Sivarai Namona Harorolaia—Tau Hereadaena Bukana Amo
1 Idia ore laganidia lalodiai, Society ese ia halasia bukadia iboudiai lalodiai Iesu Keriso ena mauri bona gaukara sivaraidia idia noho. Unai be maoro, badina “hahemauri be ia sibona ese ia henia diba. Badina be tanobada ibounai lalonai ladana idauna ta Dirava ese ia henia lasi, ita do ia hamauria totona.” (Kara 4:12) Unai buka matamatana be namo herea momokani, badina ia ese Iesu ena mauri sivaraidia sibona ia gwauraia, guna iseda buka ta be unai bamona lasi.
2 Taunimanima Dekenai Ita Hariharilaia Neganai: Unai buka dekena amo ita hahedinaraia hereva namodia haida be dahaka? Karoa 44, “Lai Gubana Ia Hadokoa,” ena hoa sivaraina amo reana mero maragina ta ena lalona oi veria diba. Bema taunimanima ta be mai ena gorere eiava ena tauanina ia dika, karoa 57 ena sivarai ese ia do ia hamoalea diba, ena ladana be “Gorere Taudia Ia Bogadia Hisi.” Bema taunimanima ta ena lalokau tauna ta ia mase ena lalohisihisi ia mamia, karoa 90 ena sivarai do ia moalelaia, ena ladana be “Toreisi Lou Helarona.” Bema tanobada dekenai idia vara gau dikadia umui kikilaia, namona be karoa 111 oi kehoa, ena ladana be “Dina Gabedia edia Toana.”
3 Ruma tauna oi hereva henia neganai, reana inai bamona do oi hereva diba: “Ita Keristen taudia dekena amo Dirava be dahaka ia ura? Bible ese ita ia hagania tau hereadaena, Iesu Keriso, ena kara namodia ita tohotohoa totona. [Petero Ginigunana 2:21 duahia.] Ia ese ena hahediba taudia ia hadibaia edia dekena taudia idia lalokau henidia totona, mauri ena kara goeva idia karaia totona, bona idia guriguri Dirava ena Basileia do ia mai totona. Hahemauri do ita abia totona, gau badana be iseda Hahemauri Tauna Iesu ena hereva ita badinaia. [Ioane 14:6 duahia.] Iesu be taunimanima iboudiai bamona lasi. Inai buka ese ia hahedinaraia ia be tau hereadaena. Karoa 59 ese unai ia hamomokania, ia hahedinaraia ia be ‘Keriso, Mauri Diravana ena Natuna.’ Ia mo sibona dekena amo hahemauri do ita abia, unai dainai, reana oi laloa ia karaia gaukarana bona ia hadibaia hahediba herevadia ita diba namonamo be gau badana, ani? Inai buka idia karaia ena badina be unai, bona lau ura inai buka ta do oi abia.”
4 Reana kudou-namo taudia momo herea do oi davaria, inai buka do idia ura abia bona do idia duahia. Namona be oi dekena amo unai buka idia abia taudia iboudiai oi lou henidia. Nega haida unai buka oi gaukaralaia diba Bible stadi oi hamatamaia totona. Ruma bese ena stadi bona maragidia stadi henidia totona unai buka be namo herea. Taunimanima dekenai Tau Hereadaena bukana ita hahedinaraia neganai, ita durudia diba mauri hanaihanai dalana idia davaria totona.
This is a repeat of article in km 3/92 taken from km-E 12/91 “Presenting the Good News—Using The Greatest Man Book.”