February Ena Hesiai Hebou
February 1 ai Ia Matamaia Purana
Ane 65
10 min: Kongregesen ena hadibaia herevadia.
20 min: “Hesiai Hebou amo Heduru Bada Abia.” Namona be ia duahiduahi namonamo diba tadikakana ta oi abia hidi paragraf ia duahidia totona. Bena henanadai be helai taudia oi henidia. Helai taudia oi nanadaidia, Hesiai Hebou ese edena bamona idia ia durudia edia mauri lalonai.
15 min: Mero be Kekeni ida Idia Hebamo Heheni Kava Diba, A? Elda ta ese Memero Kekeni edia Henanadai bukana, rau 232 bona 233 amo inai hereva ia henia mai manau ida.
Ane 124 bona guriguri.
February 8 ai Ia Matamaia Purana
Ane 139
10 min: Kongregesen ena hadibaia herevadia.
20 min: “Iehova ena Hesiai Gaukarana Habadaia.” Haroro naria tauna ese inai hereva do ia gwauraia. Haheitalai hegaegaelaia namonamo.
15 min: ‘Iehova ese Lau Ia Naria Namo Herea’ Elda ta eiava hesiai tauna ta ese Gima Kohorona September 1, 1992, rau 26 ia lao 30 dekenai New Zealand tadikaka ta ena mauri sivaraina ia kikilaia.
Ane 77 bona guriguri.
February 15 ai Ia Matamaia Purana
Ane 112
10 min: Kongregesen ena hadibaia herevadia. Akaun ripotina gwauraia.
20 min: “Sivarai Namona Harorolaia—Dala Dekenai Gini Neganai.” Idia duahiduahi namonamo diba tadikakadia be hebou vairanai oi abia hidi paragraf ta ta do idia duahia totona, bena idia duahia murinai henanadai be helai taudia oi henidia.
15 min: Tama bona Sina Edia Herevahereva Dalana Edia Natudia Badadia Dekenai. Elda ta ese inai hereva ia gwauraia, bona haheitalai ta ia hegaegaelaia danu. Namona be tama bona sina bona edia natudia badadia ihuanai herevahereva dalana namona ia noho. Tama sina bona edia natudia badadia ese unai idia hekwarahilaia bada. Bema hekwakwanai haida idia vara neganai, namona be lalokau bona hebogahisi karana idia hahedinaraia. Bible ena sisiba be lalokau dalanai ita henia neganai idia vara hekwakwanaidia ita hamaoromaorodia diba.
Lagani momo lalodiai, Iehova ena orea ese ruma bese taudia idia hagoadadia edia ruma bese stadi idia karaia hanaihanai totona. Unai be Bible ena hahegani hereva Deuteronomi 6:6-8 bona Efeso 6:1-4 ese idia hahedinaraia bamona.
Galatia 6:7, 8 ena kahana ta ia gwau, “Bema tau ta aniani uhena ia hadoa, vadaeni unai bamona sibona be do ia abia.” Tama bona sina bona edia natudia badadia dekenai hekwakwanai haida idia vara badina idia ese edia ruma bese stadi idia karaia hanaihanai lasi dainai, eiava?
HAHEITALAI: (Mani emui kara inai kahana umui hegaegaelaia namonamo helai taudia ese anina do idia lalo-pararalaia totona.)
Karaia Dalana: Tama ta bona sina ta be edia ruma lalonai idia helai noho. Unai be hanuaboi vadaeni. Edia natuna mero badana Tom be ruma dekenai ia do ginidae lasi.
Sinana: Lau lalohisihisi bada, Tom be dahaka ia karaia noho inai hanuaboi momokani lalonai?
Tamana: Lau diba lasi. Bema ruma dekenai ia ginidae neganai sisiba aukadia do lau henia. Nega momo ia ita hadibaia gabu ia do dibura lasi neganai ruma dekenai ia ginidae be namo, bona unai murimuri memerodia danu ia hebamo lasi.
Sinana: Namo lasi ia ginidae neganai ita gwau henia, badina harihari ita ruaosi ita lalohisihisi dainai. Reana do ita herevalaia gauna eiava do ita karaia gauna be gabeai do ita sorilaia.
Tamana: Oibe, oiemu hereva be maoro. Namona be kerukeru ita hereva henia, iseda lalohisihisi ia ore neganai. Harihari ia ginidae inai. (Edia natuna Tom ia raka vareai ruma ai.)
Hereva Henia Tauna: (Helai taudia ia henanadai henidia.) Umui tama bona sina bona umui memero kekeni e, hari dahaka umui laloa idia karaia be namo? (Naria idia haere totona.) Tom ena tamana bona sinana ia dekenai dahaka do idia gwauraia mani ita itaia.
Tamana: Tom, oiemu sinana bona lau be ai lalo-hekwarahi bada, oi be edeseniai bona dahaka oi karaia noho?
Tom: Lau be memero taudia ida ai kiki hebou bona moale karadia haida ai karaia. Kara dikadia ai karaia lasi.
Sinana: Tom, oiemu tamana bona lau be hanuaboi momokani ia abia dainai ai lalo-hekwarahi bada. To, vadaeni, hari oi ginidae bona oi namo dainai ai moale.
Tamana: Oibe Tom, oi namo dainai ai moale. To ai lalohisihisi sisina. Oi laloatao, oi ai hadibaia gabu ia do dibura lasi neganai ruma dekenai oi ginidae bona unai murimuri memerodia ida oi hebamo lasi. Ai oi gwau-edeede henia neganai, ai moale lasi. Ia namo Tom, hari be ia leiti momokani dainai oi lao mahuta. Kerukeru do ita herevalaia, bona Bible ena sisiba memero bona kekeni bona tama bona sina dekenai be dahaka do ita itaia. (Tom ia lao mahuta.)
Sinana: (Ia naria sisina murinai.) Tom tamana, pura haida idia lao vadaeni ita ese iseda ruma bese stadi ita karaia lasi.
Tamana: Oibe, unai be momokani. To ita be gau momo ita karaia dainai ita be nega lasi iseda ruma bese ena stadi ita karaia.
Sinana: Lau laloa nega haida uhe ita hadoa hegeregerena anina ita gogoa.
Hereva Henia Tauna: Edena bamona inai hekwakwanai do umui hanaia? Pura vairanai tama bona sina bona edia natudia badadia ese unai hekwakwanai hanaia dalana do ita diba.
Ane 55 bona guriguri.
February 22 ai Ia Matamaia Purana
Ane 92
10 min: Kongregesen ena hadibaia herevadia.
20 min: “Pioneer Gaukara Lalohadaina Oi Abia, A?” Duahiduahi idia diba namonamo tadikaka oi abia hidi guna paragraf ta ta idia duahia totona, bena idia duahia murinai henanadai do oi gwauraia.
15 min: Ruma Bese ena Stadi ese Hari Nega Dikadia Ai Ita Ia Naria. Elda ta ese inai hereva ia henia bona haheitalai ia hegaegaelaia danu.
Pura gunanai ruma bese ta ese “hari inai nega dokodia lalonai” idia ese edia ruma bese stadi moalelaia karana idia hahedinaraia. Ruma bese hakaua dalana namona idia abia be namo, ta ese idia ia hakaua be namo, bona ruma bese taudia ibounai idia gaukara hebou be namo. Namona be tamana ese ia hakaudia, bona sinana ese ia durua bona natudia ibounai idia gaukara hebou.
Namona be idia ibounai ese ruma bese ena taravatu idia badinaia. Unai taravatu be Dirava ena Hereva, Bible, dekenai ia noho bona society ena buka idauidau bona magasin idauidau ai idia noho danu. Mauri ita abia totona, namona be unai taravatu ita badinadia. Unai taravatu ita badinaia totona namona be ita dibadia namonamo. Unai anina be do ita stadi. Ruma bese ena stadi ese ruma bese ia durua mauri idia abia totona.
Hari unai ruma bese ese Memero Kekeni bukana karoa 13 dekenai idia noho taravatudia idia stadilaia.
Tamana: Hari hanuaboi ai ita ibounai ita hebou iseda ruma bese karaia totona be namo herea. Iseda ruma bese stadi ia kwalimu totona, do lau hekwarahi stadi do lau karaia namonamo totona. To dahaka umui karaia diba?
Tom: Ruma bese taudia ibounai be stadi karana idia ura henia bona ai ibounai ese stadi ena henanadai ai haerealaia danu. (Idia ibounai idia naria sisina, unai ese guriguri karana ia haheitalaia.)
Tamana: Iseda stadi karaia totona Iehova dekenai ita noinoi vadaeni dainai, unai be namo. Umui ibounai emui Memero Kekeni bukana umui kehoa vadaeni karoa 13 dekenai, a? Tom sinana, oi ura paragraf ginigunana oi duahia? (Sinana ia duahia.)
Tamana: Tanikiu, Tom sinana. Tom, oi ura paragraf iharuana oi duahia? (Tom ia duahia.)
Tamana: (Tamana ese ena natuna kekeni ia hamaoroa paragraf ihatoina ia duahia. Kekeni ese ia duahia.)
Tamana: (Tamana ese paragraf edia henanadai ia gwauraia. Paragraf edia hereva badadia nega sisina lalonai idia kikilaia hebou.)
Tamana: Iseda stadi ia ore ena nega ia ginidae vadaeni. Stadi lau hakaua dainai lau moale, reana umui danu umui moale. Umui natudia, dahaka umui laloa iseda ruma bese stadi karana dekenai?
Tom: Hari lau itaia ia be namo ita ibounai dekenai, bona vaira neganai do lau hekwarahi ruma bese taudia ida do lau gaukara hebou totona.
Sinana: Stadi lau moalelaia, bona pura ta ta ai iseda ruma bese stadi ita karaia hanaihanai neganai iseda ruma bese ese namo do idia davaria, bona Iehova ena hahenamo do ita abia.
Ane 100 bona guriguri.