Kahana 1: Hari Umui Hegaegae 1992-1993 “Diari Loalaia Taudia” Distrik Hebouhebou Lao Henia Totona
1 Iesu ia gwau iena hahediba taudia be inai “tanobada taudia ibounai edia diari.” (Mat. 5:14) To, idia hanaia dina ta ta iboudiai dekenai inai tanobada ibounai lalonai lauma dalanai bona mauri ena kara goeva dekenai idia be dibura dekenai idia noho. (Isa. 60:2; Roma 1:21) Ita be diari loalaia taudia bona inai tanobada ena dokona negana ia kahirakahira mai lalonai unai gaukara be mai anina bada. Ita diba iseda gaukara be mai anina bada herea, unai dainai mai moale danu lagani 1992-1993 “Diari Loalaia Taudia” Distrik Hebouhebouna ita naria noho. Unai hebouhebou ginigunana be December 25 dekenai do idia hamatamaia.
2 Dina Toi Hebouheboudia: Hari lagani lalonai ita hegaegae Papua New Guinea dekenai hebouhebou 15 ita karaia totona. Hebouhebou ginigunana do idia hamatamaia December 25-27, 1992, Port Moresby dekenai, bona hebouhebou ginigabena do idia karaia January 30 bona 31, 1993, Lake Murray dekenai. Dina toi hebouhebou do idia kehoa Friday dabai 10:20 a.m. dekenai, bona Sunday adorahi 4:30 p.m. bamona be ane bona guriguri amo do idia koudia. Namona be Iehova ena Witness taudia iboudiai be hebouhebou ena dina iboudiai edia hereva iboudiai idia kamonai henidia. Emu lalona oi hadaia vadaeni hebouhebou ena dina iboudiai oi lao henidia totona, a? Namona be oi hegaegae negana lalonai Iehova oi guriguri henia oi ia durua totona.
3 Friday dabai ena hereva ginigunana amo ela bona Sunday adorahi ena hereva ginigabena, namona be hereva iboudiai ita kamonai henidia namonamo. Sivarai namodia be hereva amo, haheitalai amo, henanadai henia amo, bona drama amo do ita kamonai henia. Namona be Friday dabai hebouhebou dekenai oi ginidae haraga bona oi helai hegaegae. Vaia, hebouhebou ena dina ginigunana dekenai motuka atoa gabuna davaria, helai gabuna davaria, bona ma kara haida karaia totona nega sisina bada ia ania. Unai dainai oi ginidae haraga be namo. Hebouhebou ena hereva iboudiai do ita kamonai henidia bona dina ta ta iboudiai ita naria ela bona ane bona guriguri dokona idia karaia neganai, program ena hereva amo namo bada ita abia bona ita hahedinaraia diari loalaia gaukarana ita moalelaia.
4 Oiemu Taiana Do Idia Hakala Namonamo: Salamo torea tauna ia gwau: “Lau ese oiemu hahediba herevadia lau hakala henidia. Oiemu taravatu lau ura henia dikadika! Dina ibounai lalonai lau laloa noho.” (Sal. 119:95b, 97) Iehova ese ita ia hadibaia totona, gau badana be ita hebou negadia iboudiai lalodiai iseda taiana amo hereva ita hakala henia namonamo, to unai sibona lasi, namona be mai iseda kudouna amo ita kamonai danu. Unai be mai anina bada hebouhebou badadia, hegeregere distrik hebouhebou dekenai ita lao neganai. Badina unuseniai iseda matana bona taiana idia veria gaudia be momo. Bema nega bona moni bada ita negea hebouhebou dekenai ita lao totona, to ita kamonai namonamo lasi, ruma dekenai ita giroa lou neganai diari loalaia gaukarana ita hanamoa diba dalana ena hereva haida ita laloaboio, madi, heduru haida ita reaia unai! Program ena hereva iboudiai amo namo bada do ita abia totona, gau badana be regerege ta do ia vara neganai iseda lalona do ia veria lasi. Dahaka do ita karaia bena ita diba hebouhebou ia ore murinai ita kamonai henia herevadia be iseda kudouna bona lalona dekenai idia vareai momokani?
5 Hereva hakala henia karana be ia vara kava lasi, to sibona ita hadibaia unai ita karaia totona. Unai hereva “hakala” ena anina be “mai emu lalona danu oi kamonai.” Namona be inai heduru hereva haida ita laloa:
(1) Namona be oi hegaegae hanuaboi dekenai oi mahuta haraga totona bena daba kahanai hebouhebou dekenai oi ginidae neganai do oi ura lasi mahuta. Unai oi karaia totona oi hegaegae namonamo bona ruma bese taudia be unai kara dekenai idia lalo-tamona be gau badana. Bema oi mahuta daudau lasi dainai emu tauanina ia manoka eiava bema daba anianina oi ania lasi dainai oi hitolo, eiava oi lalo-hekwarahi badina oi haragaharaga dainai, hebouhebou dekenai oi ginidae neganai program ena hereva do oi hakala henia namonamo diba lasi.
(2) Namona be hebouhebou ena ladana bona edena bamona unai hereva do idia gwauraia oi laloa hegaegae. Pura haida hebouhebou vairanai, oiemu ruma bese stadi lalonai, namona be emu ruma bese taudia ta ta iboudiai ese diari loalaia karana ena anina idia dekenai do idia gwauraia hedinarai. Hebouhebou dekenai umui ginidae bona program idia do matamaia lasi neganai, namona be unai dina dekenai do idia kikilaia herevadia umui laloa sisina.
(3) Dabua namona umui karaia, bona hereva idia henia noho lalonai namo lasi aniani oi ania bona inua gaudia oi inua. Guna, program ena hereva idia do henia noho lalonai ita itaia haida be steidiam dekenai idia helai bona idia aniani bona inua gaudia idia inua. Unai be hemataurai lasi karana, haida edia lalona ia veria, bona ia be haheauka lasi karana.
6 Ai ura umui diba noutbuk dekenai hereva ita torea be gau badana. Bema ita karaia namonamo, ita ia durua hereva henia tauna ena hereva ita laloa namonamo totona bona ita kamonai herevana ita laloatao totona. Ita hereva be haraga lasi, to ita lalohadai be haraga herea, bona gau ta ese iseda lalona ia veria garina namona be ita kamonai henia herevadia be noutbuk dekenai ita torea. Toretore tauna ta ia gwau: “Hereva ta hakala henia be auka sisina, to herevalaia karana be ia auka lasi.” Reana oi laloatao idau negai Keristen taudia be idia makohia uro merekidia idia abia lao hebouhebou dekenai bona inika amo idia latanai Bible siri idia torea. Hari, ita moale badina noutbuk bona peni eiava pensolo ita gaukaralaidia diba. Aonega dalanai hereva ita torea ena anina be hereva badadia sibona ita torea, namo lasi hereva ibounai ita torea toho. Unai be hegeregere lasi. Namona be hereva badadia sibona ita torea bona hereva ita hakwadogidia. Ita torea herevadia be ita idia durua bada hebouhebou ena dina ta ta dokonai eiava gabeai kongregesen ena Hesiai Hebou dekenai program ena hereva badadia do ita riviulaia totona.
This article has been taken partly from km-E 5/92 “1992 ‘Light Bearers’ District Convention,” par. 1-6. Part 2 is in km 12/92.