Emu Lalona Oi Hadaia Ful-Taim Hesiai Gaukarana Karaia Totona
1 Iseda gwauhamata hagugurua totona bona mauri hanaihanai do ita abia totona, gau badana be Keristen ena haroro gaukarana ita karaia. (Roma 10:10; 1 Tim. 4:16) Iesu ese taunimanima haida ia boiridia neganai iena hahediba taudia ai do idia lao totona, ia hahedinaraia goevagoeva edia maduna ta be Dirava ena Basileia ena sivarai do idia harorolaia. (Luka 9:57-62) Iesu ena boiboi ita kamonai bona ena hahediba taudia ai ita lao neganai, reana iseda moni gaukara do ita haidaua lasi, to ena anina be iseda lalohadai ita haidaua mai anina bada gaudia do ita lalodia guna totona. Mai anina bada gaukarana ta be Iehova ena “hoa kara badadia [ita] gwauraia hedinarai.” Unai anina be hahediba taudia ai ita halaodia danu. (1 Pet. 2:9; Mat. 24:14; 28:19, 20) Iehova dekenai edia mauri idia gwauhamatalaia taudia iboudiai be haroro gaukara idia laloa guna. Idia momo be mai edia dala dainai ful-taim hesiai gaukarana idia karaia.—2 Kor. 4:1-7.
IA BE MAURI DALA NAMONA
2 Pioneer ta be lagani 54 lalodiai nega ibounai hesiai gaukarana ia karaia, bona ia gwau: ”Lau abia hekwakwanai be momo lasi, to lau abia hahenamo be momo herea. Bema mai egu dala lau matamata lou, egu mauri dala lau haidaua lasi, do lau ura egu mauri ibounai lau henia Dirava badana, Iehova, ena hanamoa gaukarana lau karaia totona.” Tanobada ena gaukara ta amo unai bamona lalona ena mamina namona bona moale bada karana do ia havaraia diba lasi. Ful-taim hesiai gaukarana be Dirava abidadama henia dalana ta, bona unai gaukara amo hahenamo momo, hari bona gabeai danu, do ia havaraia diba.—1 Tim.4:8.
3 Ful-taim hesiai gaukarana amo oi moale bada badina heduru karana bona henia karana oi karaia momo dainai. (Kara 20:35) Emu turana karaia karana Iehova bona ena Natuna, Iesu Keriso, dekenai ia habadaia bona ia hagoadaia, badina Basileia gaukarana oi karaia hanaihanai dainai. (Luka 16:9; 1 Kor. 15:58) Oi lalo-manau bona emu lalona ena mamina ia namo, badina mai emu dala neganai emu goada ibounai ida pioneer haroro gaukarana oi karaia. Unai maduna oi manadalaia dainai unai ese oi ia durua haroro gaukara habadaia bona Iesu ena hahegani oi badinaia totona, ia gwau, “Basileia bona iena kara maoromaoro do umui tahua guna.”—Mat. 6:33.
EMU HESIAI GAUKARA DEKENAI OI GOADA OI LAO
4 Gaukara ta dekenai do oi kwalimu totona, emu diba unai gaukara dekenai do oi habadaia noho be gau badana. Ta ese pioneer gaukara do ia haheaukalaia, moalelaia, bona goadalaia noho totona, gau badana be ena diba unai gaukara dekenai do ia habadaia noho. Iehova ese iena orea amo, kongregesen heboudia dekenai, bona hebouhebou dekediai, lauma dalanai ita ia hadibaia. Danu, elda edia orea idia hebou bona sekit naria tauna ena vadivadi neganai ia danu idia hebou. Sekit hebouhebou ena pura lalonai, pioneer taudia totona hebou ta idia karaia. Unai heboudia dekenai idia gwauraia heduru herevadia oi toredia bona mai emu ura danu oi badinadia, a?
5 Bema Baibel stadi ta oi do karaia lasi, emu lalona oi hadaia stadi ta oi abia totona, a? Ruma-ta-ruma-ta gaukara dekenai, oiemu hamatamaia herevadia, eiava oiemu teritori dekenai koua herevadia hanaidia dalana, do oi hanamodia diba, a? Bona hahenamo bada be inai: Oi laloa gabu daudau ena teritori dekenai oi lao diba oi haroro totona, eiava oi laloa kongregesen ma ta dekenai oi lao diba, nega sisina eiava nega daudau lalonai oi durudia totona, a? Unai dala bona dala ma haida amo, pioneer gaukara dekenai oi goada oi lao diba bona oi hanamoa Dirava ena gaukara oi karaia namonamo totona.
6 Taunimanima momo idia karaia hegeregerena, bema oi ura pioneer gaukara do oi hamatamaia, namona be unai oi gurigurilaia noho Iehova dekenai dala ia kehoa totona. (Mat. 7:7, 8) Momo herea be heduru pioneer gaukara idia karaia guna, bena unai dala amo edia abidadama Iehova dekenai idia habadaia.
7 Mai ena diba bona aonega bada taudia sibodia lasi, to ma haida be pioneer gaukara idia karaia diba. Bema Dirava bona taunimanima oi lalokau henidia momokani, bona oi hegeregere nega haida oi sibona emu ura oi reaia, vadaeni, pioneer gaukara oi karaia diba. (Mat. 22:37-39; Fil. 4:13) Keristen haroro gaukarana ese oi do ia durua kara namodia oi manadalaidia totona, bona Aramagedono amo do idia roho mauri taudia ese unai bamona kara idia hahedinaraia be mai anina bada. Bema ful-taim hesiai gaukarana oi karaia unai ese emu lalokau, abidadama, moale, bona maino do ia habadaia. (Gal. 5:22, 23) Unai dainai, namona be emu lalona oi hadaia pioneer gaukara oi karaia totona bona unai gaukara namona oi karaia noho!
[Questions]
1. Mai ena diba bona aonega bada tauna sibona be pioneer gaukara ia karaia diba, a?
2. Ia gwauhamata vadaeni Keristen tauna be dahaka mai anina bada gaukarana do ia karaia?
3. Mauri dala namona be dahaka?
4. Dahaka dainai ful-taim hesiai gaukarana amo moale bada oi abia diba?
5. Iseda ful-taim hesiai gaukara dekenai iseda diba be edena bamona ita habadaia noho diba?
6. Dahaka ese oi do ia durua emu ful-taim hesiai gaukara dekenai oi goada oi lao totona?
7. Bema oi ura momokani pioneer gaukara do oi hamatamaia, namona be dahaka do oi karaia?
This is a repeat of article in km 1/93 taken from km-E 10/89 “Make Full-Time Service Your Career.”