Hadibaia Hereva
◼ Kongregesen iboudiai ese edia Kingdom Hall dekenai lagani ena siri badana idia atoa vadaeni be namo. Lagani ta ta iboudiai namona be kongregesen naria tauna ese dala ia hegaegaelaia nega korikori ai unai idia karaia totona.
◼ February negana amo, sekit naria taudia ese do idia henia pablik tok ena ladana be “Keristen Taudia be Tanobada amo Idia Gini Siri—Unai Dainai Hahenamo Idia Davaridia.”
◼ Bema pablisa taudia idia ura March bona April lalonai heduru pioneer gaukara do idia karaia, namona be harihari idia hegaegae bona edia aplikeisen do idia atoa haraga. Unai ese elda taudia ia durudia, bena idia hegaegae haroro teritori, buka, bona magasin idia hegeregere totona.
◼ Namona be seketere bona haroro gaukara naria tadikakadia be regular pioneer taudia iboudiai edia haroro gaukara do idia sekea. Bema pioneer taudia haida ese edia haroro horadia idia abia be ia auka, namona be elda taudia idia hegaegae idia idia durudia totona.
◼ October dokonai bona November ia matamaia neganai, iseda brens ese tadikaka bona taihu 31 idia abidia hidi Hong Kong bona Manila edia spesel intenesenel hebouheboudia dekenai idia lao totona. Idia momo be idau tanodia dekenai guna idia lao lasi, to unai hebouheboudia dekenai Hakaua Oreana ena memba taudia bona ma haida ese idia henia herevadia idia kamonai dainai edia abidadama ia hagoadaia bada. Philippines bona Hong Kong tadikaka bona taihu hutuma sibona lasi, to idau tanodia amo idia boiria mai taudia handred momo idia noho danu. Iseda tadikaka rua idia boiridia miniti rua lalonai Papua New Guinea dekenai iseda haroro gaukara ena ripoti idia duahia. Unai hegeregerena, idau tanodia amo tadikaka ta ta edia gabu dekenai haroro gaukara be edena bamona ia tubu ena sivarai idia duahia. Unai spesel intenesenel hebouheboudia dekenai idia lao taudia ese unai hagoadaia heheni herevadia idia kamonai neganai, edia kudouna idia hamareredia bona edia lalona idia hamoaledia, bona sibodia edia matana amo idia itaia tanobada hegegemadai ita be tadikaka bamona Keristen oreana.
◼ Namona be Memorial hebouna totona kongregesen do idia hegaegae; hari lagani lalonai unai hebou do ita karaia ena nega be Saturday, March 26, dina ia diho murinai. Namona be kongregesen ta ta be Memorial hebouna do idia karaia, to nega haida unai idia karaia be dala lasi. Bema kongregesen rua eiava toi ese Kingdom Hall tamona idia gaukaralaia, namona be Memorial hanuaboina dekenai unai kongregesen haida ese hebou gabu idauna do idia tahua. Namo lasi Memorial hebouna be hanuaboi momokani dekenai idia hamatamaia, badina reana kamonai matamata taudia do idia hekwarahi idia mai totona. Ma danu, bema hebou vairanai bona murinai nega be lasi vareai matamata taudia do ita hedavari heheni totona, lauma dalanai haida do ita durudia totona, eiava hebou taudia iboudiai idia hagoadaia heheni totona, unai be namo lasi. Gau ibounai idia laloa namonamo murinai, elda taudia ese Memorial hebouna ena gaukara do idia hegaegaelaia namonamo diba, do idia mai taudia iboudiai ese namo bada do idia davaria totona.
◼ Lagani 1994 Memorial negana lalonai, tanobada hegegemadai, pablik tok badana be Sunday, April 10, ai do idia henia. Unai hereva ena ladana be “Tomadiho Momokani ese Taunimanima ia Durudia.” Unai tok ena autlain pepana do ai siaia. Unai dina lalonai bema oiemu kongregesen dekenai sekit naria tauna ia vadivadi, sekit hebouhebou ta idia karaia, eiava dina tamona hebouhebouna idia karaia, namona be unai pablik tok badana be murina pura dekenai do idia karaia. Namo lasi kongregesen ese unai hereva badana be April 10 vairanai idia karaia.
◼ February ena henia gauna: Mauri Hanaihanai Paradaiso Lalonai bukana, davana be K3.00. March ena henia gauna: Memero Kekeni Edia Henanadai—Haere Maorodia bukana, davana be K1.50. April Bona May edia henia gauna: Gima Kohorona sabskripsen, davana be K6.00, eiava buklet tamona (Sikuli buklet henia lasi), davana be 30 toea. ITAIA: Bema kongregesen dekenai unai henia gaudia idia noho hegaegae lasi, namona be murina hua ena Literature Request Form dekenai oda idia karaia.