Memero Kekeni e, Iehova Ida Umui Hetura Namonamo
1 Salamo 24:3-5 ena hereva ese iseda kudouna idia hamoalea. Hereva be inai: “Daika be Iehova ena ororo dekenai ia daekau lao diba? Bona daika be ena gabu helagana lalonai ia gini toreisi diba? Ena imana idia kerere lasi bona mai ena kudou goeva tauna. Egu lalona ia hadikaia lasi tauna bona gwauhamata koikoina ia karaia lasi tauna. Iehova ena amo hahemauri do ia abia bona ena hahemauri Diravana ena amo kara maoromaoro do ia abia.” Oibe, Iehova ia ura ia ida idia hetura taudia be kara goeva bona kerere lasi taudia, gwauhamata koikoi dainai laloa rua ai idia raka taudia ia ura henidia lasi. Ita moale badina hari inai negai Keristen memero bona kekeni momo be unai bamona taudia. Iehova bona ena orea idia hanamoa. Idia kara goeva dainai Iehova vairanai idia hairai.
2 Hari inai negai memero bona kekeni idia kara goeva be auka lasi, a? Lasi. Dina iboudiai dekenai hekwakwanai idia davaridia. Gabu iboudiai dekenai kara mirodia be momo herea bona taunimanima momo idia sihari kava. Dahaka oi karaia diba sibona do oi naria totona? Gau badana be Iehova oi tura henia momokani.
DAHAKA OI KARAIA BE NAMO?
3 Iehova do oi tura henia namonamo totona, gau badana be emu kudouna lalonai ena kara namodia oi lalodia bada, unai dainai namona be Iehova ena kara oi diba namonamo. Unai do oi karaia totona, namona be ena Hereva bona Bible idia gwauraia bukadia oi stadilaia namonamo. Timoteo hegeregerena, namona be “Iesu oi abidadama henia, bona iena hadibaia hereva oi badinaia noho dainai, oiemu lauma [mauri] danu do oi ubua noho.” (1 Tim. 4:6) Bible be unai bamona oi stadilaia neganai, unai ese oi do ia durua “Iehova ena hairai” do oi itaia totona. (Sal. 27:4) Iehova oi diba namonamo neganai, do oi ura ia kahirakahira dekenai do oi mai.
4 Iehova do oi tura henia namonamo totona, namona be nega oi halusia bona oi gaukara goadagoada. Paulo ese Timoteo ia hamaoroa, ia gwau: “Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada ia lao noho.” (1 Tim. 4:15) Bema bapatiso oi do abia lasi, namona be oi gaukara goadagoada bena do oi hegeregere, sibona do oi gwauhamatalaia Dirava dekenai bona bapatiso do oi abia. Hari inai nega ena dokona be kahirakahira dainai, namona be ‘iseda kara ibounai do idia helaga be namo, bona Dirava do ita badinaia namonamo.’ (2 Pet. 3:11) Namona be ita diba Iehova be iseda Dirava bona iseda mauri taravatu ena Badina be gau badana. Bema Iehova ita tura henia, ita matauraia bona ita lalokau henia bada iseda tamana ita tura henia hegeregerena, iseda kara ese unai do idia hahedinaraia.—Mal. 1:6.
5 Dirava ena orea lalonai idia noho uhau bona ulato tausen momo ese edia goada, edia siahu bona edia lalo-goada idia gaukaralaidia haroro gaukara idia karaia totona. Kingdom Hall dekenai idia mai kongregesen ena hebou totona, bona edia lalona idia hegeregere bona idia hegaegae vadaeni hebou lalonai haere do idia henia totona. Matamata taudia tausen momo ese matamata taudia edia goada be pioneer gaukarana lalonai idia gaukaralaia. Hereva Lada-isidia 20:29 ese unai goada ia gwauraia “uhau edia hairai.” Ena be Dirava oi tura henia namonamo totona ena hesiai gaukarana lalonai do oi gaukara goadagoada, to hahenamo momo do oi davaridia!
6 Umui memero bona kekeni momo be mai emui Keristen tamadia bona sinadia, bona idia ese dala maorona umui dekenai idia hahedinaraia. Idia hahedinaraia dahaka dahaka umui karaia be namo, mauri dalanai do umui raka noho totona. Namona be emui tamadia bona sinadia umui kamonai henidia, Lohiabada lalonai. (Ef. 6:1) Umui idia lalokau henia bada bona idia ura emui mauri lalonai moale do umui davaria. Idia ura umui be tanobada matamatana lalonai do umui mauri noho, unai dainai namona be Bible stadi karaia totona idia gwauraia hidi negadia ai idia ida umui helai hebou. Namona be emui kudouna lalonai umui hamomokania bona hereva momokani umui abia dae. Iehova umui diba namonamo, bena ia do umui lalokau henia bona do umui hesiai henia ela bona hanaihanai.
[Questions]
1. (a) Iehova ese edena bamona taudia ia tura henidia? (b) Edena dala ai mero o kekeni ta be Iehova ena vairanai ia hairai diba?
2. (a) Badina be dahaka hari inai negai memero bona kekeni idia kara goeva be auka? (b) Ita kara goeva noho totona, ita iboudiai ese dahaka ita karaia be gau badana?
3. (a) Badina be dahaka Iehova ena kara ita diba be gau badana? (b) Edena dala amo unai diba ita abia? (c) Timoteo Ginigunana 4:6 ena hereva hegeregerena, memero bona kekeni ese dahaka idia karaia be namo?
4. Timoteo Ginigunana 4:15 ena hereva hegeregerena, Iehova ita tura henia namonamo totona, dahaka ita karaia be gau badana?
5. Hereva Lada-isidia 20:29 ena hereva, “uhau edia hairai,” ena anina be dahaka?
6. (a) Keristen tama sina momo ese edena dala ai Efeso 6:1 ena sisiba idia badinaia? (b) Badina be dahaka matamata taudia ese edia tamana bona sinana idia kamonai henidia be namo? (c) Unai dala amo dahaka do ia vara?