Dirava Ena Hahediba be Mai Ena Siahu
1 Dirava Hereadaena, gau ibounai ia Havaraia Tauna, Iehova Dirava, ena amo ita abia sisiba herevadia be hahenamo bada! (Sal. 50:1; Isa. 30:20b) Hari inai negai, tanobada hegegemadai, taunimanima hutuma be iena tomadiho goeva ororona dekenai idia lao idia ia hadibaia totona. (Mika 4:2) To taunimanima milion momo be taunimanima edia lalohadai bona tanobada ena aonega idia laloa bada sikulidia dekenai idia lao, diba idia abia totona. To bema unai aonega karana ese Iehova bona iena Hereva ia dadaraia, unai be kavakava gauna Dirava matanai, bona unai aonega ese ia biagudia taudia be kavakava taudia.—Sal. 14:1; 1 Kor. 1:25.
2 Hari inai lagani dokonai Dirava ena hahediba dalana do ita itaia namonamo. Hebouhebou ena hereva badana ena ladana be “Dirava Ena Hahediba,” bona program ena hereva ibounai lalonai do ia hedinarai. Do ita kamonai hereva haida be inai: Dirava ena Hereva bona iena lauma helaga ese ita idia hatamonaia tanobada hegegemadai tadikaka bamona oreana lalonai, iseda lalohadai bona kara ia haidaua, demoni edia hahediba herevadia amo ita ia naria, bona haroro taudia namodia ai do ita lao totona ita ia hadibaia. Dirava ena hahediba amo edena bamona namo oi davaria diba?
3 Ena Anina Keristen Mauri Dekenai: Dirava ena hahediba herevadia ese ita idia durua iseda lalona ena mamina ita hanamoa totona. Ita vara neganai ita ibounai dekenai lalona ena mamina ia noho, to kara maoromaoro karadia bona Iehova ia hamoalea dalana dekenai ita do ia hakaua totona, iseda lalona do ita hadibaia be gau badana. (Sal. 19:7, 8; Roma 2:15) Tanobada taudia edia lalohadai dalana be Dirava ena Hereva hegeregerena lasi, bona unai dainai idia daradara, idia diba lasi dahaka be maoro bona dahaka be kerere. Sibodia idia laloa edia lalohadai be maoro dainai, dahaka be mauri ena kara goeva bona hereva badadia ma haida idia hepapahuahulaidia. Idia momo idia ura sibodia ese edia mauri namona idia biagua bona idia ura sibodia ese edia mauri dalana idia abia hidi. Aonega korikori dala tamona badinaia karana idia ura henia lasi. (Sal. 111:10; Ier. 8:9; Dan. 2:21) To Dirava ena hahediba herevadia ese ita idia hadibaia dainai, ita daradara lasi, bona Dirava ena ruma lalonai mai lalo-tamona danu ita noho diba. Mai goada danu dina vairadiai do idia vara gaudia ita naria noho, bona mai iseda lalona ena mamina namona danu, haroro gaukara ita karaia goadagoada noho.
4 Dirava ena hahediba herevadia ese ita idia durua “hadibaia hereva idauidau” ita idia koia garina. (Ef. 4:14) Taunimanima edia aonega herevadia ita laloa bada lasi, unai herevadia dainai taunimanima be kerere tahua bona tomadiho daradaralaia taudia ai idia lao, sibodia edia dala idia abia hidi, bona unai ese edia mauri ena kara goeva ia hadikaia. Iehova ese ita ia hadibaia dainai ita moale, badina unai neganai taunimanima momo idia davaria lalohisihisi gaudia ita abia lasi. Iehova ena taravatu bona sisiba herevadia be hegeregere ‘ita murinai hereva ta do ita kamonai,’ ia gwau: ‘Dala be inai. Ia lalonai umui raka, umui taunimanima.’—Isa. 30:21.
5 Iseda Hebou Bona Haroro Gaukara Karadia: Ita diba Heberu 10:23-25 ena hereva be Dirava ena hahegani ita dekenai. Iehova ese kongregesen heboudia dekenai ita ia hadibaia. Hanaihanai hebou dekenai ita lao eiava hebou kara ita laloa bada lasi, a? Inai ita laloatao, ita haboua tamona be iseda tomadiho karana ta. Namo lasi ita laloa ita lao eiava ita lao lasi be herevana. Iehova ese iseda lauma aniani ia hegaegaelaia bona unai aniani haida ita reaia be dika.
6 Mose ese Dirava ia guriguri henia, ia gwau: “Aiemai dina ai duahia dalana mani ai oi hadibaia, emai kudouna dekenai aonega ia noho totona.” (Sal. 90:12) Unai bamona ita guriguri danu, a? Dina ta ta iboudiai ita lalodia bada, a? Bema oibe, dina ta ta iboudiai dekenai ‘iseda kudouna dekenai aonega do ia noho’ dainai kara namo do ita karaia, bena unai amo iseda Hadibaia Tauna Badana, Iehova Dirava, ena ladana do ita hanamoa. Dirava ena hahediba herevadia ese ita idia durua unai do ita karaia totona.
[Questions]
1. Dirava ena aonega bona tanobada ena aonega edia idau be dahaka?
2. Dirava ena hahediba herevadia amo dahaka namo ita davaria diba?
3. Dirava ena hahediba herevadia edia anina Keristen ena mauri dekenai be dahaka?
4. Dirava ena hahediba herevadia ita badinaia karana amo dahaka namo ita davaria?
5. Dahaka dainai hebou karadia be mai anina bada?
6. Guriguri amo Mose ese Iehova Dirava ia noia dahaka ia abia totona?