July Ena Hesiai Hebou

June 29 ai Ia Matamaia Purana

Ane 220 (19)

10 min: Kongregesen ena hadibaia herevadia.

20 min: “Oiemu Kara Hebou Durua Totona.” Duahiduahi ia diba namonamo tadikaka ta oi abia hidi guna paragraf ta ta ia duahia totona, bena ia duahia murinai henanadai do oi gwauraia. Kongregesen ena manoka karana oi gwauraia hedinarai. Bema ia hegeregere edia gaukara goada dainai idia oi hanamoa.

15 min: Iseda Malana Hadibaia Lalohisihisi Taudia Durudia Totona. Inai hereva be hebou taudia ida do idia kikilaia.

Hari inai negai, gau momo ese taunimanima edia lalona idia hahisihisidia diba: Moni dekenai idia dabu, edia lalokau tauna ta ia mase, idia gorere, edia natudia eiava adavana be lauma dalanai idia manoka, bona ma hekwakwanai haida danu. Bema ita lalohisihisi bada, hekwakwanai idia vara neganai, Satana ese ita ia hamorua haraga diba. (Her. 24:10; Luka 22:31 itaia danu.) Keristen taudia edia maduna be idia hagoadaia heheni bona idia heduru heheni. (1 Tes. 5:14; Gal. 6:2) Unai ita karaia neganai Keriso ena kara ita tohotohoa. (Mat. 11:​28-30) Edena bamona unai ita karaia diba? Dala ta be taunimanima edia hereva be mai hebogahisi danu do ita kamonai henia namonamo. (Roma 12:15) Ma dala ta be ita hegaegae kara haraga do ita durudia totona. (Iak. 2:​14-17; Reasoning buka rau 117-21) Hebou vairanai tadikaka eiava taihu rua o toi oi abidia hidi edia helai gabudia amo heduru hereva namodia do idia gwauraia totona. Do idia hahedinaraia hekwakwanai idia davaria neganai haida ese idia edena bamona idia hagoadadia. (Kara 28:15) Iehova kahirakahira dekenai do oi raka mai, elda edia heduru do oi tahua, bona oi guriguri hanaihanai, unai amo lalohisihisi gaudia do oi haheaukalaidia diba.​—Iak. 4:8; Isa. 32:​1, 2; Ef. 6:​17, 18.

Ane 62 (34) bona guriguri.

July 6 ai Ia Matamaia Purana

Ane 22 (73)

10 min: Kongregesen ena hadibaia herevadia.

20 min: “Memero Kekeni e, Iehova Ida Umui Hetura Namonamo.” Hebou vairanai idia duahiduahi diba namonamo taudia oi abidia hidi paragraf idia duahia totona, bena murinai helai taudia oi henanadai henidia. Namona be emu kongregesen lalonai idia noho memero bona kekeni edia lalona oi veria toho. Oi hagoadadia, lauma dalana ai do idia goada idia lao totona.

15 min: “Edena Bamona Iseda Natudia Ita Hadibaia Edia Maduna Do Idia Huaia Totona?” Bema mai dalana, ena natuna be idia bada bona idia do abidadama noho lagani bada elda tauna ta ese inai hereva do ia henia. Henuna paragraf edia anina do ia kikilaia. Ia hahedinaraia tama bona sina be edia natudia ida idia herevahereva be gau badana, bona natuna be ia kara kerere neganai idia be edena bamona do idia kara henia ia hahedinaraia.

Ane 220 (108) bona guriguri.

July 13 ai Ia Matamaia Purana

Ane 211 (4)

10 min: Kongregesen ena hadibaia herevadia. Akaun ripotina gwauraia.

15 min: Mai Anina Gaudia Ita Dogoatao Momokani. Helai taudia dekenai henuai herevadia oi herevalaidia.

Gau namodia ita dogoatao momokani be aonega karana. Gau namodia haida be inai: orea ena gaukara dalana, Bible ena taravatu bona ena hahediba herevadia.​—1 Tes. 5:21; Heb. 10:23.

Namona be Basileia ena sivarai ita harorolaia, taunimanima be hahediba taudia ai ita halaodia, taunimanima ita hamaorodia Dirava ese kara dika taudia do ia haoredia, bona Dirava ena mamoe oreana ita naria danu.​—Mat. 24:14; 28:​19, 20; Esek. 3:​17-19; 1 Tes. 5:​2, 3.

Iehova ese taunimanima gogoa gaukarana ia haharagaia negana lalonai, gau badana be ‘gau namodia edia toana do ita diba.’​—Fil. 1:​10; Isa. 60:22.

Anina lasi gaudia, iseda nega idia halusia kava gaudia, ita rakatanidia be aonega karana. Bema Iehova ena orea ena hahegani ita badinaia, hereva momokani dekenai ita gini goada diba bona Dirava ena orea do ia bada ia lao.​—Kara 16:4; 1 Kor. 4:6.

Gau badana be sibona eda stadi bona iseda ruma bese stadi ita laloaboio lasi. Namona be hereva momokani ena dobu herevadia ita diba danu, unai amo do ita tubu daekau bona mauri do ita davaria diba. (1 Pet. 2:2, 3) Bema unai ita karaia bona kongregesen ena hebou iboudiai dekenai ita lao loulou, unai ese ita do ia durua, lauma gaudia ita lalodia bada totona. Bema Iehova ena orea kahirakahira dekenai ita noho, do ita hegeregere ita idia hakaua taudia ida do ita gaukara hebou bona Dirava ena gaukara do ita karaia badabada. Unai amo gau ibounai dekenai do ita tubu daekau momokani ekalesia ena kwarana, Keriso ita kamonai henia noho lalonai.​—Ef. 4:​11-16.

20 min: “Umui Hagoadaia Heheni Noho.” Hebou vairanai duahiduahi ia diba namonamo tadikaka ta oi abia hidi paragraf ta ta ia duahia totona, bena murinai helai taudia dekenai henanadai oi gwauraia.

Ane 200 (108) bona guriguri.

July 20 ai Ia Matamaia Purana

Ane 67 (38)

10 min: Kongregesen ena hadibaia herevadia. Henuna hereva gwauraia danu:

Hari hua lalonai gabu daudau teritori umui karaia neganai ekspiriens namodia haida umui abia, a?

20 min: “Lou-Henia Namodia Karaia Dalana.” Helai taudia ida henuna paragraf edia hereva badadia oi kikilaia. Lou-henia amo kamonai tauna idia davaria ena ekspiriens kwadogina oi gwauraia. Miniti oredia 6-8 lalonai haheitalai karaia, oi hahedinaraia edena dala ai Kongregesen Buka Stadi ia naria tauna ese pablisa rua eiava toi ia durudia idia hegaegae kamonai tauna idia lou henia totona. Bema mai dalana, edia lou-henia korikori taudia totona do idia hegaegae.

15 min: Pepapepa! Oi Gaukaralaidia, A? Oi Hegaegae Nega bona Gabu Idaudia ai Oi Haroro Totona, A? Henuna paragraf do oi kikilaia sisina bona haheitalai karaia. Hegaegae namonamo helai taudia ese pepapepa gaukaralaia ena namo idia diba totona. Oi hadibadia nega bona gabu idaudia dekenai taunimanima haroro henidia be moale gaukarana.

Iehova ena orea taudia idia halasia pepapepa namodia oi gaukaralaidia, a? [Hahedinaraidia helai taudia idia itaia totona.] Nega ibounai pablisa ta ta iboudiai dekenai pepapepa bona ma buka haida idia noho be namo, badina dala ia kehoa neganai unai pepapepa bona buka haida amo idia hegaegae vadaeni taunimanima idia durudia totona.

Kamonai taudia oi davaridia neganai, namona be edia ladadia bona edia noho gabudia oi toredia. Unai neganai oi lou henidia bona oi durudia diba.

Nega bona gabu idaudia dekenai oi haroro neganai, namona be haroro nega ena lata oi torea. Bema nega ta ai miniti 10 bona ma nega ta ai miniti 15 lalonai taunimanima oi haroro henidia, kara haraga hora tamona ia davaria diba. Nega bona gabu idaudia dekenai oi haroro negadia oi hagaudia bona hua dokonai emu ripoti dekenai oi torea be namo.

Hari, pablisa ta be maketi dekenai ia lao gwauraia, dahaka ia karaia inai hereva ia badinaia totona do ita itaia.

Taihu: [Natuna merona o kekenina ia hereva henia.] Hari dina ita be maketi dekenai do ita lao. Lau ura gaudia be lista dekenai lau torea, lau sekea guna. [Ia sekea.] Ia namo. To Iseda Basileia Gaukara pepana lalonai ia gwau namona be ita hegaegae nega bona gabu idaudia dekenai do ita haroro totona. [Ena baege lalonai ia sekea.] Namo! Pepapepa bona magasin haida idia noho. Vadaeni, ita lao inai.

Tadikaka: Kara ginigunana unai. Taihu be ia hegaegae nega bona gabu idaudia dekenai do ia haroro totona. Hari idia be basi guia gabuna dekenai idia noho. Hahine ta ladana Mrs. Henao bona ena natuna be basi guia gabunai idia mai. Iseda taihu be dahaka do ia karaia?

Taihu: Namo Mrs. Henao! Umui danu be maketi dekenai umui lao, ani?

Mrs. Henao: Oibe, vadivadi hahine ta do ia mai unai dainai aniani ma haida do lau hoia.

Taihu: Emu vadivadi hahinena be hanua amo do ia mai, a?

Mrs. Henao: Oibe, ia be lauegu tadina. Vanegai ena natuna ia mase bona hari do ia mai iniseniai do ia holide sisina totona.

Taihu: Madi, ena natuna ia mase dainai lau sori bada herea. Mrs. Henao, mase ese lalohisihisi bona lalo-metau bada ia havaraia! Vanegai aiemai ruma bese tauna ta ia mase danu, to unai nega lalonai lau duahia herevana ta ese lau ia durua.

Mrs. Henao: Unai hereva be dahaka?

Taihu: [Hari, taihu ese Helaro Namona Mase Taudia Totona pepapepana ia henia bona toreisi lou ena helaro ia kikilaia sisina.]

Mrs. Henao: Tanikiu bada inai pepapepa lau oi henia dainai. Oiemu hereva ese lau ia durua bada.

Taihu: Mrs. Henao, oiemu ruma lau diba. Oi ura nega ta do lau mai bona inai bamona heduru hereva ma haida do ita kikilaia totona, a?

Mrs. Henao: Oibe, lau ura. Oi itaia, basi ia mai inai!

Tadikaka: Namona be taihu ese ma gau ta do ia laloaboio lasi. Unai be dahaka? Ia haroro negana do ia torea. Miniti hida ia haroro? [Ena dina gauna ia itaia. ] Miniti 10 idia kiki noho. Bema nega haida gabu idaudia ai oi haroro, kara haraga hora tamona do oi abia. Tanobada hegegemadai pablisa iboudiai be 4,000,000 bamona, bema dina ta ta iboudiai miniti 10 lalonai ma ta idia haroro henia, unai be Dirava hanamoa gaukara badana ta! Salamo 96:2 ena hereva ita badinaia be namo. Namona be ita duahia. [Siri ia duahia ena hereva ia hadokoa totona.]

Ane 64 (35) bona guriguri.

July 27 ai Ia Matamaia Purana

Ane 220 (19)

10 min: Kongregesen ena hadibaia herevadia. June ena kongregesen ripoti gwauraia. Tadikaka bona taihu hanamodia edia gaukara namona dainai, bona edia manoka gabuna hanamoa dalana do oi kikilaia.

20 min: “Daba Ena Lauma Aniani be Gau Badana Keristen Ruma Bese Ai.” Hebou vairanai duahiduahi ia diba namonamo tauna ta oi abia hidi paragraf ta ta ia duahidia totona, bena murinai helai taudia dekenai henanadai oi gwauraia.

15 min: Dina Ena Siri Kikilaia. Haheitalai ta amo ruma bese ta ese dina ena siri idia kikilaia dalana idia hahedinaraia. Iboudiai do idia haere, maragidia danu.

Ane 59 (31) bona guriguri.