Haroro Totona Idia Hebou Neganai Mai Anina Herevadia Karaia
1 Luka 10:1-11 dekenai, sivarai ia gwau, Iesu be hahediba taudia matamatadia 70 ida ia hebou bona haroro gaukara totona idia hegaegae dalana ia hadibadia. Idia hegaegae totona heduru hereva ia henidia do idia badinadia totona; dahaka do idia hereva, bona hekwakwanai idia vara neganai dahaka do idia karaia ia hadibadia. Unai sivarai ita duahia neganai ita ia durua.
2 Reana hahediba taudia 70 iboudiai be Iesu ida idia hebou. Hari inai negai, haroro totona idia hebou neganai, taunimanima haida be hanaihanai idia ginidae leiti dainai, nega ia ore kava. Idia ginidae leiti dainai, edena motuka dekenai do idia guia bona edena grup danu do idia gaukara be tadikaka ese ma idia hegaegaelaia lou. Unai dainai, nega haida, haroro totona grup taudia iboudiai idia lao haraga diba lasi. Ita ibounai ita heduru diba dalana be ita ginidae haraga bona karaharaga teritori dekenai ita lao.
3 Iesu ese ena grup taudia dekenai kiki herevana ta ia henidia idia harorolaia totona, unai be, “Dirava ena Basileia.” (Luka 10:9) Ita danu ese unai sivarai harorolaia gaukarana ita abia, bona herevalaia dalana dekenai ita ura heduru hereva haida ita abia. Reana hebou naria tauna be Buka Helaga Herevalaia bukana ena hereva haida do ia gwauraia, unai buka dekenai hamatamaia hereva idauidau be 40 bona ma haida, bona sivarai idauidau hamomokania Baibel siri namodia momo idia toredia. Kiki hereva kwadogi tamona eiava rua be haheitalai amo idia hahedinaraia neganai, unai ese ita ia durua iseda lalohadai dekenai hereva ta ita laloa hegaegae totona, bona iduara dekenai ita ginidae neganai mai goada danu taunimanima ita hereva henia diba.
4 Iesu ese ena hahediba taudia ia hadibadia dahaka do idia hereva, to unai sibona lasi, idia herevalaia dalana ia hadibadia danu. (Luka 10:5, 6) Hesiai Hebou ena program dekenai, do ita haroro namonamo dalana idia hahedinaraia. Reana haroro totona idia hebou neganai, naria tauna be Hesiai Hebou gunana dekenai idia hahedinaraia herevana ta do ia riviulaia, bona unai dina ena haroro gaukara lalonai edena bamona do idia badinaia diba dalana do ia hahedinaraia. Idia hegaegaelaia kiki hereva kwadogina be haheitalai amo idia hahedinaraia neganai, unai ese ita ia durua lalohadai haida ita hegaegaelaidia totona, bona unai lalohadai do ita herevalaidia diba.
5 Edia kara toana idia namo totona, Iesu ese ena hahediba taudia ia hadibadia danu. (Luka 10:7, 8) Unai hegeregerena, reana hebou naria tauna be ita dekenai heduru hereva do ia henia, bona iseda haroro gaukara ia hakererea diba gauna ita dadaraia diba. Reana sisiba ita do ia henia ita momo be dala dekenai ita gini hebou lasi totona, eiava kamonai lasi taudia ida ita hepapahuahu lasi totona. Reana do ita laloatao totona, do ia gwau kamonai taudia ita davaria neganai, namona be ruma-ta-ruma-ta pepana dekenai ita torea namonamo, bona magasin bona buka edia davana ita gwauraia. Reana tamana bona sinana do ia hamaorodia edia natudia edia kara idia naria namonamo.
6 Hahediba taudia 70 be Iesu ena heduru hereva idia badinaia murinai “idia giroa lou, mai moale danu.” (Luka 10:17) Haroro totona ita hebou neganai, bema ita idia henia heduru hereva ita badinadia, Basileia ena sivarai harorolaia gaukarana amo iseda moale do ita habadaia.—Kara 13:48, 49, 52.
[Questions]
1. Luka 10:1-11 ena sivarai ita duahia neganai edena bamona ita ia durua?
2. Haroro totona idia hebou neganai, dahaka dainai nega korikori dekenai ita ginidae be gau badana?
3. (a) Edena sivarai badana ita harorolaia? (b) Dahaka do ita hereva ita diba totona, heduru be edeseniai ita abia?
4. (a) Dahaka dainai haroro totona ita hebou neganai, naria tauna be Hesiai Hebou gunana dekenai idia karaia haheitalai haida do ia riviulaia be namo? (b) Dahaka haheitalai kwadogina do idia hahedinaraia diba?
5. Hebou naria tauna ese ita dekenai dahaka do ia hereva diba?
6. Bema heduru hereva ita badinadia dahaka do ita davaria?
This article is repeated in km 8/96.