Ruma Ta Ruma Ta Haroro Gaukarana Tahua Karana
1 Tomadiho momokanina lalonai idia vareai taudia momo be ruma ta ruma ta ai idia lao, bona idia diba lasi taudia idia vadivadi henidia be ia auka sisina. To, Iehova idia lalokau henia bada dainai unai gaukara idia karaia diba, ena be haida be hemarai momo taudia, to idia goada idia lao bona gabeai nega ibounai sivarai namona harorolaia gaukarana idia karaia.
2 Baibel ese ia hahedinaraia goevagoeva idaunegai Keristen taudia be Dirava ena Basileia ena sivarai namona harorolaia totona idia be ruma ta ruma ta ai idia lao. (Kara 5:42; 20:20, 21) Hari inai nega Keristen taudia be unai gaukara idia karaia danu. Ena be taunimanima idia ura lasi kamonai, idia badu, idia hevaseha, eiava idia dagedage, to iseda Dirava bona iseda dekena taudia ita lalokau henidia dainai, ita ia doria unai gaukara ita karaia totona.
3 Unai Gaukara amo Idia Vara Gaudia: Hanaihanai ruma ta ruma ta gaukara ita karaia neganai, ita ura hereva momokani uhedia ita hadodia, badina ita diba reana gabeai unai uhe amo Basileia huahuana do ia vara. (Koh. 11:6) Taunimanima edia mauri idia idau diba. Reana gau ta ia vara dainai ruma tauna be iseda hereva do ia laloatao, bona gabeai ta ese do ia vadivadi henia neganai reana do ia ura kamonai.
4 Ruma ta ruma ta gaukarana amo hereva momokani bona kara maoromaoro idia tahua taudia be mai edia dala Iehova bona iena ura idia diba totona, bona ita durudia diba mauri hanaihanai dalana idia rakalaia hamatamaia totona. Tanobada ena moale karadia idia moalelaia taudia be mai lalokau ida ita hadibadia, ita gwau Iehova ena lalo-namo idia abia totona gau badana be edia kara idia haidaua. Danu, unai haroro gaukarana amo Iehova ena ladana taunimanima dekenai ita hadibalaia bona unai ese ena ladana ia hanamoa, herevana ruma taudia idia kamonai eiava lasi.—Esek. 3:11.
5 Haroro gaukara ita karaia neganai, ita ia durua lauma huahua karadia ita habadaia totona, hegeregere, lalokau, moale, maino, bona haheauka. (Gal. 5:22) Ita ia durua ita manau bona ita hebogahisi totona, badina unai gaukara amo taunimanima ita kara namo henidia. Iehova ena gaukara ita goadalaia be heduru gauna tanobada ena kara ita dadaraia totona.—1 Kor. 15:58.
6 Unai Gaukara Karaia Totona Ita Idia Durua Gaudia: Vareai matamata taudia be unai gaukara namona idia karaia dalana idia diba be namo. Ruma ta ruma ta gaukara idia do manadalaia lasi dainai, nega momo idia laloa idia karaia namonamo diba lasi bona idia lalohisihisi. Unai dainai hegaegae totona, namona be taunimanima edia koua herevadia bona ita hanaidia dalana haida do ita hadibadia. Namona be Reasoning buka amo heduru hereva haida, koua herevadia hanaidia dalana amo do ita karaia toho. Namona be oi hadibadia oi ura haroro totona idia hegaegae neganai oi durudia, ani? Danu, heduru bada dalana be hanaihanai idia lao haroro totona idia hebou neganai, bona idia manada vadaeni tadikakadia ta do idia gaukara hebou. Grup taudia danu ita gaukara hebou neganai ese goada bada ia havaraia diba.
7 Ruma ta ruma ta gaukarana ita karaia noho neganai, ita moale badina ita be iseda Dirava, Iehova, ena hereva taudia. Dirava danu ita gaukara hebou be moale momokani karana, ani? (1 Kor. 3:9) Bema ia dekenai ita tabekau, iena lauma helaga ese ita do ia durua ruma ta ruma ta gaukarana do ita karaia namonamo diba totona.—2 Kor. 3:5.
[Questions]
1. Dahaka ese taunimanima ia durua ruma ta ruma ta gaukarana ia karaia diba totona?
2. (a) Idaunegai Keristen taudia be edena dala amo sivarai namona idia harorolaia? (b) Dahaka ese ita ia doria ruma ta ruma ta gaukara ita karaia totona?
3. Ruma ta ruma ta gaukara ita karaia noho neganai, dahaka do ia vara?
4. Iseda ruma ta ruma ta gaukarana amo ia vara namo gaudia ma haida be dahaka?
5. Haroro gaukara ita karaia be edena bamona ita ia durua?
6. Vareai matamata taudia be ruma ta ruma ta gaukara idia karaia hamatamaia totona, edena bamona ita durudia diba?