Natudia Oi Naridia Rara Idia Henidia Garina
1 “Itaia! Memero be Iehova ena harihari gaudia.” (Sal. 127:3) Umui tama sina taudia e, Iehova dekena amo harihari gaudia namodia umui abia, bona natudia umui moalelaidia, to mai emui maduna danu idia umui hadibaia, naria, bona gimaia, dika idia davaria garina. Hegeregere, dala oi hegaegaelaia vadaeni emui natudia maragi dekenai rara idia henia lasi totona, a? Oiemu natudia be dahaka do idia karaia bema doketa idia gwau idia ura rara do idia henidia? Ruma bese taudia ida dahaka do umui karaia bema gorere eiava aksiden ia vara bona doketa idia laloa rara do idia henidia neganai? Umui kikilaia vadaeni, a?
2 Umui hegaegae unai bamona do ia vara garina, oi laloa lasi oiemu ruma bese dekenai be lalohisihisi eiava lalo-metau oi henidia. Momokani, oi hegaegae diba lasi mauri ena hekwakwanai iboudiai oi koudia totona, to hegaegae guna totona umui tama sina taudia be kara momo umui karaia diba emui natudia dekenai rara idia henia lasi totona. Emui maduna umui huaia namonamo lasi neganai, emui natudia be hospital dekenai idia durua neganai reana rara do idia henidia. Dahaka do oi karaia be namo?
3 Emui Lalona Umui Hadaia Momokani: Namona be oi sibona oi laloa namonamo Dirava ena Taravatu rara dekenai oi abidadama henia momokani, eiava? Oi ese emu natudia oi hadibadia idia henaohenao lasi, mauri ena kara goeva idia karaia bona mauri ena kara haida idia badinaia totona, to idia oi hadibadia Iehova ena taravatu rara dekenai idia badinaia totona, a? Dirava ena taravatu ese ia gwauraia hahegani herevana Deuteronomi 12:23 dekenai ita abia dae, a? Ia gwau: “Rara umui ania lasi.” Siri 25 ia gwau: “Umui ania lasi, bena do umui namo, umui bona emui natudia umui murinai danu, Iehova vairanai umui kara maoromaoro noho dainai.” Reana doketa do ia gwau oiemu gorere natuna dekenai rara idia henia neganai ‘do ia namo,’ unai dainai gau badana be dika ia do vara lasi neganai emu lalona oi hadaia vadaeni oi dekenai eiava emu natudia dekenai rara do idia henia lasi totona, bona gau badana be oiemu hetura karana Iehova dekenai oi laloa bada bona oi ura lasi momokani iena taravatu oi utua emu mauri oi halataia toho totona. Hari, ita ura Dirava be ita ia lalo-namo henia bona ita ura gabeai mauri hanaihanai do ita abia, ita ura lasi unai gaudia ita haboiodia!
4 Oibe, Iehova ena Witness taudia be mauri idia laloa bada. Idia ura lasi idia mase. Idia ura idia mauri Iehova do idia hanamoa bona iena ura idia karaia totona. Unai dainai gorere neganai hospital dekenai idia lao bona edia natudia be unuseniai idia abia lao danu heduru idia tahua totona. Doketa taudia edia heduru idia tahua, to bema doketa taudia idia gwau natudia durua dalana be rara do idia henia, tama sina be doketa taudia idia noia rara henia lasi heduru karana ma ta do idia gaukaralaia totona. Rara lasi to ma gau haida idia gaukaralaia diba. Mai edia diba bada doketa taudia be unai gaudia idia gaukaralaia. Ita gwau diba unai gaudia idia gaukaralaia taudia be doketa momokani, badina doketa edia magasin dekenai idia gwau unai gaudia gaukaralaia be gorere taudia durua dalana namona ta bona henia dalana idia gwauraia hedinarai. Tanobada hegegemadai doketa taudia tausen momo be Witness taudia edia ura idia abia dae, idia ese gorere Witness taudia idia durudia namo herea, to rara idia henidia lasi. Momokani, nega haida rara do idia ura idia henia lasi doketa taudia, Witness natudia do idia durudia taudia unai, ita tahudia neganai do ita hekwarahi bada davaridia totona.
5 Witness Ena Ura Ia Abia Dae Doketa Ta Oi Tahua: Doketa taudia ese gorere taudia idia durudia neganai edia lalo-hekwarahi be idauidau, bona oi hamaorodia emu natuna idia durua neganai idia ese rara do idia henia lasi, unai ese lalo-hekwarahi ma ta oi henidia. Doketa taudia haida idia gwau bema Witness taudia ese pepa ta do idia sainia, unai pepa ia gwau doketa ese rara ia henia lasi unai be gorere tauna ena ura dainai, idia ese tau bona hahine badadia idia durudia bona rara do idia henidia lasi. Unai hegeregerena, bema idia bada sisina natudia idia hahedinaraia diba idia be lo taudia bamona, doketa haida idia ura rara henia lasi dalana amo idia durudia. Idia be mai edia gwaumaoro doketa ese idia do idia durudia dalana sibodia idia abia hidi totona. (June 15, 1991 Watchtower, rau 16-17 oi itaia idia bada sisina natudia edia anina oi diba totona.) To, bema tama sina be doketa taudia dekenai gwaumaoro idia henia lasi rara do idia gaukaralaia totona, reana idia ura lasi edia natudia maragidia eiava beibi idia durudia. Oibe, doketa taudia kahirakahira iboudiai be natudia idia durua toho neganai, herevana dahaka do ia vara unai natudia dekenai, tama sina dekediai rara do idia henia lasi gwauhamatana do idia karaia lasi. Doketa edia gaukara dainai bona tanobada taravatu dainai doketa taudia idia gwau lasi rara idia henia lasi natudia maragidia idia durudia neganai. To, hari, doketa taudia sisina momo be Iehova ena Witness taudia edia ura rara dekenai idia abia dae, bona idia ura Witness natudia idia durudia, bona kara idauidau idia karaia rara henia lasi karana amo idia durudia totona, to gorere ia bada neganai reana do idia ura rara do idia henidia.
6 Unai idia karaia dainai, bema oiemu ura ia abia dae doketa ta oi davaria, reana unai doketa be nega momo Iehova ena Witness taudia edia ura ia abia dae, bona Witness taudia momo be rara henia lasi karana amo ia durudia, to oi ia hamaoroa taravatu dainai rara henia lasi gwauhamatana ta do ia sainia diba lasi? To, oi dekenai ia gwau ia laloa rara henia lasi karana amo oiemu natuna danu ia durua diba. Reana oi laloa dala ta be lasi dainai, vadaeni ia durua be namo. Unai bamona ia hereva dainai reana do oi laloa gwaumaoro do oi henia emu natuna ia durua totona. To, oi hahedinaraia goevagoeva, gwaumaoro oi henia operesen ia abia totona, gwaumaoro oi henia lasi rara idia henia totona. To gwaumaoro oi henia neganai, unai maduna oi sibona oi huaia bona haida ese unai kara do idia gwauraia kerere be maoro lasi.
7 Momokani, bema dala ma ta oi davaria natuna durua totona, bona unai dala idia gaukaralaia neganai rara idia henia lasi, reana unai dala do oi abia hidi be namo. Gau badana be oi goada karaia rara henia lasi doketa eiava rara henia lasi taunimanima ivaia doketa ta oi davaria totona. Oi ia durua bada gauna be oi hegaegae guna hekwakwanai do oi hanaidia totona. Namona be gau momo oi karaia oiemu ura do ia abia dae doketa ta oi tahua guna totona. Bema mai dalana, namona be oiemu ura idia abia dae lasi doketa taudia bona hospital amo oi gini siri.
8 Nega haida doketa taudia idia maumau, idia gwau Iehova ena Witness taudia edia ura rara dekenai idia gwauraia hedinarai haraga lasi. Unai be namo lasi momokani. Witness tamana eiava sinana be hospital dekenai eiava doketa dekenai idia lao neganai, maoromaoro edia ura rara dekenai idia gwauraia hedinarai be gau badana. Bema operesen idia abia gwauraia, kara haraga mahuta muramura ia henia tauna ida idia herevahereva. Reana doketa tauna ese oi ia durua diba unai oi karaia totona. Hospital vareai totona fom idia henia neganai unai revareva oi duahia namonamo. Bema hereva haida oi abia dae lasi, peni amo oi makaia oho be taravatu lasi. Daradara ia vara garina, unai pepa dekenai do oi torea hedinarai namonamo herevana dahaka do ia vara, oi ura lasi rara idia henia badina unai be oiemu tomadiho ena taravatu ia hamakohia bona unai dala amo oi ura lasi gorere idia hanamoa, oi ura lasi momokani bona gwaumaoro oi henia lasi idia henia totona.
9 Iehova Ena Orea amo Heduru Oi Abia: Oiemu natudia dekenai rara idia henia lasi totona, Iehova ena orea ese dahaka idia karaia oi idia durua totona? Edia heduru be momo. Rara bona rara henia lasi sivaraidia ita diba totona Society ese hereva momo idia halasia vadaeni. Iehova Ena Witness Taudia bona Lalohadai Haida Rara Dekenai buklet bona rara ena sivarai idia gwauraia bukadia ma haida oi stadilaia vadaeni. Bona kongregesen lalonai tadikaka bona taihu ese oi idia durua bona idia hagoadaia bada diba. Dika ia vara neganai, bema elda taudia idia laloa ia maoro neganai, hora 24 lalodiai, bema mai dalana, elda ta be gorere tauna o maragina ena tamana, sinana eiava varavarana ta ida hospital dekenai idia noho. Badina nega momo varavara bona turana taudia be hanuaboi dekenai hospital idia rakatania neganai, gorere tauna dekenai rara idia henia.
10 “Hereva ia kamonai noho tauna ena namo do ia bada, bona Iehova ia abidadama henia noho tauna ia moale.” (Her. 16:20) Tama sina e, namona be emui natudia umui naridia namonamo, umui hegaegae guna rara henia karana amo emui natudia be lauma dalanai idia dika garina. (Her. 22:3) Natudia e, emui tamana bona sinana idia hegaegaelaia gaudia bona umui idia hadibaia herevadia be emui kudouna amo umui badinaia. Ruma bese taudia e, emui lalona umui hadaia momokani, “rara umui ania lasi, bena do umui namo.”—Deut. 12:23-25.
This is a repeat of article in km 9/92 taken from km-E 9/92 “Safeguarding Your Children From Misuse of Blood.”