Kongregesen Ena Pablik Tok Karaia Dalana Hagoadaia Momokani

¹ Lagani haida gunanai tau ta ese kongregesen hebouna ia gwauraia pepapepana ta ia davaria. Ia ese hereva momokani ia tahua dainai ia laloa namona be vaira Sunday dekenai unai Pablik Tok dekenai do ia lao, bona unai dina dekenai hebou gabuna dekenai ia ginidae haraga. Pablisa ta be mai moale danu idia hedavari heheni, bona idia kiki noho lalonai, pablisa tauna ia gwau, bema ia ura Baibel idia stadilaia hebou diba, to unai tau ia gwau ia ura lasi. To gabeai, iena lalohadai ia haidaua badina pablik tok henia tauna ia hegaegae namonamo dainai unai tok ia moalelaia bada, bena hebou murinai ia gwau stadi ia ura. Unai tau be ia goada ia lao haraga, bona hua haida murinai bapatiso ia abia. Unai haheitalai namona amo heduru gaudia toi ita diba.

² Gau ginigunana be, Pablik Tok pepapepadia idia haridia dainai tok idia harorolaia. Kongregesen ena pablik tok ena hebou harorolaia totona, umui ese idia printaia pepapepadia umui gaukaralaidia, a? Hebou ena seamani ese murina pura ena pablik tok ladana ia gwauraia hedinarai neganai, namona be emui teritori dekenai daika daika ese unai hereva do idia moalelaia umui lalodia, iseda buka eiava magasin idia duahidia eiava lasi be herevana. Taunimanima haida be buka duahiduahi idia ura lasi, eiava idia dekenai duahiduahi be ia auka, to reana Baibel ena hereva idia ura kamonai henia.

³ Gau iharuana be, nega ginigunana hebou dekenai ia mai neganai unai tau be mai moale danu idia hedavari heheni. Namona be hebou gabuna dekenai oi ginidae haraga, badina unai neganai emu tadikaka bona taihu bona kamonai matamata taudia danu ita hedavari heheni diba. (Heb. 10:24) Tau ta be nega ginigunana hebou dekenai ia mai neganai, reana ia diba lasi dahaka do ita karaia. Namona be oi hadibaia, hebou kehoa totona ane bona guriguri do ita karaia, bona hebou lalonai dahaka ita karaia oi hadibaia. Bema ia namo neganai, oi boiria oi danu do ia helai hebou totona, badina unai neganai emu Baibel bona ane buka dekenai ia itaia diba. Oi hamaoroa hebou ia ore neganai, bema ia be mai ena henanadai do umui kikilaia hebou diba.

⁴ Gau ihatoina be, pablik tok henia tauna ia hegaegae namonamo. Kongregesen lalonai tadikaka haida ese maduna idia abia pablik tok idia henia totona; bona unai tadikaka idia hegaegae neganai, idia ese hora momo idia negea, badina idia ura do idia henia hereva amo kamonai taudia edia lalona idia veria lalokau bona kara namodia do idia habadaia totona. Hari inai negai, ita ibounai ese tanobada ena metau ita davaria, bona Dirava ena Hereva amo ita kamonai hereva momokanina ese ita idia durua ita haheauka noho totona. Momokani, ena be pablik tok ena hereva be namo herea momokani, to bema ita hakala namonamo lasi, ita do ia durua bada lasi. Hereva idia henia neganai, nega haida oi hakala be ia auka, a? Heduru gauna be noutbuk dekenai unai hereva haida oi toredia, hebouhebou dekenai oi karaia hegeregerena. Hereva henia tauna ese Baibel siri ia duahidia bona edia anina ia gwauraia hedinarai neganai, namona be emu Baibel oi itaia bona oi duahidia danu.