Iehova Ena Vara Guna Natuna Hanamoa!
1 Sunday, Nisan 9, lagani 33 C.E. ai, taunimanima hutuma edia imadia dekenai niu raudia idia dogoatao bona Iehova ena vara guna Natuna, Lohiabada Iesu Keriso idia hanamoa, idia gwau ia be ‘iseda King, Iehova ena ladana dekenai ia mai!’ (Luka 19:38; Heb. 1:6) Monday bona Tuesday be Nisan 10 bona 11, bona unai dinadia dekenai Iesu be taunimanima dekenai ia haroro goadagoada, ena tanobada mauri ibounai amo unai dina ai ia haroro bada herea, badina ena mase dinana be ia kahirakahira dainai.
2 Hari inai negai, laulau dalanai, taunimanima hutuma edia imadia dekenai au raudia idia dogoatao bona idia boiboi badabada, idia gwau: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.” (Apok. 7:9, 10) March 26 ai, Memorial hebouna do ita karaia Keriso ena mase dinana ita laloatao totona. Unai dina ia mai noho neganai, namona be iseda haroro gaukara ita habadaia, badina unai amo tanobada hegegemadai iena ladana hanamoa gaukarana do ita habadaia diba, ani?
3 Haroro Gaukara Habadaia: March lalonai heduru pioneer gaukara do idia karaia totona pablisa momo ese edia ladana idia henia vadaeni. Hari hua eiava April ena hua lalonai oi ura idia oi bamodia, a? Bema oibe, karaharaga oiemu aplikeisen pepana oi henia. Elda ta be mai moale danu oiemu henanadai unai gaukara dekenai do ia haerelaia. Namona be hua ena henia gauna, Memero Kekeni Edia Henanadai—Haere Maorodia buka umui abidia hegaegae, haroro gaukara dekenai umui gaukaralaidia totona.
4 Ena be heduru pioneer gaukara reana oi karaia diba lasi, to namona be March bona April lalodiai emu haroro gaukara do oi habadaia be namo. Reana kongregesen ese dala idia hegaegaelaia diba, March ena dina ta ta iboudiai grup taudia idia lao haroro totona. Teritori do idia atoa hegaegae be namo unai idia karaia diba totona.
5 Namona be Saturday, March 26 ai, kongregesen iboudiai idia hegaegae haroro gaukara karaia totona idia hebou. Ena be Memorial hebouna totona gaukara idauidau idia karaia, to namona be unai Saturday ena daba kahanai ita ibounai ita lao haroro. Ruma-ta-ruma-ta gaukara ita karaia, bona danu, Memorial hebouna dekenai ita boiria taudia ita nanadaia, idia be mai edia dala idia mai totona, hebou ia matamaia ena nega idia diba, bona hebou ena gabu idia diba namonamo totona.
6 Taunimanima Ita Boiridia Bona Ita Hagoadadia: Iesu ese ena hahediba taudia ia haganidia, ia gwau: “Inai bamona do umui karaia, lau do umui laloa totona.” (1 Kor. 11:24) Iesu murinai idia raka horoa taudia ese unai hahegani idia badinaia, bona Iehova ena hesiai taudia iboudiai idia boiridia mai unai Memorial hebou ena hereva idia kamonai bona idia itaia totona. Ita boiria mai diba taudia be inai: iseda Baibel stadi taudia, iseda varavara, Baibel amo ita kiki hebou taudia, iseda Witness lasi adavana, bona moni gaukara gabuna ai ita diba taudia. Namona be edia ladana be lisi dekenai ita torea, unai neganai ta ita laloaboio lasi.
7 Memorial hebouna dekenai kamonai taudia ma haida ita hagoadadia diba. Namona be ita ginidae haraga, unai neganai nega ginigunana hebou dekenai idia mai taudia ita hedavari heheni diba. Bema oiemu Baibel stadi taudia haida idia mai, namona be pablisa ta oi hamaoroa idia haida danu idia helai hebou totona. Nega ginigunana hebou dekenai idia mai taudia oi hamaorodia, namona be do idia mai kongregesen ena Pablik Tok dekenai. Pablik tok do ia henia elda tauna ia hegaegae namonamo kamonai taudia edia lalona veria totona be gau badana.
8 Memorial hebouna haorea totona, ane namba 105, “Iehova Ena Vara Guna Natuna Hanamoa!” do ita anelaia hebou, unai neganai, bema ia ore huana dekenai ita ese mai goada danu Iehova ena ladana hanamoa totona tiokratik gaukara ita karaia, do ita moale diba!
[Questions]
1. Nisan 9-11, 33 C.E. dekenai idia vara gaudia oi gwauraia hedinarai.
2. Memorial hebouna ia mai noho neganai, dahaka gaukara ita habadaia be namo?
3. Iseda haroro gaukara ita habadaia dalana namona ta be dahaka?
4. Pablisa taudia idia durudia edia haroro gaukara idia habadaia totona, kongregesen ese dahaka idia karaia diba?
5. (a) Namona be Saturday, March 26 ai, kongregesen iboudiai idia hegaegae dahaka idia karaia totona? (b) Memorial hebouna dekenai ita boiria taudia be edena bamona ita durudia diba?
6. Memorial hebouna dekenai daika daika ita boiridia mai diba?
7. Memorial hebouna dekenai idia mai taudia be edena bamona ita durudia diba?