Sivarai Namona Harorolaia—Bible Stadi Hamatamaia, Nega Ginigunana Taunimanima Ta Oi Haroro Henia Neganai
1 Iesu ese oda be ita ia henia, ia gwau hahediba taudia do ita karaia. (Mat. 28:19) Unai do ita karaia totona, nega momo kamonai taudia danu Bible stadi do ita hamatamaia. Ruma ta ruma ta gaukara lalonai, kamonai tauna ita davaria negana ginigunana ai bema Bible stadi ita hamatamaia toho, unai ese ita do ia durua bena hahediba taudia do ita karaia haraga diba. Danu, unai dala amo, ita hahedinaraia goevagoeva dahaka dainai ruma tauna dekenai ita mai.
2 Ruma tauna ita davaria negana ginigunana dekenai Bible stadi ita hamatamaia toho neganai, dahaka ita hereva diba? Namona be ita hereva momo lasi. Reana do ita gwau: “Lau ura taunimanima lau durudia Bible ena hereva dekenai do idia lalo-parara totona, bona lau ura oi bona emu ruma bese taudia ida Bible stadi do ita karaia hebou emui ruma dekenai; unai be davana lasi bona unai negai gwauhamata ta do oi karaia lasi bona maduna ta oi dekenai do ia noho lasi. Emu Bible ita gaukaralaia diba. Bema oi be Bible lasi, lau ese Bible ta be oi dekenai lau henia diba.”
3 Ma dala ta be inai: “Lau mai emu ruma dekenai badina taunimanima lau hagoadaia edia ruma dekenai Bible stadi do idia karaia totona. Unai ese oi ia durua diba bena do oi diba vaira neganai inai tanobada dekenai dahaka do ia vara bona Dirava ena palani ita dekenai be dahaka. Lau ura oi dekenai do lau hahedinaraia edena dala amo emu Bible oi gaukaralaia namonamo diba.” Bema ruma tauna ia ura, oi ese Mauri mai Mainona Tanobada Matamatana Lalonai pepapepana o Lau Egu Bible Sivarai Buka (Sivarai Namba 115) eiava Mauri Hanaihanai Paradaiso Lalonai bukana, rau 156-163, oi gaukaralaia diba.
4 Bible Ena Hereva Idia Gwauraia Pepapepadia Oi Gaukaralaia: Ruma tauna be nega ginigunana idia davaria neganai Bible stadi idia hamatamaia toho neganai, momo idia davaria pepapepadia ese heduru bada idia henia. Ruma tauna be iduara ia kehoa neganai, Mauri mai Mainona Tanobada Matamatana Lalonai pepapepana oi henia, bona oi kehoa ia ese laulau ibounai do ia itaia diba totona. Bona ma pepapepa ta be emu imana dekenai oi dogoatao, bona paragraf ginigunadia rua edia henanadai oi duahia eiava edia hereva badadia oi gwauraia lou. Edia haere oi kikilaia, bona unai hereva idia hamomokania sirina ta o rua oi duahia. Bena oi hamaoroa emui kiki hebou dalana oi moalelaia bada, bona dala oi hegaegaelaia do oi lou henia totona. Bema ia hegeregere, davana lasi Bible stadi henia dalana be nega sisina lalonai oi gwauraia, eiava nega oi gwauraia hidi ia do oi lou henia bona pepapepa ena hereva ma ta do umui kikilaia hebou.
5 Ruma tauna do oi lou henia ena nega oi gwauraia hidi neganai, namona be iena lalona do ia veria gauna ta oi gwauraia. Reana unai be henanadai ta. Unai dala amo, ruma tauna do ia naria mai ena moale ida ela bona iena ruma dekenai oi giroa mai bona unai henanadai do oi haerelaia.
6 Mauri Hanaihanai bukana be dala momo dekenai ita ia durua bada. Ia ese ia hamomokania namonamo Dirava be ia noho momokani. (rau 34-36) Ia hahedinaraia dahaka dainai ita abidadama diba Bible be Dirava ena Hereva. Karoa 19 bona 20 edia laulau ese kudou-maoro taudia edia lalona do idia veria, bona unai dala amo Bible bona Iehova ena palani do idia ura dibaia. Unai dainai namona be ita ibounai ese nega bona dala iboudiai ita gaukaralaia Bible stadi be taunimanima ida do ita hamatamaia totona, bona Iesu ena oda hegeregerena hahediba taudia do ita karaia totona.—Mat. 24:14; 28:19, 20; Mar. 13:10.
[Questions]
1. (a) Dahaka ita karaia be gau badana, Mataio 28:19, 20 ena oda ita badinaia totona? (b) Dahaka dainai ruma tauna ita davaria negana ginigunana ai Bible stadi ita hamatamaia toho be namo?
2, 3. Ruma tauna ita davaria negana ginigunana ai, Bible stadi ita hamatamaia toho daladia haida mani oi gwauraia.
4, 5. (a) Ruma tauna be nega ginigunana oi davaria neganai, pepapepa be edena bamona oi gaukaralaia diba, Bible stadi oi hamatamaia maoromaoro totona? (b) Reana dahaka do oi karaia do oi lou henia dalana hegaegaelaia totona?
6. Mauri Hanaihanai bukana lalonai dahaka gaudia idia noho dainai ia be heduru gauna namona ruma ta ruma ta gaukara bona Bible stadi gaukara ita karaia neganai?