Sivarai Namona Harorolaia—Mai Hemataurai Danu
1 “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kol. 4:6) Aposetolo Paulo ena sisiba be namo herea! Hereva momokani taunimanima dekenai ita harorolaia neganai namona be iena sisiba ita laloatao.—2 Kor. 6:3.
RUMA TA RUMA TA HARORO GAUKARA LALONAI
2 Bema ita be mai eda hemataurai, ita diba dahaka do ita karaia be namo eiava edena bamona do ita hereva be namo, taunimanima ida ita maino karaia totona bona ita habadudia lasi totona. Ruma ta ruma ta gaukara ita karaia neganai, taunimanima haida ese ita idia hamaoroa idia gwau idia bisi. Bema ita laloa idia bisi momokani, namona be magasin o buka sibona ita henidia toho bona ita hamaorodia ma nega ta ai do ita giroa ita hereva henidia totona. Bema ita laloa idia bisi momokani lasi, reana do ita gwau: “Ia namo, hereva kwadogina sibona do lau gwauraia.” Namona be hereva badadia sibodia ita gwauraia miniti tamona bamona lalonai.
3 Nega haida ruma taudia be mai edia badu danu ita idia hereva henia. Namo lasi ita haere henidia hemataurai lasi dalanai, badina be Baibel ia gwau: “Dika davana do umui karaia lasi.” (Roma 12:17) Namona be hemataurai dalana ita tahua. Hereva Lada-isidia 15:1 ena sisiba ita badinaia be namo, ia gwau: “Haere manauna ese badu ia koua.” Bema oi be mai emu Reasoning buka, rau 15-24 dekenai idia noho herevadia ese oi do idia durua, oi be mai emu manau bona mai emu hemataurai danu oi haere totona.
LOU-HENIA NEGANAI
4 Nega momo, taunimanima ita lou henidia negadiai, idia gwau idia abia bukadia idia do duahia lasi. Ita ura unai bamona taudia ita hagoadadia, idia abia bukadia do idia duahia totona. Unai bamona ita karaia totona, namona be mai eda hemataurai danu ita hahedinaraia idia dekenai, unai buka ese dahaka henanadai badadia ia haerelaidia diba. Reana unai dala amo ita ha-uradia diba lauma gaudia idia laloa totona, bona idia abia bukadia do idia duahia totona.
5 Ita momo be ruma tauna ita hamaoroa do ita lou henia bona nega ita gwauraia danu, bona unai nega dekenai ita lou lao to tauna ia noho lasi. Momokani, ita lalohisihisi bona iseda nega ita halusia kava bona ita hekwarahi kava, to gabeai, unai ruma tauna do ita davaria lou neganai, namona be ita hereva henia mai eda hemataurai danu. Namona be ita hamaoroa ita sori, guna ita davaria lasi dainai, bona ita hamaoroa, gabeai do ita giroa lou badina ita ura ia ida Baibel do ita herevalaia hebou.
BAIBEL STADI DEKENAI
6 Taunimanima haida be nega momo edia stadi idia hegaegaelaia lasi. Namona be nega ita atoa idia dekenai hegaegae dalana ita hahedinaraia totona. Eiava reana ita hahedinaraia diba dahaka dahaka do idia diba bema stadi totona idia hegaegae guna. Unai neganai stadi ia heau haraga diba, bona lauma dalanai do idia goada idia lao haraga diba.
7 Reana ita stadi henia tauna be hebou haida dekenai ia mai lasi. Namona be Salamo 133:1 eiava Heberu 10:24, 25 edia anina be ia ida ita herevalaia, bona ita nanadaia unai siri be edena bamona ia laloa. Pablisa taudia haida be guna hereva momokani idia abia dae haraga dainai, ma haida idia stadi henidia neganai bema idia goada idia lao haraga lasi, idia haheauka henidia diba lasi. Namona be ita laloatao taunimanima ese diba idia abia negadia edia daudau be idauidau, unai dainai namona be haida ita haheauka henidia bada.
8 Paulo ese Timoteo ia hamaoroa, namona be “Lohiabada ena hesiai tauna . . . be . . . taunimanima ibounai dekenai do ia bogahisihisi henia. . . . Ia ese, iena hereva idia utua taudia do ia sisiba henidia mai ena manau danu.” (2 Tim. 2:24, 25) Bema iseda “hereva idia utua taudia” be unai bamona ita kara henidia be maoro, namona be hereva idia kamonaia bona stadi idia ura henia taudia ita kara henidia mai eda manau bona mai eda hemataurai danu. Iseda natudia eiava iseda ruma bese taudia ita stadi henidia neganai, unai bamona ita kara henidia danu be namo.
9 Sivarai namona ita harorolaia neganai, ruma ta ruma ta dekenai, lou-henia dekenai, eiava Baibel stadi dekenai, namona be ita ibounai ese Hadibaia Tauna Badana, Iesu Keriso, ena kara ita tohotohoa. Sibona ia gwauraia inai bamona: “Lau be dagedage lasi bona manau tauna.” (Mat. 11:29) Iseda haroro bona hadibaia gaukaradia dekenai, namona be ena kara ita tohotohoa, namona be mai eda manau bona mai eda hemataurai danu taunimanima ita hereva henidia.
[Questions]
1. Hereva momokani taunimanima dekenai ita harorolaia neganai, dahaka sisiba ita laloatao be namo?
2. Bema ta ia gwau ia bisi neganai, dahaka do ita karaia?
3. Ruma taudia be ita dekenai idia badu neganai, dahaka do ita karaia be namo?
4. Ruma tauna ita lou henia neganai bema guna ia abia bukana ia do duahia lasi, dahaka do ita karaia be namo?
5. Bema ruma tauna ia gwau ita do ia naria, to ita giroa lao neganai ia noho lasi, gabeai ita davaria lou neganai, edena bamona ita hereva henia be namo?
6. Oi stadi henia tauna ia hegaegae guna lasi neganai, dahaka ita karaia diba?
7. Edena bamona ita stadi henia tauna ita durua bena ia diba hebou iboudiai dekenai ia mai be gau badana?
8. Haida ita hadibadia neganai, Paulo ia gwau dahaka anina bada gauna ita laloatao be namo?
9. Iseda hahediba gaukara dekenai daika ena kara do ita tohotohoa be namo?
This is a repeat of article in km 5/92 taken from km-E 1/87 “Presenting the Good News—In a Tactful Way.”