Lalo-Namo Taudia Umui Tahua
1 “Dirava ese ia abia hidi, mauri hanaihanai abia totona taudia” ita tahua be iseda haroro gaukara ena badina ta. (Kara 13:48) Gima Kohorona bona Noga! magasin hariharilaia gaukarana amo unai ita karaia diba, badina be unai magasin ese taunimanima idia hadibaia Basileia helarona ia noho. April lalonai Gima Kohorona sabskripsen lagani tamona gauna, ena davana be K8.00, eiava magasin rua bona Mase Taudia Edia Lauma buklet do ita hariharilaia, edia davana be K1.00. Iseda ura be Diba ese Mauri Dekenai Ita Ia Hakaua Lao bukana lalonai Baibel stadi matamatana do ita hamatamaia. Inai hereva haida do oi gaukaralaia diba:
2 Bema henaohenao karana ia bada ia lao herevana oi gaukaralaia, reana oi henanadai, oi gwau:
◼ “Dahaka gau ese raskol karadia do ia koua bena mai gari lasi ida do ita mahuta diba?” Reana ruma tauna ia laloa unai bamona gauna ta ia noho lasi. Oi gwau diba taunimanima momo be ia bamona idia laloa bona oi laloa oi abia lao sivaraina do ia ura kamonai. Bena unai sivarai ena hereva badana ta oi hahedinaraia. Gima Kohorona sabskripsen oi hariharilaia toho.
3 Famili ena noho ia herevalaia magasin oi hariharilaia toho neganai, reana oi gwau:
◼ “Hari inai negai, taunimanima momo idia davaria moni gaukara abia bona edia famili naria namonamo ena hekwarahi be bada. Unai idia kikilaia bukadia momo idia torea vadaeni, to diba bada taudia be unai hekwakwanai hanamoa daladia idia herevalaia neganai, idia lalo-tamona lasi. Sisiba maorona abia gabuna ia noho, eiava?” Bena Baibel ena sisiba ena namo ia hahedinaraia herevana ta magasin lalonai oi hahedinaraia. Pos opesi amo magasin abia hanaihanai ena namo oi herevalaia, bona sabskripsen oi hariharilaia toho.
4 April-June “Noga!” ena hereva badana, “Tuari be Lasi Vaitani Negana,” oi hariharilaia toho neganai, reana oi gwau diba:
◼ “Idia ore laganidia 100 lalonai tuari handred momo, tanobada ibounai tuaridia rua danu, idia vara vadaeni. Tanobada biagua taudia kahirakahira ibounai idia gwau maino idia ura. Lau diba taudia iboudiai be idia hegeregerena. Bema taunimanima ibounai idia ura maino, dahaka dainai maino ia noho lasi? [Haere naria.] Dahaka ese maino korikorina tanobada dekenai ia havaraia diba?” Ruma tauna ia haere murinai, rau 8 bona 9 dekenai oi lao bona Baibel siri ta, hegeregere Salamo 46:8, 9 oi duahia. Laulau bona idia torea Baibel siridia oi gaukaralaia Dirava ena Basileia be tanobada ibounai mainona do ia havaraia hamomokania totona. Bena ruma tauna oi nanadaia bema ia ura unai magasin ia duahia, ena davana be 30 toea. Lou henia negana oi hegaegaelaia.
5 Bema momo idia gwau idia bisi, reana inai oi tohoa:
◼ “Ai ura idia bisi momokani taudia, edia nega be lasi lauma gaudia idia tahua taudia, ai durua. Aiemai magasin, Gima Kohorona bona Noga!, be oi bona emu famili do idia durua, mai anina bada gaudia edia badina davaria totona. Lau ura inai magasin ruaosi bona inai buklet, Mase Taudia Edia Lauma, oi lau henia, edia davana be K1.00 sibona.”
6 Oi ese sabskripsen eiava magasin ta ta oi hariharilaia neganai, inai oi laloaboio lasi: Hereva kwadogina sibona oi hegaegaelaia bona gwauraia namonamo. Mai emu ura ida oi herevalaia. Edia lalona veria herevadia oi abia hidi. Emu lalohadai oi gwauraia hedinarai goevagoeva. Magasin ena sivarai ta ena hereva tamona sibona abia hidi, hereva kwadogina ai oi gwauraia, bena magasin hariharilaidia. Hamatamaia dalana namona be do ia ura kamonai gauna dekenai henanadai oi gwauraia bena Baibel ena haere unai magasin ena sivarai ta dekenai oi herevalaia diba. Ita ura Taunimanima momo herea ese Gima Kohorona bona Noga! idia duahia, badina be “sivarai namona idia mailaia noho.”—Isa. 52:7.