Daba Ena Lauma Aniani be Gau Badana Keristen Ruma Bese Ai
1 “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” (Mat. 4:4) Unai hereva be idia momokani! Dina ta ta iboudiai aniani ita abia be gau badana, bona dina ta ta iboudiai lauma aniani ita abia be gau badana danu. Hanaihanai Dirava ena Hereva dekena amo ita aniani totona, Society ese Dina Iboudiai Buka Helaga Tahua buklet ia halasia ita ia durua totona. Umui Keristen ruma bese taudia e, nega umui atoa dina ta ta iboudiai dina ena siri umui kikilaia totona, a?
2 Tamana Sinana Edia Haheitalai Namona be Gau Badana: Ita ibounai be ita bisi dainai, reana dina ena siri ita reaia momo diba, ita gwau ma nega ta ai do ita karaia. To, tama sina be edia ruma bese ena lauma goadana idia laloa bada neganai, idia be nega do idia atoa dina ta ta iboudiai ruma bese ibounai ese dina ena siri idia kikilaia totona. (Mat. 5:3) Idia be edia natudia dekenai dina ena siri do idia duahia sibona lasi, to Gima Kohorona dekena amo ma hereva haida do idia kikilaia danu, bona unai hereva bona sisiba idia badinaia diba dalana do idia gwauraia hedinarai. Momokani, unai kara idia manadalaia be mai ena hekwarahi, to hahenamo do ia havaraia. (Kara 17:11, 12 itaia.) Unai dainai, umui tama bona sina e, umui hekwarahi bada haheitalai namona taudia ai do umui lao totona.
3 Nega Namona Abia Hidi: Edena nega be ia namo oiemu ruma bese taudia ibounai idia helai hebou dina ena siri umui kikilaia totona? Daba ta ta iboudiai Bible ena siri kikilaia ena namo be bada. Tanobada hegegemadai Betele bona misinari rumadia dekenai, daba ena tomadiho gaukara hamatamaia totona, idia ese dina ena siri idia kikilaia sisina. Unai ese tadikaka bona taihu ia durudia dina ta ta iboudiai Iehova ena hahegani idia laloatao totona.—Sal. 1:1, 2; Fil. 4:8.
4 Keristen ruma besedia danu be daba kahanai Bible kikilaia karana amo namo idia davaria diba. Natudia ia durudia bena sikuli dekenai idia vara gaudia ese edia lauma goadana idia hadikaia lasi. Bema nega sisina lalonai ruma bese ta ena taudia ibounai be dabai idia helai hebou diba lasi dina ena siri idia kikilaia totona, namona be tama sina ese ma nega ta idia abia hidi idia karaia totona, badina unai mai anina bada lauma aniani idia reaia be namo lasi. Hegeregere, bema natudia idia do mahuta noho lalonai tamana ese ia lao gaukara totona, reana sinana ese nega sisina ia atoa diba dina ena siri idia kikilaia totona. Ruma bese haida ese idia hegaegae hanuaboi kahanai dina ena siri idia kikilaia totona, badina unai nega lalonai idia iboudiai idia helai hebou diba. Namona be ruma bese ta ta iboudiai be nega idia hegaegaelaia dina ta ta iboudiai dina ena siri idia kikilaia totona.
5 Dina ta ta iboudiai Keristen ruma besedia be lauma aniani idia abia be gau badana. Dina ena siri kikilaia karana oi laloa bada. (Fil. 1:10) Dina ta ta iboudiai dina ena siri ita kikilaia karana ese ita ia durua Iehova ia gwauraia dala maorodia bona taravatu ita dogoatao auka masemase totona. Bema ruma bese ta ta ena taunimanima iboudiai idia heduru heheni unai hebou kara amo iboudiai ese namo do idia davaria.
[Questions]
1. (a) Society ese Dina Iboudiai Buka Helaga Tahua buklet ia halasia ena badina be dahaka? (b) Ruma bese iboudiai ese sibodia dekenai dahaka henanadai do idia gwauraia be namo?
2. (a) Dahaka dainai tama sina be nega idia atoa dina ena siri idia kikilaia totona? (b) Kara 17:11, 12 duahia. Unai Keristen taudia be edena nega lalodiai Bible ena siri idia duahidia?
3. (a) Bema mai ena dala, dahaka dainai daba kahanai be nega namona dina ena siri kikilaia totona? (b) Salamo 1:1, 2 bona Filipi 4:8 duahidia. Unuseniai dahaka sisiba namona ia noho ita totona?
4. Ruma bese ta ta iboudiai edia maduna be dahaka?
5. (a) Filipi 1:10 duahia. Dahaka dainai ita gwau unai siri ese ita ia hagoadaia dina ena siri ita kikilaia totona? (b) Unai hebou karaia totona dahaka dainai ruma bese taudia idia heduru heheni be gau badana?