Daika Ita Badinaia be Namo?
1 Oi be daika oi badinaia? Oi be Iehova bona iena orea oi badinaia, a? Eiava emu Witness lasi varavara taudia oi badinaia? Eiava edia sene karadia oi badinaia, a?
2 Hahine toi be dala dekenai idia gini. Idia lalohisihisi. Hahine burukana, Naomi, be ena tano korikori dekenai ia giroa lou. Iena gabu be Betelehem, Iudea lalonai. Naomi ena ravana rua, Ruta bona Oropa, be Moab hahinedia. Naomi ia lao dainai, hetoho idia davaria. Daika do idia badinaia? Naomi bona iena Dirava Iehova do idia badinaia, bona ia danu Betelehem dekenai do idia lao, eiava edia varavara mai edia dirava koikoi momo dekenai do idia giroa lou, a?
3 Oropa ia laloa iena taunimanima mai edia dirava koikoi momo do ia badinaia. Mai ena tai danu Naomi ia bamahuta henia, bena ia raka lao iena tano, iena varavara, bona edia dirava koikoidia dekenai. Bible ese Oropa ia gwauraia lou lasi.—Ruta 1:14, 15.
4 Ruta be Naomi dekenai ia gwau: “Oi lau rakatania totona lau oi hagania lasi; badina oi lao gabuna ai do lau lao, bona oi mahuta gabuna ai do lau mahuta danu. Oiemu bese be lauegu bese ai do ia lao, bona oiemu Dirava be lauegu Dirava ai do ia lao.”—Ruta 1:16, 17.
5 Oibe, Ruta be Iehova bona ia idia tomadiho henia taudia ia badinaia. Iehova ia badinaia dainai davana namona ia abia. Edena bamona? Ia be David bona Iesu edia tubuna ta ai ia lao. Davana namona unai! Iehova be 2 Samuel 22:26 dekenai ita ia hamaoroa, ‘Lau ia badinaia tauna be lau ese do lau badinaia.’
6 To ita ta ta ibounai be edena bamona? Oi be Ruta bamona, eiava oi be Oropa bamona, a? Hetoho ia vara neganai, sibona dekenai do oi gwau: ‘Lau ese egu ruma bese bona varavara taudia edia namo lau laloa guna bena murinai Iehova lau laloa, a? Witness lasi varavara taudia lau bamodia momo, a? Bema unai bamona lau karaia, unai bamona hebamo karana ese lauegu abidadama karana do ia hamanokaia diba, a? Eiava Oropa bamona lau ese Iehova bona iena orea do lau rakatania diba, a?’ Momokani, ita be mai iseda maduna haida iseda Witness lasi varavara taudia dekenai, to iseda nega bada idia dekenai ita halusia, a?
7 Oi be oiemu moni bona nega oi gaukaralaia emu ruma bese taudia, hereva momokani idia abia dae vadaeni taudia unai, oi durua guna totona, a? Eiava oiemu ruma bese taudia oi laloa momo lasi, to oiemu vavana bona lalana bona varavara idauidau, hereva momokani idia abia dae lasi taudia unai, oi laloa momo, a? Oiemu moni oi gaukaralaia iseda haroro gaukara badana tanobada ibounai lalonai oi durua totona, a?—Mat. 24:14.
8 Lahidairi bona headava ariana be edena bamona? Oiemu varavara eiava hanua taudia ese oiemu lalona idia ania dainai Iehova ena taravatu oi badinaia lasi bona sene karana haida, hegeregere lauma dikadia badinaia karana, oi karaia, a? Eiava mai emu abidadama danu do oi hereva goadagoada, oi gwau: “Lasi! Unai bamona lau karaia diba lasi! Unai bamona kara be Iehova Dirava ena taravatu ia utua!” Eiava, ta ese buatau oi ia henia neganai, oi abia bona oi sibona dekenai oi gwau, ‘Lau abia ia badu garina, to ia itaia lasi neganai gabeai do lau negea,’ a? Namona be oi gwau: “Lasi, lau be Iehova ena Witness tauna bona Bible ia gwau gau haida ai dadaraia ai goeva totona be namo.”—Isa. 52:11.
9 Oiemu natudia be Witness lasi memero bona kekeni idia bamoa momo, a? Reana oi laloa Witness lasi natudia haida edia kara be namo herea, to Iehova ena Witness natudia haida edia kara be namo momokani lasi. To Witness lasi taudia be Iehova Dirava idia tomadiho henia, a? Bema oi ura emu natudia be Witness lasi taudia idia bamoa momo, idia bada neganai dahaka do ia vara? Oiemu natudia be reana do idia ura Witness lasi taudia do idia adavaia. (2 Korinto 6:14-17) Tama sina taudia ese gwaumaoro idia henia neganai edia natudia be Witness lasi taudia idia bamoa totona, idia be Iehova idia badinaia, a? Ruta ia ura Iehova ena taunimanima ia tura henidia. Iehova ese ia dekenai adavana namona ia henia. David ia hereva bamona, ia gwau: “Kara maoromaoro tauna [Dirava] ese ia kara maoromaoro henia.”—2 Sam. 22:26.
10 Momokani, Iehova bona iena taunimanima oi badinaia neganai, reana oiemu varavara eiava Witness lasi taudia do idia badu bona oi do idia moale henia lasi. Oi idia doria dainai Iehova bona ena taunimanima badinaia karana do oi rakatania, a? Salamo 37:28 dekenai Iehova ese Ruta bamona taudia ia herevalaia inai bamona, ia gwau: “Badina Iehova ese kara maoromaoro ia ura bada, bona ena abidadama taudia do ia rakatania lasi. Ia naridia hanaihanai; to kara dika taudia edia natudia do ia utua oho.”
[Questions]
1. (a) Taunimanima ese daika daika idia badinaia diba? (b) Oi laloa daika ita badinaia be aonega dalana?
2, 3. (a) Oropa ese dahaka ia abia hidi? (b) Dahaka dainai Bible ese Oropa ia gwauraia lou lasi?
4. (a) Ruta ia ura daika ia bamoa? (b) Ia ura daika ia tomadiho henia? (c) Dahaka dainai oi laloa unai hebamo bona tomadiho ia abia hidi be aonega karana?
5. (a) Ruta ese dahaka davana namona ia abia? (b) Dahaka dainai oi laloa bema Iehova oi badinaia hanaihanai davana namona oi dekenai do ia henia?
6. (a) Dahaka dainai Oropa bamona ita karaia be aonega dalana lasi? (b) Dahaka dainai Ruta bamona ita karaia be aonega dalana?
7. (a) Daidia be iseda nega bona moni amo ita durudia guna be namo? (b) Unai dekenai reana dahaka hetoho ita davaria diba?
8. Isaia 52:11 ese ita ia sisiba henia ita “goeva” totona. Ita “goeva” totona ita dadaraia karadia haida mani oi gwauraia.
9. (a) Dahaka dainai tama sina iboudiai ese 2 Korinto 6:14-17 idia laloa namonamo be namo? (b) Unai siri be edena negai idia laloa namonamo be mai anina bada?
10. (a) Ita ta ta ibounai be dahaka hetoho badana do ita davaria? (b) Dirava idia badinaia lasi taudia dekenai dahaka ia vara? (c) Ia idia badinaia taudia dekenai Iehova ena gwauhamata be dahaka?
This article is unique to PNG.