Rara Henia Hanai Karana amo Emui Natudia Umui Gimaia

¹ “Kamonai! Iseda natudia be Dirava ena harihari gauna ita dekenai.” (Sal. 127:3) Bema Iehova amo unai bamona harihari gauna umui abia, umui tama sina be mai emui maduna emui natudia umui hadibaia, naria, bona gimaia. Unai maduna umui moalelaia to umui laloa bada danu be gau badana. Hegeregere, dala umui hegaegaelaia vadaeni rara henia hanai karana amo emui natuna maragidia umui gimaia totona, a? Emui natudia be dahaka do idia karaia bema doketa idia ura rara do idia henia hanai? Ruma bese ida umui herevahereva hebou vadaeni dahaka do umui karaia diba, hekwakwanai badana neganai rara henia hanai karana do umui koua totona, a?

² Emui ruma bese ida unai gaudia umui hegaegaelaia be lalo-hekwarahi eiava lalo-metau gauna lasi. Momokani, mauri lalonai idia vara gaudia ibounai totona umui hegaegae diba lasi, to umui tama sina be gau momo umui hegaegaelaia diba, rara henia hanai karana amo emui natudia umui gimaia totona. Unai maduna umui huaia lasi neganai, emui natuna be medikol heduruna ia abia neganai reana rara do idia henia hanai. Dahaka umui karaia diba?

³ Emui Lalona Umui Hadaia Momokani be mai Anina Bada: Namona be umui sibona emui lalohadai ena goada Dirava ena rara taravatuna dekenai umui laloa namonamo. Emui natudia umui hadibaia unai gauna dekenai Iehova do idia kamonai henia, hegeregere iena taravatu henaohenao, kara maoromaoro, gini siri karana, bona mauri ena gaudia ma haida dekenai umui hadibaia bamona, a? Momokani iseda lalohadai be Dirava ena taravatu Deuteronomi 12:23 hegeregerena, a? Ia gwau: ‘Umui naria namonamo, rara do umui ania lasi.’ Siri 25 ma ia gwau: “Do umui ania lasi, vadaeni do umui namo, umui bona emui natudia bona tubudia ibounai, Lohiabada ena vairana dekenai umui be maoromaoro dainai.” Reana doketa do ia gwau emui gorere natuna be rara ia abia dainai ‘do ia namo,’ to gau badana be hekwakwanai badana ia do vara lasi neganai, emui lalona umui hadaia umui sibona bona emui natudia be rara do umui dadaraia. Unai neganai emui hetura karana Iehova dekenai umui laloa bada to iena taravatu utua karana, idia gwauraia mauri halataia daladia ibounai, umui laloa maragi. Dirava ese ita do ia lalo-namo henia bona gabeai mauri hanaihanai do ita abia bema ena taravatu ita badinaia!

⁴ Oibe, Iehova ena Witness taudia ese mauri idia laloa bada. Idia ura lasi idia mase. Idia ura do idia mauri, bena Iehova do idia hanamoa bona iena ura do idia karaia. Unai dainai heduru abia totona hospital dekenai idia lao bona edia natudia idia abia lao. Idia ese doketa taudia edia heduru idia tahua, bona bema idia gwau heduru dalana be rara do idia henia, Witness taudia ese rara lasi medikol heduru idauna idia tahua. Ma heduru idaudia momo idia noho. Diba bada doketa taudia ese unai gaudia idia gaukaralaia noho. Unai heduru idaudia be koikoi gaudia lasi to ladana bada medikol magasin lalodiai medikol heduru namodia bona edia gaukaralaia daladia idia herevalaia. Tanobada hegegemadai doketa tausen momo be iseda lalohadai idia abia dae bona rara henia hanai lasi dalanai medikol heduru namona idia henia, to rara gaukaralaia lasi dalanai Witness natudia do idia durua doketa ita davaridia be auka.

⁵ Iseda Ura Ia Abia Dae Doketa Tahua: Doketa ese gorere taudia idia durua neganai edia lalo-hekwarahi be idauidau, bona umui noia rara henia hanai lasi dalanai emui natuna do idia durua unai ese edia lalo-hekwarahi ia habadaia. Doketa haida idia gwau tatau bona hahine badadia edia ura rara dekenai idia matauraia bona do idia durua diba bema release fom maorona do idia sainia. Unai hegeregerena, haida ese natudia do idia durua bema idia hahedinaraia idia lalo-parara bona edia lalona idia hadaia auka vadaeni, badina kota haida idia gwau unai bamona natudia be mai edia maoro medikol daladia do idia abia hidi. (The Watchtower, June 15, 1991, rau 16-17 itaia lo natuna edia anina oi diba totona.) To, bema gwaumaoro idia abia lasi rara do idia henia totona, reana doketa do idia ura lasi natuna maragidia bona beibi idia durua. Momokani, natuna idia durua neganai, herevana dahaka do ia vara, rara do idia gaukaralaia lasi be doketa haida sibona ese do idia gwauhamatalaia. Gorere taudia durua daladia bona gavamani ena taravatu idia laloa dainai, doketa momo idia laloa unai bamona gwauhamata idia henia diba lasi. To, sisina momo idia ura Iehova ena Witness taudia edia natudia idia durua bona iseda ura rara dekenai idia matauraia toho.

⁶ Unai dainai, edena bamona bema, emui natuna totona doketa namona umui tahua neganai, doketa ta umui davaria, nega momo Iehova ena Witness taudia edia ura ia abia dae bona guna Witness taudia ma haida be unai bamona rara henia lasi karana amo ia durua tauna, to ia laloa gavamani ena taravatu dainai rara do ia henia lasi gwauhamatana ia karaia diba lasi? To, umui dekenai ia gwau ia laloa inai negai danu hekwakwanai do ia vara lasi. Reana umui laloa unai be dala namona. Unai bamona ia vara neganai reana umui laloa gwaumaoro do umui henia emui natuna do ia durua. To, umui hahedinaraia goevagoeva, gwaumaoro umui henia emui natuna be medikol dalanai do ia durua, to gwaumaoro umui henia lasi rara do ia henia hanai. Unai dala umui abia hidi be emui maduna ta bena ta do ia laloa lasi rara taravatuna umui utua.

⁷ Momokani, bema unai hekwakwanai, rara do idia gaukaralaia hekwakwanaina, ia hamaragia eiava kokia totona durua dalana ma ta umui davaria diba, reana unai do umui abia hidi. Gau badana be umui goada karaia, rara henia lasi gwauhamatana ia badinaia auka doketa ta eiava ivaia doketa ta umui davaria totona. Heduru gauna badana be hekwakwanai totona umui gini hegaegae. Dala iboudiai umui tahua emui ura do ia abia dae doketa ta umui davaria totona. Bema mai dalana, emui ura idia abia dae lasi doketa bona hospital umui dadaraia.

⁸ Tano haida dekenai, edena dala ai hospital ena heduru davana do umui karaia ese rara do idia henia hanai eiava lasi karana ia haidaua diba. Bema tama sina be mai edia helt insurens eiava sekuriti ma ta bona ia gwau idia edia ura hegeregerena doketa ta idia abia hidi diba, iseda ura idia abia dae lasi doketa eiava hospital gaukara taudia amo natudia idia gimaia be hekwarahi badana lasi. Nega momo bema famili be ia hegeregere heduru davana ibounai do idia henia, doketa bona hospital ese famili idia durua bona edia ura idia abia dae. Danu, nega momo hospital ma ta eiava doketa ma ta be natuna ia abia dae bona ia durua bema tama sina ese heduru ena davana idia karaia diba. Umui rogorogo hahinedia e, gau badana be emui tauanina umui naria namonamo! Unai be heduru badana mara haraga bona unai amo idia vara hekwakwanai koudia totona, badina idia vara haraga beibi bona edia hekwakwanai idia durua lalonai nega momo rara idia gaukaralaia.

⁹ Nega haida doketa idia maumau, idia gwau Iehova ena Witness taudia ese edia lalohadai rara dekenai idia herevalaia haraga lasi. Unai bamona do ia vara lasi be namo. Witness tama sina be hospital dekenai idia lao eiava doketa ena heduru idia tahua neganai, namona be idia karaia gau ginigunadia ta be edia lalohadai rara dekenai do idia herevalaia. Bema opereisini do idia karaia, karaharaga anesthetic ia henia doketa ida umui herevahereva. Reana ivaia doketa ese umui ia durua diba unai umui karaia totona. Hospital vareai fom umui duahia namonamo be namo. Umui be mai emui maoro umui abia dae lasi herevadia umui makaia oho. Daradara ibounai kokia totona, vareai fom dekenai do umui torea goevagoeva, herevana dahaka do ia vara, tomadiho bona medikol badina idauidau dainai, rara umui ura lasi momokani bona gwaumaoro umui henia lasi rara do idia henia hanai totona.

¹⁰ Heduru Iehova Ena Orea Amo: Iehova ena orea ese dahaka heduru idia henia rara amo emui natudia umui gimaia totona? Heduru be momo. Society ese ita ia hadibaia totona rara bona rara lasi heduru idauna idia herevalaia gaudia momo ia halasia. Umui ese Iehova Ena Witness Taudia bona Lalohadai Haida Rara Dekenai buklet bona unai gaudia idia herevalaia buka ma haida umui stadilaia vadaeni. Bona emui kongregesen lalonai tadikaka bona taihu ese umui idia durua bona hagoadaia diba. Hekwakwanai ia bada neganai, bema elda taudia idia laloa idia karaia be namo, namona be hanaihanai elda ta bona gorere tauna ena tama sina eiava famili tauna ta be ia danu hospital dekenai do idia noho. Nega momo varavara bona tura iboudiai be hanuaboi ai ruma dekenai idia giroa murinai, doketa ese rara idia henia hanai.

¹¹ Papua New Guinea lalonai, Hospital Liaison Committee toi be siti badadia lalonai idia noho. Kongregesen iboudiai be komiti ta ese ia naria, unai komiti tadikaka ese treinini idia abia vadaeni bona heduru do idia henia diba. Edia heduru umui ura neganai, emui elda taudia amo idia umui boiria. Hekwakwanai maragidia totona idia do umui boiria lasi, to bema umui itaia hekwakwanai badana do ia vara umui naria daudau lasi bona umui boiridia. Nega momo idia ese iseda ura idia abia dae doketa edia ladana idia henia bona heduru idaudia idia gwauraia diba. Bema idia mai be namo bona mai dalana, unai tadikaka idia hegaegae do idia mai bona hekwakwanai hanamoa dalana do idia tahua.

¹² Kota Totona Laloa Hegaegae Bona Emui Kara: Edena bamona bema doketa ta eiava hospital ta ese kota oda idia ura idia abia emui natuna dekenai rara do idia henia hanai totona? Do umui laloa gau ma ta do umui karaia diba lasi bona emui hekwarahi do umui hadokoa, a? Lasi momokani! Rara henia hanai karana do umui koua diba. Unai ia vara garina namona be umui hegaegae guna. Dahaka umui karaia diba?

¹³ Hospital bona hahemaoro taudia idia laloa bada hakaua taravatudia umui lalo-pararalaia ese umui do ia durua bada emui maoro do umui hamomokania totona. Unai bamona mai anina bada hakaua taravatuna ta be inai, taravatu ese tama sina edia siahu dekenai edia natudia totona medikol heduruna idia abia dae eiava idia dadaraia ena hetoana ia atoa. Ena be tatau bona hahine badadia be mai edia maoro edia ura hegeregerena ai medikol heduruna idia abia dae eiava idia dadaraia, to tama sina be mai edia maoro lasi natuna ena namo totona doketa ia gwauraia mai anina bada heduruna idia dadaraia, ena be edia tomadiho lalohadai momokanina dainai idia dadaraia.

¹⁴ Unai hakaua taravatu badana be lagani 1944 ai, U.S. Supreme Court ena lalohadai lalonai ia hedinarai, ia gwau: “Tama sina be edia ura hegeregerena edia abidadama idia badinaia auka dainai idia be mase taudia ai idia lao diba. To idia be unai bamona edia ura hegeregerena, unai kara tamona ai, edia natudia be edia abidadama badinaia auka dainai idia mase taudia ai idia halaoa diba lasi, ela bona taravatu lalonai natudia edia aonega be hegeregere sibona edia lalona idia hadaia.” Unai lalohadai badana natuna ena helt bona noho dalana naria totona be iseda nega ena natuna-naria taravatudia lalonai idia noho. Unai taravatu, natuna hadikaia karadia koua taravatudia, idia gaukaralaia danu natudia be medikol dalanai heduru maorona idia abia lasi karana amo natudia idia gimaia totona.

¹⁵ Tama sina ese natudia idia kara dika henia eiava naria lasi karadia amo natudia gimaia taravatu be Keristani tama sina ese idia dadaraia lasi. To natudia naria lasi karana koua taravatudia bona ia noho Supreme Court ena hereva be nega momo Iehova ena Witness taudia edia natudia edia kota dekenai idia gaukaralaia dalana be kerere. Badina be dahaka? Badina ta be, Witness tama sina idia ura lasi edia natudia be edia “abidadama badinaia” karana amo idia mase. Bema idia ura, dahaka dainai edia natudia be hospital dekenai idia abia lao? To idau, Witness tama sina ese mai edia ura ida medikol heduruna idia tahua edia natudia totona. Edia natudia idia lalokau henia bona idia ura do idia namo. To idia diba idia be mai edia maduna Dirava amo, edia natudia ia durua momokani medikol heduruna do idia abia hidi. Idia ura edia natudia edia gorere ena heduru be rara lasi dalanai idia abia. Rara lasi heduru idauna be namo bona hekwakwanai badadia ia havaraia lasi, unai dainai ia ese rara ena namo ia hanaia, to unai sibona lasi, gau badana be unai amo edia natudia be Mauri Henia Tauna badana, Iehova Dirava, ena lalo-namo idia abia.

¹⁶ Ena be rara lasi medikol heduru ena namo be bada, to doketa bona natuna-naria welfea taudia momo idia laloa medikol heduru lalonai rara henia hanai karana be mai anina bada bona nega haida taunimanima ia hamauria. Unai dainai, Witness tama sina ese rara henia hanai karana idia dadaraia neganai, hekwakwanai idia vara diba. Ita gwau diba, gavamani ena taravatu hegeregerena, doketa ese natudia dekenai kara ta idia karaia diba lasi bema tama sina edia gwaumaoro idia abia lasi. Tama sina edia gwaumaoro, rara gaukaralaia gwaumaorona idia abia lasi neganai, doketa eiava ma hospital gaukara taudia ese reana hahemaoro tauna ena gwaumaoro idia tahua bona kota oda idia abia. Unai bamona kota ia henia gwaumaorona be natuna-naria welfea taudia eiava doketa eiava hospital gaukara taudia ese idia abia diba medikol dalanai naria lasi karana amo natuna idia gimaia totona.a

¹⁷ Nega momo rara gaukaralaia gwaumaorona ena kota oda idia abia haraga bona tama sina be nega kwadogi sibona lalonai idia hadibaia eiava idia hadibaia lasi vaitani. Doketa taudia, hospital gunalaia taudia, eiava natuna-naria welfea taudia ese unai bamona kota oda idia abia haraga karana idia hamaoromaoroa totona idia gwau emergency dainai nega be ia hegeregere lasi idia karaia karana be tama sina dekenai idia hadibaia. To, nega momo unai kara idia tahua neganai, doketa idia gwau emergency ia vara momokani lasi to idia ura kota oda idia abia badina “reana” gabeai idia laloa rara do idia henia hanai karana do idia gaukaralaia. Umui be tama sina dainai, nega ibounai umui be mai emui maoro doketa taudia, hospital gunalaia taudia, eiava natuna-naria welfea taudia edia kara emui natuna dekenai do umui diba. Taravatu hegeregerena, bema mai dalana, umui idia hadibaia be gau badana bema kota oda idia tahua bona kota dekenai umui ese emui lalohadai unai kara dekenai umui hahedinaraia.

¹⁸ Unai bamona hekwakwanai kota dekenai idia vara dainai ia hedinarai goevagoeva, namona be emui ura ia abia dae doketa ta umui tahua. Ia ida do umui gaukara hebou, bona Hospital Liaison Committee ena memba taudia edia heduru ida, ia umui durua emui natuna ena medikol hekwakwanai dekenai rara lasi heduruna do ia henia totona, eiava emui natuna be unai heduru do ia henia doketa ta eiava hospital ta dekenai do ia siaia. To bema toana be doketa, hospital biagua tauna, eiava natuna-naria welfea tauna ese kota oda abia ia lalohadailaia, namona be maoromaoro do umui nanadaia bema unai idia palanilaia. Nega momo hunia dalanai telefon amo unai idia karaia. Bema palani idia karaia kota dekenai idia lao totona idia umui hadibaia goevagoeva umui ura unai do umui diba, hahemaoro tauna dekenai emui lalohadai do umui hahedinaraia diba totona. (Aon. 18:17) Nega momo, bema nega ia hegeregere, loea ena heduru umui tahua be namo. Nega haida kota ese loea tauna ia abia hidi. Bema umui be mai emui loea eiava kota ia abia hidi loea ia noho, Society ena Legal Department ese ia idia hadibaia bena kota dekenai dala namona ai emui maoro do ia hamomokania.

¹⁹ Bema rara umui dadaraia dainai unai be kota dekenai do idia abia lao, doketa ena lalohadai, emui natuna ena mauri eiava ena namo totona rara be mai anina bada lalohadaina, be lalona veria dalanai ia gwauraia diba. Hahemaoro tauna be medikol gaudia ia diba momo lasi dainai, nega momo doketa ena hereva medikol karadia dekenai do ia abia dae. Unai be momokani bema tama sina ese edia lalohadai idia hahedinaraia totona nega sisina idia henia eiava nega idia henia lasi bona ta ese doketa ena hereva ia hakoikoia lasi neganai, ia ese ena lalohadai, rara idia henia “haraga” ena anina bada lalohadaina ia gwauraia diba. Unai bamona lalohadai tamona sibona hahedinaraia karana ese hereva momokani idia davaria karana ia durua lasi. Inai be momokani, edena negai bona dahaka dainai doketa idia laloa rara be mai anina bada be idia ta ta edia lalohadai hegeregerena. Nega momo, doketa ta ia gwau rara be gau badana natuna hamauria totona neganai, doketa ma ta, unai medikol hekwakwanai tamona be rara lasi heduruna amo ia hanamoa diba momo doketa ta, ia gwau unai gorere natuna durua totona rara be anina lasi.

²⁰ Dahaka do umui karaia bema loea eiava hahemaoro tauna be umui ia nanadaia dahaka dainai “hamauria” rara henia hanai karana be emui natuna amo umui koua? Ena be reana maoromaoro umui ura emui lalohadai toreisi lou dekenai bona emui abidadama, bema emui natuna ia mase Dirava ese do ia hatoreaisi lou, umui herevalaia, to unai haere ese hahemaoro tauna, natuna ena namo ia laloa bada tauna, ena lalona do ia veria lasi. Do ia laloa umui be tomadiho goadalaia kava taudia bona namona be ia ese kara ta do ia karaia emui natuna do ia gimaia totona.

²¹ Namona be kota do ia diba, ena be tomadiho lalohadai goadana dainai rara umui dadaraia, to umui ese medikol heduruna ibounai umui dadaraia lasi. Gau badana be hahemaoro tauna do ia itaia umui be natuna naria lasi eiava natuna hadikaia tama sina lasi, to idau, umui be emui natuna totona heduru umui tahua lalokau tama sina. To umui laloa rara henia hanai karana ese ia havaraia dika be ena namo ia hanaia, bona unai umui laloa bada badina dika idia havaraia lasi medikol heduru idaudia idia noho.

²² Bema ia hegeregere, reana hahemaoro tauna do umui hadibaia doketa tamona ia gwau rara be mai anina bada, to doketa edia lalohadai be idauidau, bona umui ura rara lasi medikol heduruna ia gaukaralaia doketa tauna do umui tahua emui natuna do ia durua totona. Hospital Liaison Committee ena heduru amo, reana rara lasi dalanai emui natuna do ia durua doketa umui davaria vadaeni bona reana ia ese kota dekenai telefon amo umui ia durua herevana ia henia diba. Reana liaison komiti ese hahemaoro tauna dekenai​—reana kota oda ia tahua doketa dekenai danu​—emui natuna ena medikol hekwakwanai be rara gaukaralaia lasi dalanai idia hanaia medikol hereva haida idia hahedinaraia diba.

²³ Hahemaoro taudia be kota oda do idia karaia haraga neganai, nega momo idia ese rara ia havaraia hekwakwanai, AIDS, hepataitis, bona ma dika momo idia laloa lasi eiava ta ese idia ia hadibaia lou lasi. Umui ese unai gaudia be hahemaoro tauna dekenai umui herevalaia diba, bona ia umui hadibaia diba danu umui Keristani tama sina, umui laloa tau ta ena rara gaukaralaia ma ta hamauria totona be Dirava ena taravatu ia utua karana badana bona emui natuna idia doria rara ia abia totona be hegeregere hahine hadikaia karana bamona. Umui bona emui natuna (bema ia hegeregere sibona ena lalona ia hadaia totona) be rara henia hanai karana amo tauanina idia hadikaia karana umui inai henia momokani ena badina do umui gwauraia hedinarai bona hahemaoro tauna umui noia kota oda ta do ia henia lasi to gwaumaoro do ia henia medikol heduru idauna emui natuna totona do umui tahua.

²⁴ Dala maorona ai emui maoro umui hamomokania toho neganai, hahemaoro taudia ese lalohadai idauna, umui tama sina​—emui lalohadai​—do idia itaia. Bena rara henia hanai gwaumaorona idia henia haraga lasi. Kota herevadia haida lalonai hahemaoro taudia ese doketa edia rara gaukaralaia karana idia koua, danu idia gwau namona be heduru idaudia idia laloa guna, eiava tama sina dekenai nega idia henia rara ia gaukaralaia lasi doketa idia tahua totona.

²⁵ Rara henia hanai karana doria dalana idia tahua taudia ida umui hereva neganai, gau badana be hanaihanai umui hahedinaraia emui lalona umui hadaia auka vadaeni. Hahemaoro taudia (bona doketa taudia) be nega haida idia nanadaia bema ia hegeregere tama sina ese edia maduna, rara gaukaralaia dekenai edia lalona idia hadaia maduna unai, be idia dekenai idia ‘henia’ idia laloa unai neganai tama sina edia lalona ese do idia hadikaia lasi. To namona be iboudiai umui hadibaia goevagoeva, umui tama sina, umui laloa ia be emui maduna gau ibounai do umui karaia noho rara henia hanai karana do umui dadaraia totona. Unai be Dirava ia henia maduna umui dekenai. Unai be ma ta dekenai umui henia diba lasi.

²⁶ Unai dainai, doketa bona hahemaoro taudia ida umui herevahereva neganai, namona be umui hegaegae emui lalohadai do umui gwauraia goevagoeva bona umui hamomokania totona. Bema kota oda idia henia ena be umui hekwarahi bada, doketa umui noia noho rara do ia henia lasi bona umui hagoadaia noho heduru idauna do ia gaukaralaia. Ena lalona umui veria toho medikol hereva haida ia laloa totona bona unai medikol hekwakwanai idia ura durua doketa edia heduru do ia tahua, rara henia hanai karana dadaraia totona. Nega ta sibona lasi to nega momo, ena be toana be doketa ese iseda lalohadai ia abia dae lasi, to ivaia daiutuna ia rakatania murinai mai heagi ida ia gwau rara ia gaukaralaia lasi. Unai dainai, ena be kota oda idia henia vadaeni, to oi goada karaia noho!​—June 15, 1991, ena The Watchtower, “Questions From Readers” itaia.

²⁷ Umui laloatao, Iesu ia gwau: “To taunimanima dekenai do umui naria namonamo. Badina be idia ese kaunsolo edia vairana dekenai do idia hakaua umui . . . Lohia bona king edia vairana dekenai do idia hakaua umui, lau dainai. Inai dala dekenai umui ese lau do umui gwauraia hedinarai idia dekenai, bona bese idauidau ibounai dekenai.” Unai bamona hekwakwanai negadiai ita ia hagoadaia totona, Iesu be ma ia gwau lauma helaga ese ita do ia durua, mai anina gaudia bona anina namona idia havaraia gaudia ita laloatao totona.​—Mat. 10:​16-20.

²⁸ “Oiemu hadibaia tauna ena hereva do oi kamonai henia, vadaeni do oi kwalimu. Lohiabada do oi abidadama henia, vadaeni do oi moale.” (Aon. 16:20) Tama sina e, umui hegaegae namonamo lauma dalana ai hadikaia diba rara henia hanai karana amo emui natudia umui gimaia totona. (Aon. 22:3) Natudia e, emui tama sina ese unai gaudia idia hegaegaelaia lalonai umui dekenai idia hadibaia gaudia umui abia dae bona emui kudouna dekenai umui atoa. Ruma bese taudia e, ‘umui naria namonamo, rara do umui ania lasi . . . vadaeni do umui namo’ badina Iehova ena hahenamo bona lalo-namo umui abia dainai.​—Deut. 12:​23-25.

[Footnotes]

This article is repeated in km 11/92.