Baibel Stadi Karaia Dalana
1 Baibel stadi karaia namonamo dalana be dahaka? Ita abia haheitalai namona be dahaka? Ita stadilaia sivaraina lalonai idia torea Baibel siridia be edena bamona do ita kikilaidia? Daika ese paragraf do ia duahidia? Ena be stadi dalana ita diba, to ita stadi henia tauna ese hereva momokani do ia lalo-pararalaia momokani totona ma dahaka do ita karaia be gau badana? Dahaka hekwakwanai do ita koudia be gau badana?
2 Stadi Karaia Dalana: Nega momo, ta ena ruma dekenai Baibel stadi karaia dalana be Kongregesen Buka Stadi karaia dalana hegeregerena. Gau ginigunana be ta ese paragraf ia duahia. Bena stadi hakaua tauna ese paragraf henunai ia noho henanadai do ia gwauraia bona ia naria ia stadi henia tauna do ia haere totona. Bema ia daradara, stadi hakaua tauna be henanadai ma haida do ia henia, unai amo ia durua hereva do ia lalohadailaia namonamo haere maorona do ia diba totona.
3 Idia torea Baibel siridia be paragraf ena sivarai dekenai idia hesiriu dalana umui tahua. Stadi tauna oi hadibaia edena bamona idia torea vadaeni Baibel siridia edia toana ia diba bona ia danu edia anina umui kikilaia. Bema Baibel karoa bona siri ma haida idia torea, to edia hereva idia torea hedinarai lasi, bema idia lata momokani lasi, namona be Baibel oi kehoa bona oi stadi henia tauna do ia duahidia bona edia anina paragraf ena sivarai dekenai do ia gwauraia hedinarai.
4 Oi Stadi Henia Tauna Oi Durua Hereva Momokani Do Ia Lalo-Pararalaia Namonamo Totona: Oi stadi henia tauna oi hagoadaia stadi totona do ia hegaegae totona. Oi hadibaia bema diba ia ura abia, duahiduahi karana be mai anina bada. Oi stadi henia tauna be stadi ena hereva momo ia duahia bona unai hereva ia lalohadailaia namonamo neganai, unai ese do ia durua bada. Stadi hakaua taudia haida ese idia stadi henia taudia idia hamaorodia Baibel stadi ena paragraf iboudiai do idia duahia totona. Ma haida idia karaia dalana be stadi hakaua tauna ese paragraf ta ia duahia bona murina paragraf Baibel stadi tauna ia duahia. Namona be oi laloa namonamo, nega ibounai oi stadi henia tauna oi durua lauma dalanai do ia goada totona.
5 Ena be stadi herevana umui karaia neganai Baibel stadi tauna ese diba do ia abia, to ia kamonai herevadia ia abidia dae momokani, a? Hereva momokani do ia lalo-pararalaia momokani totona, unai hereva ena anina ena mauri dekenai do ia lalo-pararalaia be gau badana. Ia kamonai herevadia be edena bamona ia lalodia? Ia kamonai herevadia be edena bamona ia gaukaralaidia diba? Stadi tauna ena kudouna oi hamarerea totona unai bamona henanadai oi henia.
6 Ita Koua Karadia: Baibel stadi ita karaia neganai kara haida ita koua be namo. Ita stadi neganai bema stadi tauna ese sivarai idauna ta do ia herevalaia, namona be ita hamaoroa stadi murinai eiava ma nega ta ai unai sivarai do ita kikilaia. Ma danu, namo lasi stadi tauna be buka amo haere ia duahia, to sibona ena hereva amo haere ia henia be gau badana. Unai ese stadi hakaua tauna ia durua, badina unai amo ia diba stadi tauna be sivarai ena anina ia lalo-pararalaia eiava lasi.
7 Namona be oi goada karaia Baibel stadi tamona do oi karaia totona, ani? Bema Iehova dekenai oi tabekau bona Kongregesen Buka Stadi dalana hegeregerena oi karaia, ia auka momokani lasi. Taunimanima dekenai hereva momokani hadibaia bona hahediba taudia ai oi halaodia dala namona be Baibel stadi karana amo. Unai oi karaia neganai, do oi moale badina Iesu ena hahegani Mataio 28:19, 20 lalonai ia gwauraia gaukarana oi durua namonamo dainai.
[Questions]
1. Ta ena ruma dekenai Baibel stadi karaia dalana dekenai dahaka henanadai ita laloa be namo?
2. Ta ena ruma dekenai Baibel stadi karaia dalana be dahaka?
3. Oi stadi henia tauna be dahaka ia karaia diba?
4. Dahaka dainai Baibel stadi tauna ese paragraf haida eiava iboudiai ia duahidia be mai anina bada?
5. Stadi tauna ese hereva momokani do ia lalo-pararalaia namonamo totona edena bamona ita durua diba?
6. Baibel stadi karaia neganai dahaka kara ita koua be namo?
7. (a) Taunimanima dekenai hereva momokani hadibaia dala namona be dahaka? (b) Baibel stadi ita karaia namonamo totona dahaka gau rua ese ita idia durua?