Mauri Hanaihanai Bukana amo Baibel Stadi Karaia
1 Mauri Hanaihanai bukana ia herevalaia neganai, hahine ta ia gwau: “Baibel hegeregerena, lau davaria unai buka ena hereva be idia momokani, taunimanima ia hagoadaia, bona ia be lalona veria bukana, guna unai buka bamona lau duahia lasi!” Ita ibounai ita diba idia halasia buka namodia iboudiai amo ia be buka namona ta, badina taunimanima ia durudia Baibel ena hereva idia diba totona bona idia ia hagoadadia Iehova hanamoa gaukarana idia karaia totona.
2 Lagani 1983 ai, Mauri Hanaihanai bukana idia halasia, unai neganai Papua New Guinea dekenai, pablisa taudia 1,460 be Baibel stadi 1,525 idia karaia. Hari inai negai, pablisa taudia 2,957 be Baibel stadi 4,562 idia karaia. Mauri Hanaihanai bukana idia halasia negana amo ia mai hari, unai buka milion 62 be gado idauidau 115 dekenai idia printaia. Tanobada hegegemadai unai buka ese iseda haroro gaukara ia durua bada!
3 Tahua Gaudia Atoa: Iseda orea ia bada ia lao haraga badina Iehova ese haroro gaukara ia hanamoa dainai, bona iena taunimanima be idia ura dikadika kudou-namo taudia idia durudia Baibel ia gwauraia mauri havaraia sivaraina idia hadibadia dainai. (Roma 10:13-15; 1 Tim. 2:4) Ita diba dokona be ia kahirakahira, bona ita diba Dirava ena Basileia ita harorolaia goadagoada be gau badana.
4 Orea be ia tubu noho, to ita ta ta ibounai be edena bamona? Iseda lalona ita hadaia hahediba taudia karaia gaukarana ita karaia goadagoada totona, a? Unai bamona do ita karaia totona, namona be tahua gaudia ita atoa bona ita hagugurudia. Reana kamonai taudia lou henidia gaukarana do ita hanamoa diba, ani? Ita tahua gauna namona ta be April bona May lalodiai Baibel stadi matamatana ta ita hamatamaia, ani?
5 Daika ese Baibel Stadi Ia Karaia Diba?: Edia noho idauidau pablisa taudia be Mauri Hanaihanai bukana amo Baibel stadi idia karaia dainai idia moale. Ena torea dalana be auka lasi dainai ia dekena amo Baibel stadi karaia be ia auka lasi, bona pablisa matamata taudia be unai mai anina bada gaukarana idia karaia diba. Danu, ita momo be unai buka ita stadilaia vadaeni, unai dainai ena sivarai ita diba. Pablisa ta be guna Baibel stadi ta ia karaia lasi, to Mauri Hanaihanai bukana ia gaukaralaia neganai, mai moale danu ia torea, ia gwau: “Hari, lauegu stadi be toi bona kahirakahira ma ta do lau hamatamaia. Baibel stadi be auka lasi dalana amo ai umui hadibaia dainai umui lau tanikiu henia bada.”
6 Memero kekeni danu, be Mauri Hanaihanai bukana amo Baibel stadi gaukara idia karaia. Tadikaka merona ta be sikuli dekenai unai buka be ena desk latanai ia rakatania. Unai ese dala ia kehoa sivarai ia kikilaia totona bona Baibel stadi haida ia hamatamaia totona. Memero kekeni haida be ruma ta ruma ta dekenai idia haroro neganai idia davaria tama bona sina edia gwaumaoro idia tahua edia natudia dekenai Baibel stadi idia karaia totona. Ena be iseda natudia haida be idia do maragi, to Iehova ese mauri hanaihanai tanobada paradaisona dekenai ia gwauhamatalaia ena sivarai idia kikilaia diba.
7 Ena be ita be matamata taudia eiava ita be buruka taudia, to haroro gaukarana amo ita davaria moale bada gauna ta be taunimanima edia ruma dekenai Baibel stadi ta ita karaia. Unai dainai, namona be ita ibounai ita guriguri Iehova ena heduru ita abia totona, bona nega ibounai dala ita tahua iseda helaro do ita harorolaia totona. Mauri Hanaihanai bukana ita gaukaralaia dalana amo taunimanima ma haida do ita hadibadia, bena idia danu be iseda Dirava, Iehova, hanamoa gaukarana do idia durua diba.—Sal. 148:12, 13.
[Questions]
1. Lagani momo lalodiai Mauri Hanaihanai bukana ena heduru be dahaka?
2. Dahaka dainai tanobada hegegemadai unai buka ese iseda haroro bona hadibaia gaukaradia ia durua bada?
3. (a) Dahaka dainai iseda orea ia bada ia lao haraga? (b) Timoteo Ginigunana 2:4 oi duahia. Taunimanima ‘hamauridia’ totona dahaka ita karaia diba?
4, 5. Dahaka dainai Mauri Hanaihanai bukana amo Baibel stadi karaia be ia auka momokani lasi?
6. (a) Ia do sikuli pablisa ta be dahaka ia karaia Baibel stadi ia hamatamaia totona? (b) Umui memero kekeni pablisa e, unai bamona umui karaia toho, a?
7. Salamo 148:12, 13 oi duahia. Mauri Hanaihanai bukana be edena bamona ita ta ta ibounai ia durua ‘Iehova ita hanamoa’ totona?