Yearbook—Hagoadaia Hereva Momo Abia Gabuna
1 Iehova ena hesiai taudia be gaukara ripoti bona ekspiriens amo Iehova ena kara namodia idia kamonai neganai, hanaihanai idia moale. (Iobu 38:4, 7; Her. 25:25; Luka 7:22; Kara 15:31) Unai dainai, Yearbook of Jehovah’s Witnesses bukana be hagoadaia hereva momo abia gabuna.
2 Lagani ta ta iboudiai, Yearbook dekenai, tanobada ibounai lalonai Iehova ena Witness taudia edia gaukara ripoti bona hagoadaia ekspiriens idia toredia. Unai abidadama hagoadaia ekspiriens ese idia hahedinaraia Iehova be ena taunimanima ia hakaudia, ia naridia, bona ia hanamodia. Unai Yearbook lalonai, gari lasi tatau bona hahine edia sivarai idia torea. Baibel ena hereva momokani be tano idauidau iboudiai bona motumotu kahirakahira iboudiai edia taunimanima dekenai idia laohaia totona, idia ese edia ruma bese, edia turadia, bona edia tano idia rakatania.
3 Yearbook ese idia duahia taudia momo ia hasiahudia edia hesiai gaukara Dirava dekenai idia habadaia totona. Unai buka ia duahia hahine ta ia torea, ia gwau: “Lau ura dikadika lau duahia noho. Ia dekena amo lau duahia vadaeni sivaraidia ese lau idia hagoadaia. Haida be mai hekwarahi bada danu idia gaukara; edia sivarai ese egu lalona ia ania bona lau laloa namona be egu sivarai namona harorolaia gaukarana do lau habadaia.”
4 Lagani 1927 amo, lagani ta ta iboudiai Yearbook of Jehovah’s Witnesses bukana lalonai, gaukara ripoti bona ekspiriens ese ita idia hagoadaia. Ita ia hagoadaia diba bukana amo namo do oi davaria totona, oi gaukaralaia momo, a? Namo do oi davaria totona, Yearbook ia ginidae neganai, namona be oi duahia. Bena lagani ia heau lalonai, ena hereva ta ta do oi itaia lou oi bona oiemu ruma bese taudia hagoadadia totona.