Kongregesen Ena Buka Stadi
Kahana 2: Hegaegae bona Haere be Gau Badana
1 Iehova ena Hereva ese aonega bona lalo-parara idia abia taudia ia gwauraidia moale taudia, badina idia davaria hahenamona be bada. (Her. 3:13, 14, 16-18) Lauma dalanai idia aonega be mai anina bada badina unai aonega ese taunimanima do ia hamauridia. Keristen tauna be lauma dalanai ia aonega neganai, ia ese unai aonega herevana Bible dekena amo be iena tomadiho lalonai ia gaukaralaia namonamo diba, hegeregere, dina ta ta iboudiai dekenai idia vara hekwakwanaidia ia hanaia totona, bona iena mauri lalonai dala maorodia ia abia hidi ia tahua gaudia do ia hagugurua totona.
2 Kongregesen Buka Stadi idia karaia badina idia ura ita idia durua ita stadi bona Dirava ena Hereva ita badinaia totona, unai dala amo iseda aonega bona iseda lalo-parara lauma dalanai do ia goada ia lao. Unai dainai, namona be hanaihanai ita hegaegae Kongregesen Buka Stadi dekenai ita lao totona, badina unai be aonega abia dalana.—Her. 4:7-9.
HEGAEGAE NAMONAMO
3 Keristen taudia ginigunadia haida be idia ura lasi idia hekwarahi hereva momokani bona ia hedinarai diari herevadia idia diba totona. Keriso ena hahediba dekenai idia be natudia maragidia bamona, bona kara maoromaoro herevana idia diba lasi. (Heb. 5:11-13) Aposetolo Paulo ese kongregesen taudia ia hagoadaia “hereva badadia” do idia tahua totona. (Heb. 6:1) Unai bamona idia karaia totona, haida ese hereva momokani idia kikilaia neganai taunimanima idia kamonai sibona be hegeregere lasi. To, hereva ita laloa namonamo bona ena anina ita tahua be gau badana, “laloa maoromaoro” ita abia totona, bona namona be ita ‘hekwarahi bada’ unai ita karaia totona.—2 Pet. 3:1, 2; Luka 13:24.
4 Kongregesen Buka Stadi totona ita hegaegae namonamo neganai, unai ese ita ia durua hereva ita lalo-pararalaia totona bona ita laloa bada totona. To, ita hegaegae namonamo totona, paragraf ita duahia bona haere ita makaia sibona be hegeregere lasi. Namona be nega ia noho unai hereva ita laloa namonamo totona bona iseda mauri lalonai edena bamona ita ia durua ita laloa totona. Namona be idia torea Bible siridia iboudiai ita duahidia bona edia anina paragraf ena hereva dekenai ita laloa.
5 Ita haida dekenai, sibona ita stadi be mai ena hekwarahi, bona iseda nega ia haorea; to, ita ia durua bada! Paulo ese stadi namonamo karana dekena amo ia vara gauna ia gwauraia hedinarai, ia gwau: “Aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heb. 5:14) Bema sibona eda stadi ita karaia, unai ese ita ia durua lauma dalanai ita goada totona, bena gau haida totona dala ita abia hidi gwauraia neganai, ita ese dala maorona ita abia hidi diba.
HAERE
6 Namona be ita goada karaia hebou iboudiai dekenai haere ita henia totona. Dahaka dainai? Haere namodia ita henia neganai, unai ese iseda abidadama mo sibona ia hahedinaraia lasi, to iseda tadikaka bona taihu ia durudia bona ia hagoadaia danu. (Roma 10:10; Heb. 10:23-25) Kongregesen Buka Stadi dekenai haere ita henia be mai anina bada lauma dalanai do ita tubu goada totona. Bema idia manada vadaeni taudia, natudia, bona kamonai matamata taudia be haere momo idia henia, unai grup dekenai haere namodia idauidau momo do idia kamonai. Unai ese iboudiai ia hadibaia bona ia hagoadaia.
7 Bema Kongregesen Buka Stadi totona ita hegaegae namonamo, bema hanaihanai ita lao, bona bema ita haere momo, ita tahua aonegana do ita davaria bona “Dirava ena diba do ita davaria.”—Her. 2:4, 5.
[Questions]
1, 2. (a) Dahaka dainai Kongregesen Buka Stadi idia karaia? (b) Buka Stadi dekenai aonega abia karana be edena bamona ita ia durua dina ta ta edia hekwakwanai ita hanaia totona?
3. (a) Heberu 5:11-13 oi duahia. Keristen taudia ginigunadia edia nega lalonai, tadikaka bona taihu haida be edena bamona? Paulo ena sisiba Heberu 6:1 dekenai do ita badinaia totona, dahaka do ita karaia be gau badana? (b) Aposetolo Petro ese 2 Petero 3:1, 2 dekenai ita ia henia sisibana be dahaka?
4. Kongregesen Buka Stadi ita hegaegaelaia namonamo totona, dahaka do ita karaia be namo?
5. Heberu 5:14 ena hereva hegeregerena, dahaka do ia vara sibona eda stadi ita karaia neganai?
6. Dahaka dainai natudia bona kamonai matamata taudia be hebou dekenai haere idia henia be namo?
7. Hereva Lada-isidia 2:4, 5 oi duahia. “Dirava ena diba do [oi] davaria” totona, dahaka do oi karaia be gau badana?