Tau Hereadaena
1 Unai buka matamatana ita abia bona ena ladana Tau Hereadaena ita itaia neganai, reana unai ladana ena anina ita ura diba. Taunimanima iboudiai amo ta ita gwauraia tau hereadaena ena anina be tanobada dekenai idia noho taudia iboudiai ia hereadia. “Hereadae” ena anina be “ena kara bona gaukara edia namo idia hereadae.” Unai bamona idia gwauraia tauna be tau badana momokani!
2 Dirava ena Natuna, Iesu Keriso, be unai bamona idia gwauraia be maoro. Tanobada dekenai ia karaia karadia be taga bada dainai lasi, tauanina ena aonega kara dainai lasi, eiava politikol karana dainai lasi. Ia be ogogami ruma besena amo ia mai bona ena mauri kahana badana lalonai taunimanima momo idia diba lasi ia. To, iena mauri laganidia be 30 neganai, iena hereva bona iena kara dainai, Palestine tanona dekenai idia noho taudia iboudiai be ia idia diba. Ia ese Iehova Dirava ena lalohadai, ena kara bona ena ura ia hahedinaraia dalana be idau herea, taunimanima be guna unai bamona kara idia itaia lasi. Ia ese haroro gaukara badana ia karaia, taunimanima ma ta be unai bamona ia karaia lasi. Ia ese hoa karadia ia karaia, bona tanobada matamatana ena badina ia haginia.
3 Inai Buka Ita Abia Ena Namo: Paulo ia gwau namona be “iseda matana Iesu dekenai do ita negea lao.” (Heb. 12:2) Lagani 1985 amo ia mai 1991 dekenai, The Watchtower magasin lalonai Society ese Iesu ena mauri bona gaukara sivaraidia 149 idia halasia. Unai sivarai iboudiai ese ita idia durua Iesu ena hereva bona ita totona ia karaia karana ita laloa momo totona. Idia hahedinaraia iena kara ita tohotohoa be gau badana. Unai sivarai iboudiai edia hereva idia hamaragia sisina bona buka ta lalonai idia haboua tamona. Unai buka be namo herea badina ia dekena amo taunimanima ma haida ita durudia Iesu idia laloa namonamo totona bona ia henunai idia noho totona, badina Iehova ese Iesu ia henia dagina be “guba ena lohia taudia ibounai, gunalaia taudia ibounai, gavana taudia ibounai, bona siahu taudia ibounai” ia hereaia!—Ef. 1:21.
4 Ena Namo Bada Gaudia: Unai buka oi hariharilaia neganai inai bamona do oi gwau diba: “Dahaka dainai Iesu be tau hereadaena?” Unai henanadai oi haerelaia totona, oi ese unai buka ena karoa 133 amo Iesu ena mauri, ena lalohadai, ena hahediba, bona ena gaukara idia gwauraia sivaraidia haida do oi hahedinaraia diba. Karoa 24 be Iesu ese tanobada ai ia mai ena badina ia hahedinaraia. Karoa 35 ese Iesu be ororo dekenai ia harorolaia herevadia ia hahedinaraia. Karoa 43 ese ia hahedinaraia Iesu be parabole amo taunimanima ia hadibaia namonamo diba. Karoa 133 ese iena gaukara ia hagugurua neganai taunimanima do idia abia hahenamodia haida ia hahedinaraia. Karoa iboudiai dokodiai henanadai haida idia torea, bona oi idia durua diba unai karoa umui kikilaia namonamo totona; idia torea siridia ese oi idia durua unai sivarai Bible dekenai oi davaria totona. Oi ese Iesu ena kara bona lalohadai, iena hebogahisi taunimanima dekenai, bona mai goada ida haroro gaukara ia karaia karadia idia hahedinaraia parabole herevadia do oi hahedinaraia diba.—Karoa 44, 95, 117, bona 123 itaia. (Harihari haheitalai do idia karaia.)
5 Unai buka matamatana ena sivarai be namo herea dainai, mai iseda goada ida taunimanima dekenai ita gwauraia bada bona ita hariharilaia. Mauri hanaihanai idia ura abia taudia iboudiai be Iesu Keriso idia dibaia be gau badana. (Ioane 17:3) Bema mai iseda goada ibounai ida unai buka ita hariharilaia toho neganai, dala ita kehoa diba kudou-namo taudia momo be edia mauri lalonai tau hereadaena idia abia dae totona.
[Questions]
1, 2. Dahaka dainai ita gwau diba Dirava ena Natuna, Iesu Keriso, be tau hereadaena taunimanima iboudiai amo?
3. (a) Unai buka matamatana ena karoa ese ita idia hadibaia gaudia be dahaka? (b) Idia hahedinaraia dahaka be gau badana? (c) Dahaka dainai unai buka be namo herea?
4. Unai buka dekenai idia noho karoa namodia haida be dahaka?
5. Unai buka be mai iseda goada ibounai ida ita hariharilaia ena badina be dahaka?
This is a repeat of article in km 3/92 taken from km-E 12/91 “The Greatest Man Who Ever Lived.”