September Ena Hesiai Hebou
August 31 ai Ia Matamaia Purana
Ane 43 (58)
10 min: Kongregesen ena hadibaia herevadia.
20 min: “Oi Ura Karaia Gaudia Gwauraia Guna, Emu Abidadama Ia Goada Totona.” Hebou vairanai idia duahiduahi namonamo diba taudia oi abia hidi, paragraf do idia duahia totona. Bena matamata taudia, tama sina, hesiai taudia bona pioneer taudia oi noia, idia ura karaia gaudia do idia gwauraia hedinarai totona.
15 min: Dina Ta Ta Iboudiai Edia Heduru Lauma Dalanai Ita Goada Totona. Tadikaka ta ese pablisa namodia rua eiava toi danu idia herevahereva. Tadikaka bona taihu ta ta sibona sibona bona ruma bese iboudiai be daba ena siri, lagani ena siri badana, bona kalenda ena sivarai amo dahaka heduru idia davaria diba do oi hahedinaraia. Iehova ena amo heduru hereva ita abia hanaihanai be gau badana. (Sal. 119:2; 1 Pet. 1:12, 13; Kara 17:11) Heduru hereva ita abia hanaihanai ese ita idia hagoadaia bona haroro gaukara dekenai ita idia durua oi hahedinaraia.
Ane 128 (89) bona guriguri.
September 7 ai Ia Matamaia Purana
Ane 145 (115)
5 min: Kongregesen ena hadibaia herevadia.
20 min: Oi Sibona Emu Ura Oi Dadaraia! Inai hereva be February 1, 1992 Gima Kohorona, rau 25-28 amo oi hegaegaelaia. Oi hahedinaraia ita sibona eda ura ita dadaraia karana be ita sibona ita biagua karana ta lasi, to ia be Keristen ena taravatu ta. Tauanina ena kohu bona moale karadia ita reaia neganai Basileia ena gaukara ita karaia guna totona, namo sibona ita davaria.
20 min: Medical Pepa Matamatana. Kongregesen seketere ese inai hereva do ia henia. Namona be seketere ese unai Medical Pepa be idia bapatiso kongregesen taudia sibona dekenai ia henidia. Unai nega lalonai danu Witness tama sina iboudiai dekenai Identity Card do ia henidia edia bapatiso lasi natudia iboudiai totona. Unai ia karaia murinai seketere ese Association ena revareva, August 1, 1992 gauna, “Kongregesen Iboudiai Dekenai” do ia duahia bona ena anina ia kikilaia. Do ia hahedinaraia goevagoeva unai Card hamomokania totona idia sainia taudia rua be Card eiava Medical Pepa biaguna ia sainia neganai idia raraia namonamo. Ia hahedinaraia tadikaka bona taihu ese unai hahegani idia badinaia be gau badana unai Card idia gaukaralaia namonamo bona ia dainai heduru idia abia totona. Hebou murinai, unai Card torea totona, namona be elda taudia bona lo taudia ese nega idia atoa pablisa taudia idia durudia totona.
Ane 113 (62) bona guriguri.
September 14 ai Ia Matamaia Purana
Ane 55 (18)
10 min: Kongregesen ena hadibaia herevadia. Akaun ripotina gwauraia.
20 min: Dirava Kamonai Henia o Tauanina Hagoadaia? Edena be Namo? Dahaka Dainai? Inai hereva do oi hegaegaelaia Memero Kekeni buka Karoa 16 amo. Kongregesen ena memero bona kekeni be sisiba namona amo bona hagoadaia herevadia amo oi durudia.
Hereva oi henia neganai, henunai ai torea hereva bona Bible siridia oi gaukaralaidia diba.
1. Edena bamona ita diba Dirava ia ura memero bona kekeni ese edia mauri idia moalelaia.
2. Moale karadia ita karaia kerere garina, dahaka sisiba namona ia noho 1 Timoteo 4:7 bona 8 dekenai?
3. Dahaka dainai sikuli ena tim lalonai spot gadara ita karaia be aonega dalana lasi?
4. ‘Emu lalona dekenai oi atoa gaudia hegeregeredia emu kara do oi karaia.’ TV bona video raraia, buka bona magasin duahidia, bona ma gau haida ese iseda lalona idia hadikaia diba dalana oi hahedinaraia.
5. Edena gadara bona moale karadia namodia ita karaia diba? (Oiemu gabu dekenai idia karaia diba gaudia oi herevalaia.)
15 min: September 1992 Dekenai Hesiai Laganina 1993 Ia Matamaia. Kongregesen ena Hesiai Gaukara Komiti idia hebou, bona kongregesen ena gaukara 1993 ena hesiai laganina lalonai dohore idia karaia gaudia, do idia kikilaia. Kongregesen ena gunalaia tauna ese unai hebou ia naria.
Reana do idia kikilaia gaudia be inai:
Kongregesen idia hanamoa, badina lagani 1992 hesiai laganina ai gaukara namona idia karaia dainai.
Kongregesen ese ena gaukara haida ia hanamoa bona ia habadaia. Reana kongregesen lalonai inai gaudia edia namba ia bada daekau: pablisa, haroro gaukara ena hora, lou-henia, Bible stadi, magasin, bona unai bamona gaudia ma haida.
Lagani 1993 ena hesiai lagani matamatana lalonai kongregesen taudia be edena bamona edia gaukara do idia hanamoa diba umui kikilaia?
Ane 38 (65) bona guriguri.
September 21 ai Ia Matamaia Purana
Ane 132 (70)
10 min: Kongregesen ena hadibaia herevadia.
20 min: Lalokau Dalana amo Sisiba Henia Karana Ena Namo. Inai hereva be Ruma Bese bukana Karoa 10, paragraf 1-16 amo oi karaia, tadikaka haida oi boiridia mai platfom dekenai oi henanadai henidia totona.
Hereva oi henia neganai henunai oi torea gaudia oi kikilaidia:
1. Sisiba henia karana dekenai taunimanima idia gwauraia herevadia bona Bible ia gwauraia herevadia edia idau be dahaka?
2. Edena dala idauidau amo ‘sisiba auna’ oi gaukaralaia diba?
3. Dahaka dainai ruma bese taudia haida ese raskol karadia idia karaia?
4. Tamana bona sinana ese inai hereva: “Oiemu hereva Oibe, ia Oibe be namo,” idia laloa bada, a?
5. Natudia be edena bamona tamadia bona sinadia idia moalelaidia?—Her. 29:17; Heb. 12:11.
6. Tamana bona sinana be edena bamona natudia idia moalelaidia?
Kara namo memero bona kekeni haida oi boiridia mai bona henunai ai torea henanadaidia oi henidia. (Namona be inai henanadai idia diba guna):
1. Oiemu lalohadai be dahaka emu tamana bona sinana be oi idia sisiba henia neganai?
2. Oi idia henia taravatudia haida be dahaka?
3. Dahaka hahenamo haida oi davaria emu tamana bona sinana edia hereva oi badinaia dainai?
4. Oi laloa dahaka sisiba ese memero bona kekeni iboudiai ia durudia diba?
Edia natudia idia hadibadia namonamo tamadia bona sinadia haida oi henanadai henidia. Henunai ai toredia henanadaidia oi henidia diba:
1. Dahaka taravatu oi atoa emu natudia idia badinaia totona?
2. Idia kerere neganai, edena dala amo sisiba oi henidia?
3. Edena bamona emu natudia oi hadibadia Dirava ese idia ia lalokau henidia totona, idia oi lalokau henidia totona, bona kongregesen taudia idia lalokau henidia totona?
15 min: Iseda Orea Ena Sivarai. Bema mai ena dala blakbod dekenai mapu oi torea inai gabu idauidau hahedinaraidia totona.
Ane 191 (103) bona guriguri.
Congo: Ai moale badina Congo ena People’s Republic gavamani ese November, 1991 ai, gwaumaoro idia henia Iehova ena Witness taudia idia gaukara totona. Tadikaka bona taihu iboudiai idia moale badina hehuni lasi dekenai edia hebou iboudiai idia karaia diba bona ruma ta ruma ta haroro gaukarana idia karaia diba danu.
Peru: December 1991 ai, edia pablisa iboudiai be 39,104, unai namba be December 1990 dekena amo 12 pesen amo ia bada daekau. Bona hoa gauna ta be inai, unai namba amo 23 pesen be pioneer taudia, edia namba be 8,842.
Korea: January lalonai edia pablisa idia daekau 68,310 dekenai. Kongregesen 7 edia bapatiso pablisa taudia iboudiai be nega ibounai hesiai gaukarana idia karaia. Kongregesen ta ena ripoti ia hahedinaraia edia regular pioneer taudia be 12, heduru pioneer taudia be 15 bona pablisa ta be lasi.
Lagani 1992 Yearbook lalonai Korea dekena amo inai ekspiriens idia torea, rau 46 bona 47 dekenai:
Korea dekenai taihu ta ena Medical Pepa ia loalaia dainai ia mase lasi. Ia ese ena motuka amo ia diho neganai, raskol tatau hani ese idia dogoatao, bona idia doria vareai motuka ena murina kahana foloa dekenai. Ia ese ena rini bona moni puse ia henidia do idia ruhaia totona, to idia ura lasi. Mai lalo-hekwarahi danu ia gari badina ia laloa do idia hadikaia gwauraia. Unai dainai ia boiboi badabada. Unai taudia ta ia gwau “Do ita alaia be namo.” Bena kaia amo ena aena bona ena mamuna dekenai idia gwadaia. Bona gau ta amo ena matana idia koua bona ena aena rua idia kwatua. Ia gari dikadika dainai mai ena taitai danu gado badana dekenai ia guriguri, bona ia ese Iehova ena ladana ia boiboilaia.
Kara haraga, unai tatau idia regerege lasi. Murinai idia ta ia gwau: “Oi be Iehova ena Witness kekenina ta, a?” Idia ese iena puse idia kehoa neganai ena Medical Pepa idia davaria. Vadaeni idia gwau do idia hamasea lasi, to motuka idia taria lao ena ruma kahirakahira dekenai bona motuka dekenai idia rakatania, bona idia heau boio. Unai taihu ia guriguri noho unai raskol taudia be do idia helalo-kerehai bena Iehova ena tomadiho lalonai do idia vareai totona.