Lagani 1993/94 “Dirava Ena Hahediba” Distrik Hebouhebou amo Namo Abia (Kahana 1)

¹ “Iehova e, emu dala lau dekenai oi hadibaia.” (Sal. 86:11) Dirava ena gwauhamata hesiai taudia iboudiai be mai edia lalona ibounai ida unai bamona idia guriguri be namo. Ita ura nega ibounai diba ma haida ita abia bona ita ura ita kamonai herevadia ita badinaia noho. Nega ta ta ai iseda lalohadai hamaoromaoroa totona sisiba ita abia be namo, bona salamo tauna ia karaia bamona, namona be guriguri amo Dirava ena heduru ita tahua iseda kudouna ia lalo-tamona totona. “Dirava Ena Hahediba” Distrik Hebouhebou ena program lalonai, ita badinaia diba sisiba herevadia do ita abia iseda lalohadai ita hamaoromaoroa totona, bena hari inai nega ena metau momo lalonai mai abidadama danu Iehova ena hesiai gaukara do ita karaia noho diba.

³ Dahaka do ita davaria? Lauma aniani bada be dala idauidau amo do idia hahedinaraia: hereva, haheitalai, henanadai henia karadia amo, bona drama rua do ita itadia. Unai mai anina bada hadibaia herevadia ta do ita reaia lasi be namo! Ma danu, do ita moale badina nega daudau lalonai ita turana henia taudia bona turadia matamatadia do ita hedavari heheni.

⁴ Iena Kohu Rumana Dekenai Oiemu Gwauta amo Ta Oi Henia Guguru, Eiava? Malaki 3:10 ai, Iehova ia gwauhamata Israel taudia dekenai, ia gwau bema idia ura tohoa, namona be iena kohu rumana dekenai edia gwauta amo ta idia henia guguru, bena idia dekenai hahenamo do ia bubua diho ela bona idia hegeregere momokani.

⁵ Haida dekenai, Iehova idia tohoa ena anina be hebouhebou do idia lao henia totona, edia biaguna do idia noia haraga holide eiava livi do ia henidia totona. Nega haida, tadikaka be unai idia karaia totona idia gari bamona, idia laloa edia biaguna ese nega do ia henidia lasi hebouhebou dekenai do idia lao henia totona. To, lauma gaudia lasi karadia idia ura karaia neganai, idia gari lasi edia biaguna idia noia, nega do ia henidia totona.

⁶ Namona be sibona ita nanadaia: Bema lauegu turana do ia headava, egu gaukara biaguna do lau noia nega lau ia henia headava dekenai do lau lao totona, a? Bema biaguna ia daradara neganai, mai hemataurai ida do ita hamaoroa ita ura dikadika ita lao, ani? Iehova ese ita do ia hadibaia karana ena namo ese headava dekenai do ita lao karana ena namo ia hereaia! Bema ita diba momokani hebouhebou lao henia be mai anina bada lauma dalanai do ita tubu goada totona, vadaeni iseda gaukara biaguna ena lalona ita veria namonamo nega ita ia henia be gau haragana.​—Iak. 1:​7, 8.

⁷ Idaunegai Israel lalonai, edia gwauta amo ta idia henia be harihari gauna Iehova tomadiho henia dubuna durua totona. Hari inai negai, iseda gwauta amo ta ita henia gauna be iseda nega, goada, bona moni, Iehova ena hesiai gaukara bona Basileia gaukara durua totona. Danu, iseda gwauta amo ta ita henia gauna be iseda nega ita henia kongregesen heboudia, bona hebouhebou badadia lao henia totona, bona iseda Kingdom Hall hanamodia bona hagoevadia gaukara karaia totona. “Dirava Ena Hahediba” Distrik Hebouhebou dekenai, dala idauidau amo Iehova ena lauma kohu rumana lalonai iseda gwauta amo ta ita henia. Unai dala idauidau haida be dahaka?

⁸ Iseda gwauta amo ta ita henia karana be inai: hebouhebou ena program herevadia do ita kamonai henidia namonamo, Basileia ane ta ta iboudiai be mai goada danu ita anelaidia, bona idia gwauraia guriguri iboudiai do ita kamonai henidia namonamo iseda kudouna ibounai ida amen do ita gwauraia totona.

⁹ Ita hakala dalana hegeregerena hereva momokani dekenai do ita tubu. Hebouhebou gabu eiava steidiam ia bada neganai, haida edia kara ese iseda lalona idia veria haraga diba, unai dainai namona be hebouhebou ena hereva ita hakala henidia namonamo. Namona be ita hegaegae namonamo hebouhebou lao henia totona, iseda Baibel, ane bukana, pen bona pepa, bona unai pura ena Gima Kohorona stadi magasin ita abidia lao. Heduru gauna namona be hereva idia henia taudia ta ta iboudiai idia gwauraia hereva badadia bona Baibel siridia ita toredia. Hereva momo toredia lasi; hereva momo toredia neganai, hereva henia tauna ena hereva be reana do ita laloa namonamo lasi. Namona be natudia ita hadibaia idia hakala namonamo totona. Natudia be edia tamana bona sinana ida kohu rumana dekenai edia gwauta amo ta idia henia diba karana be hebouhebou ena program herevadia do idia hakala henia namonamo.

¹⁰ Tamana bona sinana haida be edia ruma dekenai regerege lasi negana idia abia hidi, bona unai nega lalonai dina ta ta iboudiai edia natudia be Society ena buka ta do idia duahia eiava ena laulau do idia itaia. Unai bamona idia hadibadia dainai, kongregesen heboudia bona hebouhebou badadia dekenai regerege lasi dekenai idia helai be auka lasi. Edia natudia idia hadibadia namonamo tamadia bona sinadia idia gwau hebou negadiai, edia natudia idia koudia dainai, gadara gaudia eiava toretore buka idaudia be hebou dekenai idia abidia mai lasi. Ena be natudia idia maragi momokani, to namona be idia diba hebou idia lao henia ena badina be Iehova idia tomadiho henia totona. Natudia idia hadibadia kohu rumana dekenai edia gwauta amo ta idia henia dainai unai tamadia bona sinadia ita hanamodia be namo!

[Questions]

1. “Dirava Ena Hahediba” Distrik Hebouhebou dekenai dahaka namo do ita davaria?

2. (a) Gabu idaudia hida dekenai hebouhebou do idia karaia? (b) Lae bona Rabaul dekenai hebouhebou be edena dinadia ai do idia karaia? (c) Port Moresby dekenai hebouhebou be edena dinadia ai do idia karaia?

3. Dahaka do ita davaria?

4. Malaki 3:10 ai, Iehova ena gwauhamata herevana Israel taudia dekenai be dahaka?

5. Tadikaka haida be hari dahaka do idia karaia be namo?

6. Hebouhebou lao henia totona bema ita gari iseda gaukara biaguna ita noia nega ita ia henia totona, namona be sibona dekenai dahaka henanadai ita henia?

7. Hari inai nega lalonai, iseda gwauta amo ta ita henia karana be dahaka?

8. Kohu rumana dekenai iseda gwauta amo ta ita henia kara ma haida be dahaka?

9. (a) Hebouhebou dekenai do ita laohaia gaudia haida be dahaka? (b) Natudia be kohu rumana dekenai edia gwauta amo ta idia henia karana be dahaka?

10. Hebou totona do idia hegaegae dalana dekenai, tamana bona sinana haida be edia natudia be edena bamona idia hadibadia?

This article is unique to PNG.