Memorial Hebouna Hegaegaelaia
1 Memorial Ena Nega: Saturday, March 26, 1994 ai, dina ia diho murinai paraoa bona uaina do ita siaia. Namona be unai dina dekenai ma hebou ta do ita karaia lasi. Namona be unai pura lalonai sekit naria taudia danu be edia sediual idia haidaua.
2 Memorial Herevana: March ena Iseda Basileia Gaukara pepana danu Memorial hereva ena autlain matamatana ai siaia. Hereva do ia henia tauna ese unai autlain ia abia vadaeni do ia hegaegaelaia totona, a?
3 Memorial Paraoa Karaia Dalana: Paraoa hegaegaelaia totona flour kapusi tamona oi abia bona ranu sisina oi bubua ela bona ia manada namonamo. (Bema whole wheat flour oi davaria diba lasi, plain white flour oi gaukaralaia diba.) Damena eiava hatubua muramurana do oi atoa lasi. Bena pata latanai oi atoa bona kavabu ta amo oi moia bamona, ela bona ia palakapalaka bona ia severasevera, ia severasevera momokani be namo. Bena pani ta lalonai girisi sisina sibona oi atoa bena hari paraoa oi udaia. Lahi dekenai oi atoa bona ia noho ela bona paraoa ia auka bona ena kopina be ia korema sisina. Edena uaina hoia: Uaina haida dekenai suga eiava gau haida idia atoa, unai dainai unai uaina ita hoia lasi. Ita hoia diba uaina kakakaka edia ladadia be inai: Claret, Cabernet Sauvignon bona Shiraz.
4 Paraoa Bona Uaina Siaia Negana: Memorial paraoa bona uaina do idia siaia lasi ela bona dina ia diho murinai. Hari lagani lalonai, dina do ia diho negadia be inai: Port Moresby, 6:18; Daru, 6:34; Kerema, 6:25; Alotau, 6:10.
5 Hekwakwanai Neganai: Bema lai dikana ia toa, abata ia vara, eiava bese ta be ma bese ta ida idia tuari heheni dainai, kongregesen taudia be nega korikori ai hebou gabuna dekenai idia lao diba lasi, namona be grup maragidia ta ta ai do idia hebou, eiava ruma bese do idia hebou unai Memorial hebouna karaia totona.
6 Bema kongregesen taudia be grup maragidia dekenai idia hebou, namona be unai grup iboudiai dekenai idia hebou taudia edia namba idia haboua bona unai namba be kongregesen ena ripoti ida do idia siaia Association dekenai.
7 Bema haida be dibura rumana dekenai idia noho eiava ma gau ta ia vara dainai, paraoa bona uaina idia abia diba lasi, namona be unai tadikaka do idia hebou Baibel ena siri haida do idia kikilaidia totona; bema unai bamona idia karaia idia danu be Memorial hebouna dekenai idia lao taudia edia namba lalonai do idia vareai.
8 Bema tadikaka ta ia noho lasi, vadaeni, lo taihuna ta ese ena kwarana do ia kumia, bena Mataio 26:17-30, Luka 22:7-23, 28-30, bona 1 Korinto 11:20-31 edia siri do ia duahidia helai taudia totona.
9 Karaia Gabuna: Elda edia orea taudia be Kingdom Hall eiava ma gabu ta do idia abia hidi unai mai anina bada hebouna do ita karaia totona. Gau ibounai edia toana idia namo totona, elda taudia ese dina ta idia gwauraia Kingdom Hall hagoevaia gaukarana karaia totona. Reana helai gaudia ma haida do idia atoa danu. Namona be helai gaudia do idia atoa namonamo eiava taunimanima be laini dekenai do idia helai paraoa bona uaina idia siaia lao neganai ta ese ia reaia garina. Namona be edia namba idia hegeregere atendan taudia idia abia hidi bona idia hadibaia namonamo dahaka do idia karaia totona.
10 Paraoa Bona Uaina Siaia Taudia: Bema hebou taudia be momo namona be tadikaka ma haida danu idia abidia hidi paraoa bona uaina idia siaia lao totona. Namona be paraoa bona uaina idia siaia lao taudia edia dabua be idia goeva bona toana idia namo. Tadikaka ese paraoa idia siaia lao vadaeni neganai, do idia giroa lao hereva henia tauna vairanai, bena do idia gini ia ese paraoa bona uaina idia dekenai do ia henia totona. Bena murinai idia ta ese hereva henia tauna do ia henia. Uaina idia siaia lao vadaeni murinai danu be unai bamona do idia karaia.
11 Bema gau ibounai totona do idia hegaegae namonamo neganai, gau ibounai do idia karaia namo, bona idia mai taudia ese Witness taudia edia kara do idia diba, bona Iehova ena ladana do ia hanamoa bada.
This is a repeat of article in km 3/91, unique to PNG. Also repeated in km 4/92, 3/93.