Gabu Daudau ai Eiava Ita Haroro Momo Lasi Gabudia ai Ita Lao Haroro Totona
1 Henanadai ta be inai: ‘Basileia ena “sivarai namona” do ita harorolaia noho ela bona edena nega, bena inai nega dikana do ia ore?’ Aposetolo Paulo ia gwau iena nega lalonai “nega be kwadogi.” (1 Kor. 7:29) Aposetolo Petro danu ese unai bamona lalohadai ia abia dainai, ia gwau: “Gau ibounai edia dokona nega be kahirakahira.”—1 Pet. 4:7.
2 Papua New Guinea lalonai mamoe bamona taudia momo ese “sivarai namona” idia do kamonai lasi. Ma haida reana idia “kamonai” vadaeni, to heduru idia abia noho be gau badana. Unai dainai, Iehova ena orea ese July ena hua idia gwauraia hidi lou gabu daudau ai eiava ita haroro momo lasi gabudia ai do ita lao haroro totona. Unai dainai ita moale, ani?
3 Iseda teritori haida dekenai nega momo ita haroro. To iseda teritori ma haida be gabu daudau ai idia noho dainai eiava ita lao henia be ia auka dainai unuseniai ita haroro momo lasi. To, ita ura taunimanima iboudiai be sivarai namona do idia kamonai, unai dainai ita ura Basileia uhena ita hadoa gabu iboudiai dekenai. Teritori ia naria tadikakana be unai ia laloa be namo, bona pablisa bona pioneer taudia do ia hagoadadia, idia gaukaralaia momo lasi teritori dekenai idia lao haroro totona.
4 Papua New Guinea lalonai, haroro totona gabu daudau ai ita lao ena nega namona be July lalonai. To, bema July lalonai medu ia diho badabada dainai dala ia dika, eiava ma gau ta ia vara dainai gabu daudau ai ita lao diba lasi haroro totona, namona be gabeai nega namona ai ita lao.
5 Hegaegae Namonamo be Gau Badana: Gabu daudau ai ia noho teritori dekenai ita haroro namonamo totona, gau badana be elda bona pablisa taudia idia hegaegae namonamo guna. Inai mani ita laloa: Iseda teritori be edeseniai? Dala dekenai bona hanua dekenai ruma be hida? Namo lasi ita gwau, ‘Do ita ginidae neganai unai do ita diba.’ Nega momo, pablisa taudia bona gaukara idia gunalaia taudia bema idia hegaegae namonamo guna, edia haroro negana do idia halusia kava lasi, bona haroro gaukara do idia karaia namonamo diba.
6 Ita haida be gabu daudau ai ita haroro totona, aena dekenai ita raka lao, eiava ororo dekenai ita daekau, o sinavai ita rakaia hanai, bena taunimanima edia ruma dekenai ita ginidae neganai ruma tauna be lasi eiava ia ura lasi kamonai. Bema iseda teritori be unai bamona, namona be unai gabudiai idia noho taudia edia mauri ita laloa bada dainai, ita boga-auka bona lalokau korikorina ita hahedinaraia. Iehova ese iseda hekwarahi dainai ita dekenai hahenamo do ia henia.—1 Kor. 15:58.
7 Ita haida be motuka amo gabu daudau ena teritori dekenai do ita lao. Motuka biaguna ese ena motuka ia sekea vadaeni, ia heau namonamo, a? Namona be motuka taria tauna dekenai mapu idia henia, bena do ia diba iena grup taudia be edeseniai do idia gaukara bona do ia hegaegae guna diba.
8 Pablisa Taudia Idia Hegaegae: Namona be pablisa ta ta iboudiai idia hegaegae guna. Oi abia hegaegae bukadia bona magasinidia edia momo be hegeregere, a? Magasin gunadia bona pepapepa haida oi abia hegaegae bena ruma dekenai taunimanima be lasi neganai ta oi rakatania diba, ani? Taunimanima be dala dekenai oi davaridia neganai, oi hereva henidia toho mai emu hemataurai danu, a? Nega momo, dala dekenai idia raka taudia be edia ruma dekenai ita davaridia lasi taudia. Bema tadikaka ta ena motuka dekenai do oi gui, oi hegaegae moni sisina do oi henia bensini hoia totona, a? Namona be oi naria lasi ela bona oi ia noia, badina reana oi do ia noia hemaraina ia hemarai. Bema oi hegeregere lasi momokani moni do oi henia totona, mani oi hamaoroa, bena reana oi do ia bogaia hisi.
9 Bema gau ta dainai unai gabu daudau teritori umui karaia diba lasi, mani emui kara Association umui hadibaia. Reana ma haida be unai gabu dekenai do idia lao diba. Gabu daudau ena teritori dekenai haroro namonamo be mai ena hekwarahi, bona reana namona be iseda ura haida ita dadaraia ita karaia totona. To, iseda hekwarahi dainai hahenamo do ita davaria. Ai ura Iehova ese emui hekwarahi do ia hanamoa noho, gabu daudau ai eiava umui haroro momo lasi gabudia dekediai ‘Dirava ena Basileia do umui harorolaia’ neganai.—Luka 9:60.
[Questions]
1. Edena bamona ita diba “sivarai namona” do ita harorolaia negana be kahirakahira do ia ore?
2, 3. Pablisa bona pioneer taudia be teritori haida dekenai idia lao be mai ena hekwarahi dainai nega momo idia gaukaralaia lasi, to dahaka dainai idia ura unai gabu ai idia haroro?
4. (a) Dahaka dainai July idia gwauraia gabu daudau ai ita lao haroro totona? (b) Bema July lalonai gabu daudau ai teritori ita karaia diba lasi, dahaka do ita karaia be namo?
5. (a) Dahaka dainai ita hegaegae guna be gau badana? (b) Dahaka ita diba guna be gau badana?
6. (a) Iseda tadikaka haida ese dahaka hekwakwanai do idia davaria reana? (b) Dahaka ese ia durudia diba unai hekwakwanai idia haheaukalaia totona?
7. Motuka taria taudia dekenai dahaka heduru ita henia guna be namo?
8. (a) Pablisa ta ta iboudiai be idia hegaegae totona, dahaka idia laloa be namo? (b) Dahaka dainai namona be ita hegaegae, dala dekenai idia raka taudia be mai eda hemataurai ida do ita hereva henidia totona? (c) Dahaka dainai namona be pablisa taudia idia naria lasi ela bona motuka ena biaguna ese ia noidia heduru moni sisina idia henia totona?
This article is repeated in km 6/93.