Edena Bamona Iseda Natudia Ita Hadibaia Edia Maduna Do Idia Huaia Totona?
1 Aonega tauna King Solomon ena sisiba namona natuna habadaia karana dekenai be inai: “Meromero oi hadibaia ena raka dalana ia diba totona; bena ia buruka neganai do ia rakatania lasi.” (Her. 22:6) “Ena raka dalana ia diba” ena anina ta be, oi hadibaia ena mauri lalonai gau namodia ia tahudia totona. Unai dainai, bema tama o sina ese ena natuna ia durua mai anina bada gaudia ia tahudia totona, ena moale ia habadaia diba bona lauma dalanai ia hagoadaia. Bena ia tahua gaudia haida ia abidia vadaeni neganai, ena lalona do ia hegeregere ma gau namodia haida do ia tahudia.
2 Tama sina momo edia kerere be inai: Idia naria ela bona edia natudia ese sibodia edia lalona do idia hadaia gau haida do idia tahudia totona. Memero bona kekeni edia diba be hegeregere lasi. Bema tama sina ese edia natuna idia durua lasi gau namodia ia tahudia totona, ma ta ese do ia durua—reana ena sikuli turana eiava sikuli tisa ese. Keristen tama sina ese edia natuna idia durua diba, ena abidadama danu idia hegeregere gaudia ia tahua totona. Memero kekeni idia tahua diba gauna ta be inai: Idia hegaegae Haroro School lalonai idia vareai totona. Haroro gaukara lalonai gau haida idia tahua diba danu, hegeregere, pablik tok hadibaia pepana henia karana, magasin ena hereva kikilaia karana, kiki herevana kwadogina henia karana. Stadi karana dekenai gau haida idia tahua diba danu. Memero kekeni ese Bible ena buka ta ta iboudiai edia ladana bona siri badadia haida danu be metairametaira idia dibadia diba. Ia do bada lasi neganai, namona be ena gaukara, do ia bada bona sikuli do ia rakatania vadaeni neganai do ia tahua gaukarana, idia kikilaia hebou. Sikuli tisa ese ena lalona do ia veria gaukara ta do ia tahua totona, to namona be Keristen tama sina ese edia natuna idia durua, ia be mai anina gaukarana ta ia tahua totona, unai gaukara ese ena lalona do ia hamoalea badina iena amo Iehova ena hesiai gaukara, hegeregere pioneer gaukara, Betele gaukara, eiava misinari gaukara do ia karaia diba.
3 Tama sina idia ura edia natuna do ia tubu daekau bona ena maduna do ia huaia, do ia kara kava lasi. Bible ena taravatu bona sisiba herevadia amo idia durua diba, bena ia be sibona ena lalona do ia hadibaia diba, maoro bona kerere edia toana ia diba totona. Ia tubu daekau lalonai, namona be idia hamaoroa idia abidadama henia, idia laloa do ia kara maoromaoro diba. Reana idia hamaoroa, kara ta dekenai ia be sibona ena ura do ia karaia diba; to bema ia kara kerere, namona be idia gwau dika henia dikadika lasi, to namona be unai amo dala maorona idia hadibaia. Bema edia kara dainai oi laloa idia be hegeregere gau idauidau do idia karaia diba, natudia do idia moale, bona unai amo do oi durudia ‘idia tubu daekau, bona hahemauri do idia abia’ totona.
4 Natu ia tubu daekau lalonai, ena tamana bona sinana ese ena kara idia itaia, bona bema idia itaia ena kara o lalohadai haida ia haidaudia, namona be edia hadibaia dalana bona sisiba henia dalana idia haidaua, iena kara o lalohadai idaudia hegeregeredia. Namona be idia koikoi lasi o hereva haida iena amo idia hunia lasi, to edia lalohadai iena kara dekenai idia gwauraia hedinarai be namo. Bema hereva ta idia hunia lasi, unai amo dala idia kehoa, ia ese ena lalohadai idia dekenai ia gwauraia hedinarai totona, bena idia herevahereva hebou diba.
5 David ia tauhau neganai lauma gaudia ia ura henidia bada. Salamo haida ia torea, bona idia hahedinaraia ia be Iehova ena lalokau ia moalelaia bada. (Sal. 23:1-6) Iehova ia abidadama henia dainai, ia gari lasi, bea bona laion idia mai neganai, bona Filistia tau badana, Goliata, ia mai bona Israel ena tuari taudia iboudiai ia hagaridia neganai danu. David ena tamana, Iese ese David ia moalelaia bada ena abidadama dainai! David ese Iehova ia tura henia ela bona ia mase. (1 Sam. 17:32-37, 45-50; Sal. 19:9, 10, 14; 15:1, 2; 24:3, 4) Bema ita durudia, iseda natudia danu be David ia karaia bamona Iehova idia tura henia diba bena do ita moalelaidia. To ita sibona be hegeregere lasi.
6 Guriguri amo Heduru Oi Tahua: Manoa ia diba ena adavana ese natuna do ia havaraia neganai, Iehova ia noia, do ia hadibaia unai natuna be edena bamona do ia naria bona do ia hadibaia. Iehova ese ena noinoi ia kamonai. (Hhem. 13:8, 12, 24) Namona be hari inai negai danu tama sina ese Iehova idia noia, aonega do ia henidia edia natudia be mauri dalana dekenai idia hakaudia totona. Iehova ena peroveta tauna Samuel ia laloa, bema Iehova ena taunimanima dainai ia guriguri lasi, unai be “Iehova kara dika henia” karana hegeregerena. (1 Sam. 12:23; Her. 1:24, 25 itaia.) Namona be unai bamona ita laloa iseda natudia dekenai. Ita ura idia be lauma gaudia idia laloa momo. Guriguri loulou be heduru namona.
7 Oi Hesiku Lasi: Unai kara ta ia haraga, a? Lasi. Ena be ia be mai ena hekwarahi, to dokonai davana namona do oi abia. Oiemu natuna ena mauri laganidia be 12 idia hanaia neganai, hekwakwanai haida do idia vara. Idia vara neganai, oi gari lasi. Idia ta ta idia vara neganai, oi hanaidia toho, to namona be oi laloa lasi hoa dalanai do idia ore. Oi gini auka, to emu natuna oi gwau dika henia lasi; oi haheauka bona hakwakwanai oi hanaia toho. Bema ita be iseda lalona ita biagua namonamo diba, unai hekwakwanai momo do idia ore, bena dala do ia kehoa ita be iseda natuna ida ita lalo-tamona diba.
8 Dirava garina idia gari tama sina iboudiai idia ura edia natudia be namo sibona do idia abia. Ita ura idia ese helaga gaudia idia matauraidia bona Dirava ena hereva idia ura henia, bena unai amo ‘do idia tubu daekau, bona hahemauri do idia abia.’ Nega haida, ena be Keristen tama sina idia hekwarahi bada edia natudia idia hadibadia namonamo totona, to idia tubu daekau neganai hereva momokani idia dadaraia. To, bema mai eda lalo-goada ida iseda natudia ita hadibadia, reana unai kerere do ia vara lasi. Iehova ena heduru amo do ita gaukara goada, iseda natudia be edia rakalaia dalana ita hadibadia totona. Ita ura iseda natudia do ita itadia, hereva momokani ena dala dekenai do idia raka edia mauri dinadia iboudiai lalodiai.—Heb. 12:16; 1 Pet. 2:2; Her. 22:6.
This article is unique to PNG.