Henanadai
◼ Bema kongregesen lalonai elda taudia tamona o rua sibona idia noho bona kara dika rohorohona ta ia vara, dahaka do idia karaia be namo?
1 Bema idia hamomokania vadaeni ia bapatiso vadaeni kongregesen tauna ta ese kara dika rohorohona ia karaia, vadaeni, kongregesen naria totona, bona kerere tauna durua totona, hahemaoro komiti idia karaia unai kerere idia hamaoromaoroa totona be gau badana.—1 Kor. 5:6, 9-11; Gal. 5:19-21.
2 Namona be diba momo elda taudia toi, eiava nega haida ma haida danu, be hahemaoro komiti idia karaia. Bema kongregesen ta lalonai elda tamona o rua sibona idia noho, reana ia noho kahirakahira kongregesen ta amo idia hegeregere elda taudia ma haida idia boiridia diba, hahemaoro komiti lalonai do idia vareai totona, bema mai edia dala. Bema kongregesen be gabu daudauna dekenai ia noho bona dala be lasi elda taudia be ma kongregesen ta amo idia mai bona unai kongregesen ena elda taudia danu idia helai hebou, vadaeni, ia hegeregere hesiai tauna tamona idia abia hidi diba, hahemaoro komiti lalonai do ia vareai diba, bona unai elda rua danu ia gaukara hebou totona. Eiava, bema sekit o distrik naria tauna be wiki haida murinai do ia mai kongregesen dekenai, unai kongregesen ena elda taudia reana do idia laloa do idia naria ela bona ia vadivadi bona do idia noia, idia danu hahemaoro komiti do idia karaia totona. Bema elda taudia be rua sibona, bona ma elda taudia o hesiai tauna ta idia boiria diba lasi, vadaeni, unai elda taudia rua ese unai hekwakwanai idia tahua diba. (Mat. 18:18-20) Nega ibounai gau badana be hahemaoro komiti dekenai elda taudia rua o ma haida idia noho. Bema elda tauna tamona bona hesiai taudia rua idia noho, idia be hahemaoro komiti idia karaia diba lasi, bona hesiai taudia toi danu idia karaia diba lasi.
3 Bema ia noho daudau kongregesen ta lalonai elda tauna, hesiai tauna o heduru tauna tamona sibona ia noho, bona unai neganai kongregesen tauna ta ese kara dika rohorohona ta ia karaia, kongregesen ia naria tadikakana (o taihuna) ese leta be branch opesi dekenai ia siaia diba, unai kara dika ena sivarai be branch taudia dekenai ia hadibaia totona. Unai negai, branch opesi taudia ese dala idia tahua diba, unai hekwakwanai idia hamaoromaoroa totona.
4 Hanaihanai, bema haida ese kara dika rohorohona idia karaia, gau badana be aonega bona manada elda tadikakadia ese unai kerere idia tahua. Unai dala amo ita kerere lasi, bona Iehova ena hahemaoro maoromaorona goevadaena ita haginia, bona idia helalo-kerehai momokani taudia ese Dirava ena hebogahisi do idia davaria diba.
[Questions]
1, 2. (a) Edena negai ia hegeregere hesiai tauna ta idia boiria diba hahemaoro komiti lalonai do ia vareai totona? (b) Mataio 18:18-20 oi duahia. Hahemaoro komiti do idia hebou diba totona, namona be elda hida idia noho? (c) Daidia be hahemaoro komiti lalonai idia noho diba lasi?
3. Edena negai bona badina be dahaka tadikaka eiava taihu ta ese branch opesi ia torea henia be namo, tadikaka ta ena kara dika rohorohona ena sivarai ia gwauraia totona?
4. Kara dika rohorohona hahemaoro henia neganai, dahaka gau rua dainai gau badana be aonega bona manada elda taudia ese unai kerere idia tahua?
This article is unique to PNG.