Nega Ginigunana Taunimanima Ta Oi Haroro Henia Dalana
1 Haroro gaukara dekenai nega ginigunana taunimanima ita hereva henia be ia auka sisina, badina taunimanima be sibodia edia mauri ena hekwarahi idia laloa momo, eiava sibodia edia lalohadai tomadiho dekenai idia laloa noho. Dahaka ese ita ia durua nega ginigunana taunimanima dekenai hereva namona ita henia totona?
2 April 1, 1992 ena Gima Kohorona, ena sivarai ladana “Mauri Namona Momokanina Edeseni Amo?” oi hariharilaia neganai, reana inai bamona oi hereva diba:
◼ “Tanobada ibounai dekenai taunimanima idia hekwarahi ruhaia mauri namona idia davaria totona; ena be gavamani idia gwau ruhaia mauri namona do idia havaraia, to idia do karaia lasi. Dirava momokanina, Iehova, tomadiho henia karana ese ita ia ruhaia bona mauri namona ita ia henia hanaihanai. Korinto Iharuana 3:17 oi duahia, bona oi hamaoroa inai magasin ese Dirava ena gwauhamata herevana ia kikilaia bona ia hahedinaraia tanobada dekenai idia vara gaudia ese idia hamomokania ruhaia mauri namona do ita abia negana be ia kahirakahira.
3 April 15, 1992 Gima Kohorona ena hereva badana be guriguri, bona unai hereva hahedinaraia totona reana inai bamona do oi hereva diba:
◼ “Nega momo tuari neganai taunimanima idia guriguri do idia kwalimu totona. Oi laloa Dirava ese edia kahana ta dekenai ia gini bona unai bamona guriguri ia kamonai henidia, a? (Oi naria ia haere totona.) Namona be Bible ena hereva ita itaia.” Murinai 1 Petero 3:12 oi duahia bona ena anina oi kikilaia. Bena Gima Kohorona oi kehoa bona ena lalona do ia veria sivaraina ta do oi kikilaia sisina magasin do ia ura abia totona. Bema ia kamonai namonamo, sabskripsen ia abia diba dalana oi gwauraia.
4 Laloaboio lasi, ita ura Bible stadi ita hamatamaia. Pioneer taudia be taunimanima momo idia hereva henidia dainai idia be Bible stadi momo idia hamatamaia diba, to namona be ita ibounai be iseda lalona ita hadaia Bible stadi ta do ita hamatamaia totona.
5 Pablisa taudia haida ese taunimanima be nega ginigunana idia haroro henidia neganai, idia ese pepapepa idia gaukaralaia.
Pepapepa ta ladana “Mauri mai Mainona Tanobada Matamatana Lalonai” oi hariharilaia neganai, reana inai bamona oi hereva diba:
◼ “Oiemu hanua dekenai ai vadivadi. Lau ura inai pepapepa oi abia badina ia ese ai emai gaukara ena badina ia herevalaia. Oi laloa nega ta iseda tanobada ena toana be inai bamona do ia lao, a?” Ia haere murinai, pepapepa ena paragraf ginigunadia 5 edia sivarai do oi kikilaia sisina, bena Mataio 6:9 bona Salamo 37:29 edia anina do oi gwauraia. (Harihari pablisa ta oi boiria pepapepa dekena amo Bible stadi hamatamaia dalana ia haheitalaia totona.)
6 Edena bamona emu hereva do oi hamatamaia be oi laloa namonamo. Reasoning buka ena rau 9-15 dekenai heduru hereva momo idia noho. Hamatamaia herevadia be aonega dalana amo do oi gaukaralaia neganai, oi idia durua taunimanima be nega ginigunana oi haroro henidia namonamo totona.