Kahana 1: Harihari Oi Hegaegae Lagani 1991-92 “Mauri Namona Idia Ura Henia Taudia” Distrik Hebouhebou Do Oi Lao Henia Totona
1 Hari inai nega lalonai, tanobada ena kara ia dika ia lao, unai dainai tano idauidau momo lalodiai taunimanima edia ura bada be mauri namona idia abia. To unai mauri namona be edeseniai do idia davaria diba? Iesu Keriso ia gwau: “Bema lauegu hadibaia hereva umui badinaia neganai umui be lauegu diba tahua taudia momokani. Hereva momokani be do umui diba, bona hereva momokani ese umui do ia ruhaia.” (Ioane 8:31, 32) Taunimanima be politikol biaguna ta eiava gavamani ta idia hamorua bona ena gabu dekenai ma gavamani ta idia atoa neganai, idia laloa mauri namona do idia abia, to Iesu ese unai noho daudau lasi mauri namona ia herevalaia lasi. Ia ese taunimanima idia davaria hekwakwanaidia ena badina ia herevalaia. Iesu ese taunimanima ia guia gauna, kara dika, amo idia ia ruhaia dalana ia herevalaia. (Ioane 8:24, 34-36 itaia danu.) Unai dainai, taunimanima ta be Iesu Keriso ena hahediba tauna momokanina ai ia lao neganai, iena mauri dalana ia haidaua bada, ia ruhaia momokani.
2 DINA TOI HEBOUHEBOUDIA: Papua New Guinea dekenai, lagani 1991-92 “Mauri Namona Idia Ura Henia Taudia” Distrik Hebouhebou ginigunana be December 27-29, 1991, Port Moresby dekenai do idia hamatamaia. Hereva ginigunana be Friday dabai, 10:20 dekenai, do idia hamatamaia, bona hebouhebou be Sunday adorahi 4 o’clock bamona do idia hadokoa. Hereva namodia idia abia hidi unai dina toi lalonai do idia kikilaia totona, bona unai hereva be mai anina bada lauma dalanai ita goada totona. Hereva idauidau amo, Roma 8:21 ese ia gwauraia kwalimu momokani karana be edena bamona do ita abia diba do idia kikilaia. Iseda lalona do idia veria hereva idauidau do ita kamonai, bona haheitalai, taunimanima henanadai henia, bona drama do ita itaia.
3 Namona be emu lalona oi hadaia hebouhebou ena kahana ta do oi reaia lasi totona. Unai oi karaia totona reana emu ura gaudia haida do oi reaia bona emu sediual do oi haidaua. Haida be edia gaukara biaguna ida gaukara negana idia herevalaia hegaegae. Idia momo ese moni habadaia daladia haida idia negea, hebouhebou ena hereva iboudiai idia kamonai henia totona. Iehova ese unai gau totona idia guriguri goada taudia bona hebouhebou ena hereva iboudiai dekenai idia mai totona idia gaukara bada taudia do ia hanamodia.
4 OI GINIDAE HARAGA: Taunimanima idia diba Iehova ena Witness taudia idia gwauraia herevana idia badinaia bona hanaihanai nega korikori dekenai idia ginidae. (Luka 16:10) Unai be gau badana hebouhebou dekenai ita lao henia neganai danu. Dina ta ta iboudiai, namona be hebouhebou idia do kehoa lasi neganai ita ginidae haraga bona ita helai hegaegae. Unai ita karaia totona, namona be nega bada ita henia gau iboudiai ita karaia namonamo totona, hegeregere iseda motuka ita pakaia totona bona iseda ruma bese edia helai gabudia ita davaria totona.
5 Distrik hebouhebou dekenai ita lao neganai, unai be nega namona iseda tadikaka bona taihu ida ita hebamo namonamo totona. To, bema iseda turadia ida ita kiki hebou ela bona hanuaboi momokani, reana murina dinana dekenai do ita noga haraga diba lasi. Unai neganai ita haragaharaga dainai do ita lalo-hekwarahi bona do ita badu diba. Bema hebouhebou dekenai do ita ginidae haraga, ita be mai eda nega tadikaka bona taihu ida ita herevahereva namonamo totona. Bema ita goada karaia hebouhebou dekenai ita ginidae haraga totona, ita ese Keristen lalokau tadikaka bona taihu dekenai ita hahedinaraia, bona hemataurai karana Iehova dekenai bona ita ia henia lauma gaudia dekenai ita hahedinaraia danu.
6 KAMONAI NAMONAMO: Ita kamonai namonamo ena anina be hereva ibounai be iseda lalona, kudouna, taiana, bona mai lalo-parara danu ita hakala henia. Namona be ita hakala “Iehova ena hereva ita kamonai henia” totona. (Ier. 2:4) Isaia 55:2 lalonai Iehova ese Israel taudia ia henia haheganina be inai: “Lau dekenai umui kamonai namonamo.” Unai hereva “namonamo” ena anina be “mai ena ura ibounai ita karaia.” Bema hebouhebou edia hereva ita kamonai henidia namonamo, ita be iseda ura ibounai ida “hahediba herevadia momo ita kamonai.” (Her. 1:5) Distrik hebouhebou dekenai ita kamonai bona diba ita abia totona, ita hekwarahi bada iseda lalona ita biagua totona; Kingdom Hall dekenai ita hekwarahi sisina sibona. Dahaka dainai? Ita be nega sisina daudau ita helai, bona taunimanima momo idia mai bona haida idia loaloa dainai iseda lalona idia veria gaudia be momo. Dahaka do ita karaia? Ai moale badina hebouhebou dekenai idia mai taudia momo be hebouhebou ena hereva idia torea edia noutbuk dekenai. Unai be namo herea. Taunimanima iboudiai ai hagoadaia unai bamona idia karaia totona, badina hereva ita torea neganai, idia herevalaia gaudia sibona do ita laloa bona ita be ma gau idauidau haida do ita laloa lasi. Namona be iseda natudia dekenai noutbuk bona peni eiava pensolo ita henia, bena idia be hereva badadia bona Bible siridia idia toredia diba.
7 “MAURI NAMONA IDIA URA HENIA TAUDIA” DISTRIK HEBOUHEBOU DEKENAI OI MAI: “Mauri Namona Idia Ura Henia Taudia” Distrik Hebouhebou dekenai do ita mai bona idia gwauraia hereva iboudiai do ita kamonai henidia namonamo neganai, Keristen mauri namona gaukaralaia dalana maoromaorona do ita laloa bada. Namona be harihari ita hegaegae hebouhebou dekenai do ita ginidae haraga ane ginigunana ita abia totona, bona hebouhebou ena hereva iboudiai ita kamonai henidia ela bona Sunday adorahi guriguri dokona idia karaia neganai.
Lagani 1991/92 “Mauri Namona Idia Ura Henia Taudia” Distrik Hebouhebou
1 ANE ABIA BONA GURIGURI KARAIA HEBOU: Iseda tomadiho karana ta be ane amo Iehova ita hanamoa, Iesu bona ena aposetolo taudia idia karaia bamona. (Mar. 14:26) Paulo ese 1 Korinto 14:15 dekenai ane abia karana ia herevalaia, bona unai ese ia hahedinaraia reana ane abia karana be Keristen taudia edia tomadiho karana ta. Distrik hebouhebou lalonai be nega namona iseda tadikaka bona taihu handred handred eiava tausen tausen ida ane ita abia hebou bona ita guriguri hebou Iehova ita hanamoa totona.
2 To, haida ese idia hahedinaraia unai mai anina bada tomadiho karadia idia matauraia lasi. Edena bamona? Ane abia bona guriguri karaia lalonai eiava idia haorea murinai, idia be hebouhebou dekenai idia ginidae. Bona dina ena hereva dokona ia ore neganai, tadikaka ese ane idia abia lalonai eiava guriguri idia do karaia lasi neganai, haida ese edia helai gabudia idia rakatania bona idia lao. Nega haida unai bamona idia karaia be mai ena badina namona. To, haida ese ane abia bona guriguri karadia edia tadikaka ida idia reaia badina idia ura edia motuka dekenai idia lao haraga eiava idia ura aniani idia hoia haraga dainai. Oi laloa unai be Iehova matauraia bona laloa bada karana ia hahedinaraia, a?—Mat. 6:33.
3 Namona be ita naria namonamo, badina, mauri durua gaudia ita tahua lalonai, namo lasi tanobada taudia bamona sibona eda ura ita laloa guna eiava Dirava ia ura henia lasi karadia, hegeregere mataganigani bona sibona eda ura tahua karana, ese iseda tubu lauma dalanai idia hadikaia. Lagani gunanai, Eastern Europe tanodia lalodiai, iseda tadikaka bona taihu idia moale bada badina gavamani ese taravatu ia kokia dainai idia be ane abia bona guriguri hebou karadia idia karaia diba. Taunimanima hutuma be ane idia abia hebou bona idia guriguri hebou diba dainai idia moale. Idia hegeregeredia, namona be ita hahedinaraia ita be helaga karadia ita laloa bada, namo lasi ane abia bona guriguri hebou karadia ita lalodia hegeregere idia be gau maragidia bamona.
4 ISEDA KERISTEN HEMATAURAI KARADIA: Hebouhebou dekenai iseda Keristen hemataurai kara bona toana dainai taunimanima idia gwau Iehova ena Witness taudia idia namo. Unai bamona ita karaia badina be iseda tomadiho kara Iehova dekenai ita laloa bada, bona ita laloa lasi hebouhebou be tadikaka ida moale hebou gabuna sibona. Ita be hebouhebou badadia ita karaia neganai, namona be Keristen hemataurai karana ita karaia bona lauma gaudia ita laloa, nega ibounai haroro hesiai taudia bamona ita karaia.—1 Kor. 10:31-33.
5 Bema unai bamona ita karaia lasi, haida edia moale karana ita hamaragia, bona kamonai matamata taudia ita hahekwakwanaidia danu. Haida ese ita totona heduru maragidia idia karaia neganai, ita tanikiu henidia bona iseda moale ita hahedinaraia, a? Namona be ita kahirakahira dekenai idia noho taudia ita lalodia bona idia dekenai hemataurai bona kara namo ita hahedinaraia. Namona be ita ibounai ita laloatao program ena hereva idia karaia neganai, unai be ita kamonai ena nega, ia be ita raka loaloa bona ita herevahereva ena nega lasi.—Deuteronomi 31:12 oi duahia.
6 TAMA SINA DEKENAI: Natuna maragidia bona memero kekeni danu be “Mauri Namona Idia Ura Henia Taudia” Distrik Hebouhebouna dekenai idia mai be namo. Tanobada ia gwauraia mauri namona idia badinaia neganai, lauma dalanai idia ia hamasea diba, matamana neganai Adam ese ia abia mauri namona ia haboioa hegeregerena. Iehova ena orea be mai lalokau danu ita ia hadibaia unai hereva dekenai lalohadai maorona ita abia totona. Keristen hebou ibounai dekenai bema natudia idia kamonai namonamo bona ita itaia idia ura hebouhebou ena program ena hereva idia kamonai, unai ese ita ia hagoadaia! (Sal. 148:12, 13) To tama sina edia haheitalai bona natudia naridia karana be gau badana. Bema oi be tama eiava sina ta bona oiemu natudia oi do hadibaia lasi hereva be noutbuk dekenai idia torea totona, namona be hebouhebou ia do mai lasi neganai, oiemu natudia oi hadibaia, ani? Maragidia ita hagoadadia diba idia be Bible siri idia torea totona bona hereva taudia edia hereva haida idia torea totona.
7 Momokani, tama sina momo idia diba natudia idia ura idia gadara. Idia be mauri ena diba momo idia do abia lasi, bona idia be taunimanima badadia bamona idia karaia lasi. Unai dainai, namona be tama sina ese natudia idia hadibaia idia kamonai namonamo bona hebouhebou dekenai idia karaia dalana be dahaka. Unai dainai, tama sina ese edia natudia idia naria namonamo be gau badana. Tama sina haida be unai kara dekenai idia laloa namonamo lasi. Nega haida, ena be tama sina be guriguri lalonai Iehova idia matauraia, to edia natudia idia gadara dainai haida edia matana idia veria. Guriguri negana lalonai danu, namona be tama sina idia diba edia natudia be dahaka idia karaia. Danu, namona be idia diba edia natudia be dahaka idia karaia program negana lalonai edia helai gabuna idia rakatania neganai. Hebouhebou ena program negana lalonai, bona hebouhebou ia ore murinai, natudia edia naria tauna ta be ia noho, a?—Hereva Lada-isidia 29:15 mani oi duahia.
8 Society ese ita ibounai idia hagoadaia “Mauri Namona Ura Henia Taudia” Distrik Hebouhebouna dekenai ita lao henia totona. Unai neganai, Keriso dekena amo ia mai mauri namona do ita laloa bada, bona Keristen ena mauri namona gaukaralaia dala maorona do ita diba danu. Namona be harihari ita hegaegae bena ane ginigunana totona ita ginidae haraga bona hereva iboudiai ita kamonai ela bona Sunday adorahi ena guriguri dokona.
This article has been taken partly from km-E 5/91 “Arrange Now to Attend the 1991 ‘Lovers of Freedom’ District Convention.” Part 2 is in km 12/91 taken from box on p. 6.