Oiemu Baibel Stadi Tauna Ena Kudouna Oi Hamarerea
1 Oi ura emu Baibel stadi tauna ia diba herevadia do ia badinadia, a? Ia diba gaudia amo namo do ia davaria totona, unai ia karaia be gau badana. Oiemu Baibel stadi tauna ese kara ta do ia karaia totona, ena kudouna oi hamarerea be gau badana. Pentekoste 33 C.E. dinanai, aposetolo Petero be mai goada danu ia hereva dainai taunimanima “idia gari momo,” bona unai dina lalonai taunimanima 3,000 bamona ese mai moale danu “ena hereva idia abia dae” bona bapatiso idia abia. (Kara 2:37, 41) Oiemu Baibel stadi tauna ena kudouna be edena bamona do oi hamarerea diba?
2 Hegaegae Namonamo: Namo lasi paragraf momo umui karaia bona nega ia noho lasi stadi tauna ena lalona oi veria stadi ena hereva ia laloa namonamo totona. Edena hereva badadia oi ura gwauraia hedinarai oi hegaegaelaidia guna, bona Baibel siri edia anina oi diba bona idia oi hahedinaraia namonamo diba be gau badana. Baibel stadi tauna ena mauri dalana dainai, namona be do ia laloa daradara gaudia do oi lalodia hegaegae. Bema oi stadi henia tauna oi diba namonamo, unai ese oi do ia durua, badina unai neganai ia durua bada sivaraidia do oi hegaegaelaidia diba.
3 Iesu Ena Hadibaia Dalana Oi Tohotohoa: Hereva idia dobu eiava idia auka neganai, bona sivarai ena anina bona mamina idia abia totona, Iesu ese ia hadibaia taudia dekenai haheitalai hereva ia gwauraidia. (Luka 10:29-37) Unai hegeregerena, hadibaia hereva namodia be emu Baibel stadi tauna ena kudouna do idia hamarerea totona, auka lasi haheitalai herevadia, hari inai negai idia vara gaudia do oi gwauraidia, bona stadi tauna ena mauri dekenai edia anina do oi hahegeregerea.
4 Nega momo Iesu ese ia hahedinaraia hegeregerena, henanadai karana be mai anina bada Baibel stadi taudia edia kudouna hamarerea totona. (Luka 10:36) Namo lasi oi laloa stadi tauna be buka amo haere ia duahia sibona be ia hegeregere. Namona be henanadai namodia ma haida amo ena lalona oi veria bena guna ia laloa lasi gauna do ia laloa. Danu, unai dala amo stadi tauna ia durua ia lalohadai namonamo totona. Ena lalohadai sivarai ta dekenai do oi diba totona, lalona veria henanadaidia oi henia. Unai neganai, reana oi diba edena bamona do oi durua be namo, bona heduru hereva unai gauna dekenai do oi henia bada diba.
5 Bema Baibel stadi tauna ia goada ia lao lasi, namona be ena lalona oi veria toho ena badina do oi diba totona. Reana unai oi diba totona, stadi negana lalonai lasi, to ma nega ta ai do oi vadivadi henia. Dahaka dainai kara ta ia do karaia lasi? Baibel ena hereva ta ia do lalo-pararalaia lasi, a? Ena mauri lalonai kara haida do ia haidaua garina ia gari, a? Bema Baibel stadi tauna be ‘lalo-rua’ tauna, oi durua bena do ia diba unai kara amo dika ia davaria diba.—1 Pav. 18:21.
6 Aposetolo Paulo ia diba, kamonai taudia dekenai, Baibel ena hereva momokani hadibaia karana be taunimanima hamauria gaukarana, unai dainai, ia ese Keristen taudia iboudiai ia sisiba henidia ‘edia hadibaia hereva idia karaia namonamo noho totona.’ (1 Tim. 4:16) Taunimanima dekenai Baibel stadi oi karaia neganai, Baibel ena sivarai bona tanobada dekenai idia vara gaudia edia badina mo sibona do idia diba lasi. Gau badana be ita durudia bena diba maorona Iehova bona Iesu dekenai do idia abia, bona idia danu idia turana henidia momokani totona. Unai neganai, sibona edia kara amo idia hahedinaraia idia be mai edia abidadama. (Iak. 2:17, 21, 22) Stadi tauna ena kudouna ita hamarerea neganai, ena kudouna ese do ia doria Iehova ena ladana ia hanamoa totona bona sibona ena mauri naria dalana ia badinaia totona.—Her. 2:20-22.
[Questions]
1. Iseda Baibel stadi taudia ese kara ta do idia karaia totona, edia kudouna be edena bamona do ita hamarerea diba?
2. Emu Baibel stadi oi do karaia lasi neganai hegaegae totona, dahaka do oi karaia guna be gau badana?
3. Ia hadibaia taudia idia lalo-parara totona, Iesu ese dahaka heduru gauna ia gaukaralaia?
4. Iseda Baibel stadi taudia ita hadibadia neganai, dahaka henanadai do ita henidia be namo?
5. Emu Baibel stadi tauna ia goada ia lao lasi neganai, dahaka do oi karaia diba?
6. Oi Baibel stadi henia tauna ese dahaka diba do ia abia be gau badana?