Hegaegae, Taitai Taudia Hagoadadia Totona
1 Iehova Dirava vairanai idia goeva noho totona, namona be Iena hesiai taudia iboudiai ese edia varavara iboudiai bona edia hanua taudia iboudiai idia hadibadia goevagoeva, mase taudia tomadiho henia karana ta o edia badu koua karana ta o edia heduru noia karana ta be do idia karaia lasi. Henunai idia noho heduru herevadia ese ita idia durua mase ta ia vara bona kara idauidau idia karaia gwauraia neganai:
A. Iseda varavara ta o turana ta ia mase neganai, ita be mai eda hemataurai ida mase tauna ita kara henia be maoro.
B. Bema mase tauna be oiemu varavara o oiemu turana, ia oi taitailaia be taunimanima edia kara korikori hegeregerena, to bema oi be nega daudau oi taitai badabada, unai amo oi hahedinaraia toreisi lou herevana oi abidadama henia momokani lasi.
C. Mase tauna ita laloatao mai eda hemataurai ida dainai iena mase gurigurina be tadikaka ese idia karaia neganai, ita danu ita lao be kerere lasi. Eiava, bema mase tauna be iseda orea tauna lasi dainai idau tomadiho oreana taudia ese idia gurigurilaia, edia guriguri herevadia ita kamonai henia diba mai eda hemataurai ida, to ita be idia ida ita guriguri hebou diba lasi, ane ita abia hebou diba lasi, bona tomadiho koikoi karana ma ta ita karaia diba lasi danu. Unai neganai namona be dubu murimurinai ita naria noho.
D. Mase tauna ena varavara ita durudia diba, mase tauna guria dalana hegaegaelaia totona, ena guri geia totona, bona mase tauna mauana hoia totona.
E. Mase tauna ena varavara ita hebogahisi henidia dainai aniani o moni ita henidia, mase hebouna dekenai idia hebou taudia bona guri idia geia taudia edia aniani do idia henidia totona be maoro. Gau tamona, bema aniani eiava moni be tomadiho koikoi karana ta dekenai idia gaukaralaia gwauraia, gau ta ita henidia lasi be namo.
F. Bema oi be mase tauna ena varavara, eiava turana ena ruma bese taudia oi vadivadi henidia, eiava idia danu oi noho, unai be Keristen lalokau hahedinaraia karana.
G. Bema oi be mase tauna ena varavara ta, oi be emu varavara ida mase tauna ena kohu o tano haridia karana o ena ruma taudia naridia kara herevalaia hebou totona umui hebou be maoro. Iena mase neganai o murinai unai bamona umui karaia diba, to mase tauna tomadiho henia karana ta oi karaia diba lasi.
2 Mase ariana ta dekenai ita lao neganai, o ta ia mase murinai ena varavara taudia danu ita aniani hebou neganai, namona be inai mai anina bada gaudia ita laloatao:
Henuai ai torelaia karadia be babalau karadia dainai, idia karaia taudia ese Dirava ena taravatu idia utua. Karadia be inai:
A. Mase tauna hereva henia o guriguri henia karadia.
B. Mase tauna gari henia karadia.
C. Aniani o harihari gaudia mase tauna henia karadia.
D. Mase tauna hamoalea o ena badu koua totona idia karaia ariana o karana lalonai vareai karadia.
E. Dabua idauna hahedokilaia, kara idaudia karaia o besoso karaia, o mase tauna ena varavara ena ruma nega taina daudau mahutalaia karadia, mase tauna matauraia totona o hanua taudia edia ura karadia karaia totona, badina idia laloa mase tauna ena lauma ese mauri taudia ia kara henidia diba.
F. Mase tauna ena kohu ta eiava ena dabua ta eiava iena tauanina ena gau ta dogoatao karadia, unai gau ese dogoatao tauna ia naria totona, o mase tauna tomadiho henia totona.
G. Sibona ena vairana eiava tauanina kakasia, ivaia o haberoa karadia, mase tauna taitailaia neganai.
H. Mase tauna tomadiho henia totona o ena badu koua totona idia karaia ariana dekenai aniani karadia.
I. Mase tauna tomadiho henia o hamoalea kara idaudia.
3 Atai herevadia ita lalodia neganai, namona be mase tauna matauraia karana bona mase tauna tomadiho henia karana edia idau ita tahua. Ita ese mase tauna ita matauraia diba dalana be inai: Ia be guna ia karaia kara namodia bona iena mauri lalonai ia abia ladana namona ita laloatao mai eda hemataurai ida. (Koh. 7:1) To, bema mase tauna eiava guna ia karaia karadia be iseda mauri lalonai ita abia isi bada eiava ena ladana ita gwauraia bada, unai kara amo Dirava ena taravatu ita utua. Unai kara amo mase tauna ita tomadiho henia eiava iseda dirava koikoina ai ita halaoa unai.
This article is unique to PNG.