena bamona do lau hegaegae diba?

Elda Tauna: Hari ita itaia edena bamona ia hegaegae, pepapepa dekena amo Bible stadi ta ia hamatamaia toho totona.

Pablisa: Pura gunanai, Mauri mai Mainona Tanobada Matamatana Lalonai pepana ta lau henia tau ta dekenai. Lau laloa ia ura kamonai to ia bisi bada herea. Lau hamaoroa nega ta do lau giroa mai. Unai tau be edena sivarai do ia ura kamonai henia? (Pablisa be pepapepa ena hereva ia tahua) Hereva namona ta be rau 3, paragraf 2 dekenai, ia gwau nega do ia mai bena tuari do idia ore. Namona be ia lau nanadaia, “Oi laloa nega do ia mai bena tuari iboudiai do idia ore, a?” Paragraf dekenai Salamo 46:9 idia torea. (Ia duahia) Lau laloa unai bamona do lau karaia be namo. Do lau hamaoroa ena Bible do ia abia unai siri ai duahia hebou totona. Bena murinai, lau nanadaia dahaka ia laloa bema tanobada dekenai tuari do idia vara lasi. (Ia naria sisina) Murina paragraf dekenai Isaia 35:​1, 6, 7 idia torea. (Ia duahia) Tanobada dekenai tuari do idia ore ena henanadai lau henia murinai, unai siri ai duahia hebou diba.

Elda Tauna: Pablisa tauna ia hegaegae namonamo. Ia hegaegaelaia herevana be ia hegeregere lou-henia ginigunana ia karaia totona. Dahaka do ia hereva nega iharuana ruma tauna do ia lou henia dalana ia kehoa totona? Namona be ita kamonai.

Pablisa: (Sibona ena lalohadai ia gwauraia hedinarai noho) Reana lau nanadaia, “Oi ura oi mauri noho tanobada dekenai tuari ia ore neganai, a?” Bona murinai lau hamaoroa murina pura dekenai do lau giroa mai bona Bible ena gwauhamata hereva tanobada matamatana dekenai do ai kikilaia diba.

Elda Tauna: Ia hedinarai goevagoeva pablisa tauna ia ura dikadika Bible stadi ta ia abia. Reana ia guriguri Bible stadi ta do ia abia totona, to unai sibona lasi, ia hegaegae namonamo Bible stadi ta ia hamatamaia totona. Gabeai, ma haheitalai ta amo do ita itaia dahaka ia vara.

Ane 156 (49) bona guriguri.